നൂറ്റാണ്ടുകളോളം ഭൂപടങ്ങളിൽ തലയുയർത്തി നിന്നിട്ടും, ആധുനിക തിരച്ചിലുകളിൽ ഒരിടത്തും കണ്ടെത്താനാകാത്ത ‘ബെർമേജ’ എന്ന നിഗൂഢ ദ്വീപ് ഇന്നും ശാസ്ത്രലോകത്തിനും ചരിത്രകാരന്മാർക്കും ഒരു ചോദ്യചിഹ്നമായി തുടരുന്നു. മെക്സിക്കോയിലെ യൂക്കാട്ടൻ തീരത്തിന് വടക്ക് സ്ഥിതി ചെയ്തിരുന്നതായി പറയപ്പെടുന്ന ഈ ദ്വീപ്, ചുവന്ന മണ്ണും പാറകളും നിറഞ്ഞതായിരുന്നു എന്നാണ് പഴയകാല നാവിക രേഖകൾ സാക്ഷ്യപ്പെടുത്തുന്നത്. 1539-ൽ സ്പാനിഷ് ഭൂപട നിർമ്മാതാവായ അലോൻസോ ഡി സാന്റാ ക്രൂസ് ആണ് ആദ്യമായി ഈ ദ്വീപിനെ ലോകത്തിന് പരിചയപ്പെടുത്തിയത്. തുടർന്ന് നൂറ്റാണ്ടുകളോളം വിവിധ രാജ്യങ്ങളുടെ ഭൂപടങ്ങളിൽ ബെർമേജ കൃത്യമായി അടയാളപ്പെടുത്തപ്പെട്ടു. എന്നാൽ ഇരുപതാം നൂറ്റാണ്ടിന്റെ പകുതിയോടെ ഈ ദ്വീപ് എവിടെയെന്ന ചോദ്യത്തിന് മുന്നിൽ ലോകം പകച്ചുനിൽക്കുകയാണ്.
ദ്വീപിനായുള്ള തിരച്ചിലുകൾ പരാജയപ്പെട്ടതോടെ ശക്തമായ ഗൂഢാലോചന സിദ്ധാന്തങ്ങളും ഇതോടൊപ്പം പ്രചരിക്കുന്നുണ്ട്. മേഖലയിലെ എണ്ണ നിക്ഷേപത്തിന്മേലുള്ള അവകാശം സ്ഥാപിച്ചെടുക്കുന്നതിനായി അമേരിക്കൻ ചാരസംഘടനയായ സിഐഎ ബോംബിട്ട് ഈ ദ്വീപിനെ തകർത്തുകളഞ്ഞതാണെന്നാണ് മെക്സിക്കോയിലെ ഒരു വിഭാഗം വിശ്വസിക്കുന്നത്. ബെർമേജ നിലനിന്നിരുന്നെങ്കിൽ മെക്സിക്കോയുടെ സമുദ്രാതിർത്തി കൂടുതൽ വിസ്തൃതമാവുകയും ഗൾഫ് ഓഫ് മെക്സിക്കോയിലെ ഭീമമായ എണ്ണശേഖരത്തിൽ അമേരിക്കക്ക് അവകാശം നഷ്ടമാവുകയും ചെയ്യുമായിരുന്നു എന്നതാണ് ഈ വാദത്തിന് ആധാരം. എന്നാൽ, ഇത്തരം ആരോപണങ്ങളെ ശരിവെക്കുന്ന തെളിവുകളൊന്നും ഇതുവരെ ലഭ്യമായിട്ടില്ല.
Also Read: പ്രേതങ്ങൾ ഭരിക്കുന്ന കാട്! സാഹസികരെ ഭയപ്പെടുത്തുന്ന ഹോയ ബാക്യു വിശേഷങ്ങൾ
മറുഭാഗത്ത്, ഇതൊരു ‘ഫാന്റം ഐലൻഡ്’ മാത്രമാണെന്നാണ് ഭൗമശാസ്ത്രജ്ഞരുടെ പക്ഷം. ആദ്യകാല ഭൂപട നിർമ്മാതാക്കൾക്ക് പറ്റിയ പിഴവ് പിന്നീട് വന്നവർ ആവർത്തിച്ചതാകാം ഇതിന് കാരണം. 1997-ലും 2009-ലും മെക്സിക്കൻ സർക്കാർ അത്യാധുനിക സംവിധാനങ്ങളുപയോഗിച്ച് കടലിന്റെ അടിത്തട്ട് വരെ പരിശോധിച്ചെങ്കിലും ദ്വീപിന്റെ അവശിഷ്ടങ്ങൾ പോലും കണ്ടെത്താനായില്ല. ആഗോളതാപനം മൂലം സമുദ്രനിരപ്പ് ഉയർന്നപ്പോൾ ദ്വീപ് മുങ്ങിപ്പോയതാകാനോ അതോ ശക്തമായ ഭൂചലനത്തിൽ കടലിനടിയിലേക്ക് താഴ്ന്നു പോയതാകാനോ സാധ്യതയുണ്ടെന്നും വിദഗ്ധർ വിലയിരുത്തുന്നു. എങ്കിലും, ഒരു ദ്വീപ് പൂർണ്ണമായും മാഞ്ഞുപോയതിന് പിന്നിലെ സത്യം ഇന്നും കടലിന്റെ ആഴങ്ങളിൽ ഒളിഞ്ഞു കിടക്കുകയാണ്.
NB: ഈ വാർത്തയിൽ ഉപയോഗിച്ചിരിക്കുന്ന ചിത്രം പ്രതീകാത്മകമാണ്. (Generated by AI)
The post കടൽ വിഴുങ്ങിയ രഹസ്യം; ബെർമേജ ഒരു യാഥാർഥ്യമോ അതോ വെറും തോന്നലോ? appeared first on Express Kerala.
