പുണ്യമാസമായ റമദാന്റെ പശ്ചാത്തലത്തിൽ ദുബായ് പോലീസ് നടത്തുന്ന ഭിക്ഷാടന വിരുദ്ധ ക്യാമ്പയിൻ രണ്ടാം വാരത്തിലേക്ക് കടക്കുമ്പോൾ 37 പേർ പിടിയിലായി. വിവിധ രാജ്യങ്ങളിൽ നിന്നുള്ളവരാണ് പിടിയിലായതെന്ന് ജനറൽ ഡിപ്പാർട്ട്മെന്റ് ഓഫ് ക്രിമിനൽ ഇൻവെസ്റ്റിഗേഷൻ വിഭാഗം അറിയിച്ചു. ‘ബോധവൽക്കരിക്കപ്പെട്ട സമൂഹം ഭിക്ഷാടനമുക്തം’ എന്ന മുദ്രാവാക്യവുമായി ദുബായ് റെസിഡൻസി ആൻഡ് ഫോറിൻ അഫയേഴ്സ്, ഇസ്ലാമിക് അഫയേഴ്സ് എന്നിവയുമായി സഹകരിച്ചാണ് നഗരത്തിലുടനീളം പരിശോധന ശക്തമാക്കിയിരിക്കുന്നത്.
റമദാൻ കാലത്ത് ജനങ്ങൾക്കിടയിലുള്ള ദാനശീലത്തെയും കാരുണ്യത്തെയും ചൂഷണം ചെയ്താണ് പലരും ഭിക്ഷാടനത്തിനായി തെരുവിലിറങ്ങുന്നത്. കുട്ടികളെയും രോഗികളെയും മുൻനിർത്തി സഹതാപം പിടിച്ചുപറ്റുന്ന രീതിയാണ് ഇത്തരം സംഘങ്ങൾ പ്രധാനമായും പയറ്റുന്നത്. നഗരത്തിന്റെ അന്തസ്സിനും സുരക്ഷയ്ക്കും ഭീഷണിയാകുന്ന ഇത്തരത്തിലുള്ള സാമൂഹിക തിന്മകൾക്കെതിരെ വിട്ടുവീഴ്ചയില്ലാത്ത നടപടികളാണ് സ്വീകരിക്കുന്നതെന്ന് പോലീസ് വ്യക്തമാക്കി.
Also Read: പ്രവാസികൾക്ക് ആശ്വാസം! സന്ദർശക വിസക്കാർക്കും മടങ്ങിയെത്താനാകാത്തവർക്കും വിസാ കാലാവധി നീട്ടി കുവൈത്ത്
സഹായങ്ങൾ അർഹരായവരിലേക്ക് നേരിട്ടെത്തുന്നുണ്ടെന്ന് ഉറപ്പാക്കാൻ അംഗീകൃത ചാരിറ്റി സംഘടനകൾ വഴി മാത്രം സംഭാവനകൾ നൽകണമെന്ന് അധികൃതർ നിർദ്ദേശിച്ചു. ഭിക്ഷാടകരെ ശ്രദ്ധയിൽപ്പെട്ടാൽ 901 എന്ന ടോൾ ഫ്രീ നമ്പറിലോ ‘പൊലീസ് ഐ’ ആപ്പ് വഴിയോ വിവരം അറിയിക്കാവുന്നതാണ്. കൂടാതെ, ഓൺലൈൻ വഴിയുള്ള ഭിക്ഷാടന തട്ടിപ്പുകൾ തടയാൻ ‘ഇ-ക്രൈം’ പ്ലാറ്റ്ഫോം വഴിയും പരാതികൾ നൽകാൻ സൗകര്യമുണ്ട്.
The post റമദാൻ കാലത്തെ ഭിക്ഷാടനം! ദുബായിൽ രണ്ടാഴ്ചയ്ക്കിടെ പിടിയിലായത് 37 പേർ; കർശന നടപടിയുമായി പോലീസ് appeared first on Express Kerala.
