‘ഇതൊരു തുടക്കം മാത്രം, ക്രിക്കറ്റിൽ ഇന്ത്യയുടെ ആധിപത്യം തുടരും’; ആത്മവിശ്വാസം പ്രകടിപ്പിച്ച് രോഹിത് ശർമ

ലോക ക്രിക്കറ്റിൽ ഇന്ത്യൻ ടീം കൈവരിച്ച ആധിപത്യം വരുംകാലങ്ങളിലും തുടരുമെന്ന് മുൻ നായകനും ലോകകപ്പ് ജേതാവുമായ രോഹിത് ശർമ. മുംബൈയിൽ ടി20 മുംബൈ ലീഗ് നാലാം സീസണിന്റെ ലോഞ്ചിനിടെ സംസാരിക്കുകയായിരുന്നു അദ്ദേഹം. പുരുഷ-വനിതാ ടീമുകൾ ഒരേപോലെ ലോകവേദികളിൽ കിരീടങ്ങൾ ചൂടുന്നത് രാജ്യത്തിന് വലിയ അഭിമാനമാണെന്നും ഈ വിജയക്കുതിപ്പ് തടസ്സമില്ലാതെ മുന്നോട്ട് പോകുമെന്നാണ് തന്റെ പ്രതീക്ഷയെന്നും രോഹിത് വ്യക്തമാക്കി.

കഴിഞ്ഞ രണ്ട് വർഷമായി ഇന്ത്യൻ ക്രിക്കറ്റ് കൈവരിച്ച നേട്ടങ്ങളിൽ തനിക്ക് വലിയ സന്തോഷമുണ്ടെന്ന് രോഹിത് പറഞ്ഞു. അടുത്തിടെ നടന്ന ടി20 ലോകകപ്പിൽ പുരുഷ ടീം കൈവരിച്ച ചരിത്രവിജയവും, നവി മുംബൈയിൽ നടന്ന ഏകദിന ലോകകപ്പിൽ ഇന്ത്യൻ വനിതകൾ ആദ്യമായി കിരീടം നേടിയതും അദ്ദേഹം എടുത്തുപറഞ്ഞു. ടീമുകൾ നിലവിൽ പ്രകടിപ്പിക്കുന്ന മികവ് സമാനതകളില്ലാത്തതാണെന്നും ഈ ആവേശം വരും ടൂർണമെന്റുകളിലും നിലനിർത്തണമെന്നും അദ്ദേഹം ടീമുകളെ ഉപദേശിച്ചു.

Also Read: അവൻ അടുത്ത ധോണിയല്ല, ഒരേയൊരു സഞ്ജു; സഞ്ജു സാംസണെക്കുറിച്ച് ശശി തരൂർ

ഇന്ത്യൻ ക്രിക്കറ്റിന്റെ സുവർണ്ണകാലത്തിന്റെ തുടക്കം മാത്രമാണിതെന്ന് വിശേഷിപ്പിച്ച രോഹിത്, ഇനി പിന്നോട്ട് നോക്കേണ്ട സാഹചര്യമില്ലെന്ന് ഓർമ്മിപ്പിച്ചു. ക്രിക്കറ്റിലെ വേഗതയെക്കുറിച്ച് നാം എപ്പോഴും സംസാരിക്കാറുണ്ട്. നിലവിൽ പുരുഷ-വനിതാ ടീമുകൾക്ക് ആ ഒരു വേഗത കൈവന്നിട്ടുണ്ട്. അത് വരും വർഷങ്ങളിലും നിലനിർത്താൻ സാധിക്കുമെന്ന് ഉറച്ചു വിശ്വസിക്കുന്നതായും രോഹിത് ശർമ കൂട്ടിച്ചേർത്തു.

The post ‘ഇതൊരു തുടക്കം മാത്രം, ക്രിക്കറ്റിൽ ഇന്ത്യയുടെ ആധിപത്യം തുടരും’; ആത്മവിശ്വാസം പ്രകടിപ്പിച്ച് രോഹിത് ശർമ appeared first on Express Kerala.