പ്രദീപ് രംഗനാഥന്റെ ‘ലവ് ഇൻഷുറൻസ് കമ്പനി’ തീയേറ്ററുകളിലേക്ക്!

‘ലവ് ടുഡേ’ എന്ന ചിത്രത്തിലൂടെ തെന്നിന്ത്യൻ പ്രേക്ഷകരുടെ പ്രിയങ്കരനായി മാറിയ പ്രദീപ് രംഗനാഥൻ നായകനാകുന്ന ‘ലവ് ഇൻഷുറൻസ് കമ്പനി’ ഏപ്രിൽ 3-ന് തീയേറ്ററുകളിലെത്തും. നേരത്തെ ഡിസംബറിൽ റിലീസ് ചെയ്യാനിരുന്ന ചിത്രം ചില കാരണങ്ങളാൽ മാറ്റിവെച്ചിരുന്നു. ഇപ്പോൾ പുതിയ പോസ്റ്ററിനൊപ്പമാണ് അണിയറപ്രവർത്തകർ പുതിയ തീയതി പ്രഖ്യാപിച്ചിരിക്കുന്നത്. വിഘ്‌നേഷ് ശിവൻ സംവിധാനം ചെയ്യുന്ന ഈ ചിത്രം തമിഴ്, മലയാളം, തെലുങ്ക്, കന്നഡ ഭാഷകളിൽ ഒരേസമയം പുറത്തിറങ്ങും.

ഭാവിക്കാലത്ത് നടക്കുന്ന ഒരു ഫാന്റസി റൊമാന്റിക് കോമഡി ചിത്രമാണിതെന്ന സൂചനയാണ് പുറത്തുവന്ന ടീസർ നൽകുന്നത്. അനിരുദ്ധ് രവിചന്ദർ സംഗീതം നൽകിയ ചിത്രത്തിലെ ‘ദീമാ’ എന്ന ഗാനം ഇതിനകം തന്നെ സോഷ്യൽ മീഡിയയിൽ തരംഗമായിക്കഴിഞ്ഞു. ക്രിതി ഷെട്ടി നായികയാകുന്ന ചിത്രത്തിൽ എസ്.ജെ. സൂര്യ, മിഷ്‌കിൻ, യോഗി ബാബു തുടങ്ങിയ വലിയ താരനിരയ്ക്കൊപ്പം നാം തമിഴർ കക്ഷി നേതാവ് സീമാനും ഒരു പ്രധാന വേഷത്തിൽ എത്തുന്നുണ്ട്. പ്രദീപിന്റെ കരിയറിലെ അടുത്ത 100 കോടി ചിത്രം കൂടിയായിരിക്കും ഇതെന്ന് ട്രേഡ് അനലിസ്റ്റുകൾ വിലയിരുത്തുന്നു.

Also Read: ‘ജനനായക’ന് വീണ്ടും കടമ്പ; രാഷ്ട്രീയ പരാമർശങ്ങളിൽ തീരുമാനം ഇനി തിരഞ്ഞെടുപ്പ് കമ്മീഷന്റേത്

നയൻതാരയുടെ റൗഡി പിക്ചേഴ്സും സെവൻ സ്ക്രീൻ സ്റ്റുഡിയോയും ചേർന്ന് വമ്പൻ ബജറ്റിലാണ് ഈ ചിത്രം നിർമ്മിക്കുന്നത്. ‘നാനും റൗഡി താൻ’, ‘കാതുവാകുല രണ്ട് കാതൽ’ എന്നീ ഹിറ്റുകൾക്ക് ശേഷം വിഘ്‌നേഷ് ശിവൻ ഒരുക്കുന്ന സിനിമയായതിനാൽ ആരാധകർക്ക് വലിയ പ്രതീക്ഷയാണുള്ളത്. ഗംഭീര വിഷ്വലുകളും പ്രദീപിന്റെ തനതായ ശൈലിയിലുള്ള പ്രകടനവും സിനിമയുടെ ഹൈലൈറ്റ് ആയിരിക്കുമെന്ന് ടീസർ ഉറപ്പുനൽകുന്നു.

The post പ്രദീപ് രംഗനാഥന്റെ ‘ലവ് ഇൻഷുറൻസ് കമ്പനി’ തീയേറ്ററുകളിലേക്ക്! appeared first on Express Kerala.