ഇസ്രയേൽ-അേമിക്കൻ ആക്രമണ ഭീഷണികൾക്കിടയിലും ഇറാന്റെ തലസ്ഥാനമായ ടെഹ്റാൻ സാധാരണ ജീവിതത്തിലേക്ക് മടങ്ങുകയാണെന്ന് റിപ്പോർട്ടുകൾ. യുദ്ധം മൂന്നാം വാരത്തിലേക്ക് കടക്കുമ്പോഴും നഗരത്തിലെ കഫേകളും റെസ്റ്റോറന്റുകളും സജീവമായിക്കഴിഞ്ഞു. വരാനിരിക്കുന്ന പേർഷ്യൻ പുതുവത്സരത്തിന്റെ ഭാഗമായി തജ്റിഷ് ബസാറിലെ കടകൾ തുറന്നതും എ.ടി.എമ്മുകൾക്ക് മുന്നിലെ തിരക്കും ജനങ്ങൾ ഭയരഹിതരായി പുറത്തിറങ്ങുന്നതിന്റെ സൂചനയാണ്. ബാങ്കിംഗ് മേഖലയിലെ ഓൺലൈൻ തടസ്സങ്ങൾക്കിടയിലും വിപണികൾ സജീവമാകുന്നത് രാജ്യത്തിന്റെ ആത്മവിശ്വാസം വർധിപ്പിക്കുന്നു.
അതേസമയം, മേഖലയിൽ സംഘർഷം അതിശക്തമായി തുടരുകയാണ്. ഇസ്രയേലിലെ വ്യോമതാവളം ലക്ഷ്യമാക്കി ഹിസ്ബുള്ള മിസൈൽ ആക്രമണം നടത്തി. പടിഞ്ഞാറൻ ഇറാനിലും ഇസ്രയേൽ വ്യാപകമായ ആക്രമണങ്ങൾ അഴിച്ചുവിട്ടു. ഇതിനു മറുപടിയായി ഇസ്രയേലിന്റെ ഉപഗ്രഹ ആശയവിനിമയ കേന്ദ്രങ്ങളിൽ ഡ്രോൺ ആക്രമണം നടത്തിയതായി ഇറാൻ സേനയും അവകാശപ്പെട്ടു. യുദ്ധസന്നദ്ധതയുടെ ഭാഗമായി ഇസ്രയേൽ സർക്കാർ വൻതുക സൈന്യത്തിനായി നീക്കിവെച്ചിട്ടുണ്ട്.
ഇറാഖിലെ സ്ഥിതിഗതികൾ വഷളായതിനെത്തുടർന്ന് അമേരിക്ക തങ്ങളുടെ പൗരന്മാരോട് ഉടൻ രാജ്യം വിടാൻ നിർദ്ദേശിച്ചു. ഇറാൻ അനുകൂല സായുധ സംഘങ്ങൾ അമേരിക്കൻ സ്ഥാനപതി കാര്യാലയത്തിന് നേരെ ആക്രമണം കടുപ്പിച്ചതാണ് ഇതിന് കാരണം. സൗദി അറേബ്യയും ബഹ്റൈനും ഇറാന്റെ ഡ്രോണുകളെ വെടിവെച്ചിട്ടതോടെ പശ്ചിമേഷ്യ മൊത്തത്തിൽ വലിയൊരു യുദ്ധമുനമ്പിലായിരിക്കുകയാണ്.
The post യുദ്ധഭീതിയിലും തളരാതെ ഇറാൻ! ജനജീവിതം സാധാരണനിലയിലേക്ക് appeared first on Express Kerala.
