‘അജ:സുന്ദരി’ ചിത്രത്തിൻ്റെ പുതിയ പോസ്റ്റർ പുറത്ത്

ആഷിഖ് അബുവിന്റെ ഒപിഎം സിനിമാസ് നിർമ്മിക്കുന്ന പുതിയ ചിത്രം ‘അജ:സുന്ദരി’ റിലീസിന് ഒരുങ്ങുന്നു. ജോജു ജോർജ് നായകനാകുന്ന ചിത്രത്തിൽ ലിജോ മോളാണ് നായികയായി എത്തുന്നത്. ലിജോ മോളുടെ കഥാപാത്രത്തെ പരിചയപ്പെടുത്തുന്ന പുതിയ പോസ്റ്ററാണ് ഇപ്പോൾ അണിയറപ്രവർത്തകർ പുറത്തുവിട്ടിരിക്കുന്നത്. ‘ഇരട്ട’, ‘പണി’ എന്നീ ഹിറ്റ് ചിത്രങ്ങളുടെ എഡിറ്ററായിരുന്ന മനു ആന്റണി ആദ്യമായി സംവിധാനം ചെയ്യുന്ന ചിത്രമാണിത്. പ്രശാന്ത് മുരളി, ആർ.ജെ വിജിത എന്നിവരും ചിത്രത്തിൽ പ്രധാന വേഷങ്ങളിൽ എത്തുന്നു.

ചിത്രത്തിന്റെ പേരും മുൻപ് പുറത്തിറങ്ങിയ ഫസ്റ്റ് ലുക്ക് പോസ്റ്ററും സൂചിപ്പിക്കുന്നത് ഒരു ആടും ചിത്രത്തിലെ പ്രധാന കഥാപാത്രമാണെന്നാണ്. “സുന്ദരിയെ കാണ്മാനില്ല” എന്ന ടാഗ്‌ലൈനോടെ എത്തിയ ആദ്യ പോസ്റ്ററിൽ ഒരു ആടിനെ ചാക്കിലാക്കി ബസിൽ ഇരിക്കുന്ന ജോജു ജോർജിന്റെ കഥാപാത്രത്തെ കാണാമായിരുന്നു. മനു ആന്റണിയും ഗീതാർഥ എ.ആറും ചേർന്ന് രചന നിർവ്വഹിച്ച ഈ ചിത്രം ഗൗരവകരമായ പ്രമേയത്തിനൊപ്പം രസകരമായ നിമിഷങ്ങളും സമ്മാനിക്കുമെന്നാണ് പ്രതീക്ഷിക്കപ്പെടുന്നത്.

Also Read: രാഷ്ട്രീയത്തിലേക്കില്ലെന്ന് അനുശ്രീ! അറിയുന്ന പണി ചെയ്ത് പോകാനാണ് ഇഷ്ടമെന്ന് താരം, പ്രചരിക്കുന്ന വാർത്തകളിൽ സത്യമില്ല

മികച്ച സാങ്കേതിക നിരയാണ് ചിത്രത്തിന് പിന്നിൽ അണിനിരക്കുന്നത് എന്നത് ‘അജ:സുന്ദരി’യുടെ വലിയൊരു പ്രത്യേകതയാണ്. ‘റൈഫിൾ ക്ലബ്’, ‘ലൗലി’ എന്നീ ചിത്രങ്ങൾക്ക് ശേഷം ആഷിഖ് അബു തന്നെയാണ് ഈ ചിത്രത്തിനും ക്യാമറ ചലിപ്പിക്കുന്നത്. ‘മഞ്ഞുമ്മൽ ബോയ്സ്’ എന്ന ചിത്രത്തിലൂടെ ശ്രദ്ധേയനായ അജയൻ ചാലിശ്ശേരിയാണ് പ്രൊഡക്ഷൻ ഡിസൈനർ. ഡ്രംയുഗ സംഗീതം നൽകുന്ന ചിത്രത്തിന്റെ എഡിറ്റിംഗ് സംവിധായകൻ മനു ആന്റണി തന്നെയാണ് നിർവ്വഹിക്കുന്നത്. ചിത്രം ഉടൻ തന്നെ തീയേറ്ററുകളിലേക്ക് എത്തുമെന്നാണ് റിപ്പോർട്ടുകൾ.

The post ‘അജ:സുന്ദരി’ ചിത്രത്തിൻ്റെ പുതിയ പോസ്റ്റർ പുറത്ത് appeared first on Express Kerala.