എതിർ സ്ഥാനാർത്ഥിയോടും വോട്ട് ചോദിക്കും, എല്ലാ വോട്ടിനും വിലയുണ്ട്: പി.എം.എ. സലാം

ജനാധിപത്യ സംവിധാനത്തിൽ ഓരോ വോട്ടിനും വലിയ വിലയുണ്ടെന്നും മണ്ഡലത്തിലെ മുഴുവൻ വോട്ടർമാരോടും വോട്ട് അഭ്യർത്ഥിക്കുക എന്നത് സ്ഥാനാർത്ഥിയുടെ ഉത്തരവാദിത്തമാണെന്നും മുസ്ലിം ലീഗ് സംസ്ഥാന ജനറൽ സെക്രട്ടറി പി.എം.എ. സലാം. എസ്ഡിപിഐ വോട്ട് വേണ്ടെന്ന് പറയുമോ എന്ന ചോദ്യത്തോടായിരുന്നു അദ്ദേഹത്തിന്റെ പ്രതികരണം.

“ഞങ്ങളെ സംബന്ധിച്ചിടത്തോളം ഏതെങ്കിലും സംഘടനയുമായുള്ള ബന്ധമോ ധാരണയോ അല്ല പ്രധാനം. ഒരു മണ്ഡലത്തിലെ സ്ഥാനാർത്ഥി അവിടുത്തെ എല്ലാ വോട്ടർമാരെയും കാണാറുണ്ട്. അതിൽ എല്ലാ പാർട്ടിക്കാരും ഉണ്ടാകും. എതിർ സ്ഥാനാർത്ഥിയോട് പോലും വോട്ട് ചോദിക്കുന്നതാണ് ഞങ്ങളുടെ രീതി. അത് ഒരു ജനാധിപത്യ മര്യാദയാണ്” പി.എം.എ. സലാം പറഞ്ഞു. സംഘടനകളുമായി രാഷ്ട്രീയമായ നീക്കുപോക്കുകളില്ലെന്നും എന്നാൽ വോട്ടർ എന്ന നിലയിൽ ആരുടെയും വോട്ട് ചോദിക്കുന്നതിൽ തെറ്റില്ലെന്നും അദ്ദേഹം കൂട്ടിച്ചേർത്തു.

Also Read: പിണറായിക്ക് വാക്കിന് വിലയില്ല, വർഗീയതയെ പുണരുന്ന നിലപാട്: മുല്ലപ്പള്ളി രാമചന്ദ്രൻ

നേരത്തെ നേമത്തെ എൽഡിഎഫ് സ്ഥാനാർത്ഥി വി. ശിവൻകുട്ടിയും സമാനമായ പ്രതികരണം നടത്തിയിരുന്നു. ആരുടെയും വോട്ട് വേണ്ടെന്ന് വെക്കില്ലെന്നായിരുന്നു ശിവൻകുട്ടിയുടെ നിലപാട്. നേമത്ത് ശിവൻകുട്ടിയെ പിന്തുണയ്ക്കുമെന്ന് എസ്ഡിപിഐ പ്രഖ്യാപിച്ചതിന് പിന്നാലെ ഉയർന്ന ‘സിപിഎം-എസ്ഡിപിഐ ഡീൽ’ ആരോപണങ്ങൾക്കിടെയായിരുന്നു ഇത്.

അതേസമയം, എസ്ഡിപിഐ പിന്തുണയെക്കുറിച്ചുള്ള ചോദ്യങ്ങളിൽ നിന്ന് മുഖ്യമന്ത്രി പിണറായി വിജയൻ ഒഴിഞ്ഞുമാറി. വോട്ടിന് വേണ്ടി ഇടതുപക്ഷം അവസരവാദ നിലപാട് സ്വീകരിക്കില്ലെന്നും തത്വാധിഷ്ഠിത രാഷ്ട്രീയമാണ് തങ്ങളുടേതെന്നും മുഖ്യമന്ത്രി വ്യക്തമാക്കിയിരുന്നു. വർഗീയതയോട് വിട്ടുവീഴ്ചയില്ലാത്ത സമീപനമാണ് എൽഡിഎഫിന്റേതെന്നും അദ്ദേഹം ഓർമ്മിപ്പിച്ചു.

The post എതിർ സ്ഥാനാർത്ഥിയോടും വോട്ട് ചോദിക്കും, എല്ലാ വോട്ടിനും വിലയുണ്ട്: പി.എം.എ. സലാം appeared first on Express Kerala.