നാനി നിർമ്മാതാവാകുന്നു; ദുൽഖറും നസ്ലെനും നായകന്മാർ! സൗത്ത് ഇന്ത്യ കാത്തിരിക്കുന്ന വമ്പൻ പ്രോജക്റ്റുകൾ

അഭിനയ മികവിലൂടെയും നിർമ്മാണ വൈഭവത്തിലൂടെയും ശ്രദ്ധേയനായ തെലുങ്ക് താരം നാനി മലയാളത്തിലെ മുൻനിര താരങ്ങളുമായി കൈകോർക്കുന്നു. നാനിയുടെ നിർമ്മാണ കമ്പനിയായ ‘വോൾ പോസ്റ്റർ സിനിമ’യുടെ ബാനറിൽ ദുൽഖർ സൽമാൻ, നസ്ലെൻ എന്നിവരെ കേന്ദ്രകഥാപാത്രങ്ങളാക്കി രണ്ട് വമ്പൻ ചിത്രങ്ങളാണ് ഒരുങ്ങുന്നതെന്ന് തെലുങ്ക് മാധ്യമങ്ങൾ റിപ്പോർട്ട് ചെയ്യുന്നു.

‘ധൻഡോറ’ എന്ന ഹിറ്റ് ചിത്രത്തിന്റെ സംവിധായകൻ മുരളികാന്ത് ആണ് നസ്ലെൻ നായകനാകുന്ന ചിത്രം ഒരുക്കുന്നത്. നാനിയുടെ നിർമ്മാണത്തിൽ യുവതാരം നസ്ലെൻ എത്തുന്നതോടെ വലിയ പ്രതീക്ഷയിലാണ് ആരാധകർ. ‘കോർട്ട്’ എന്ന സിനിമയിലൂടെ ശ്രദ്ധേയനായ റാം ജഗദീഷ് സംവിധാനം ചെയ്യുന്ന ചിത്രത്തിലാണ് ദുൽഖർ സൽമാൻ നായകനാകുന്നത്. നാനിയും ദുൽഖറും തമ്മിലുള്ള സൗഹൃദം ഈ പ്രോജക്റ്റിലൂടെ ബിഗ് സ്‌ക്രീനിലെത്തുമ്പോൾ അത് സൗത്ത് ഇന്ത്യയിലുടനീളം തരംഗമാകുമെന്നാണ് വിലയിരുത്തൽ.

Also Read: ‘പ്രതിഛായ’ പ്രൊപ്പഗാണ്ട സിനിമയല്ല, പൈസ മുടക്കിയത് രാഷ്ട്രീയ കക്ഷിക്കുവേണ്ടിയുമല്ല; ബി. ഉണ്ണികൃഷ്ണൻ

ശ്രീകാന്ത് ഓഡല സംവിധാനം ചെയ്യുന്ന ‘ദി പാരഡൈസ്’ ആണ് നാനിയുടേതായി പുറത്തിറങ്ങാനുള്ള അടുത്ത ബിഗ് ബജറ്റ് ചിത്രം. ‘ദസറ’യ്ക്ക് ശേഷം ഇരുവരും ഒന്നിക്കുന്ന ഈ റോ ആക്ഷൻ ചിത്രം ഓഗസ്റ്റ് 21-ന് തിയേറ്ററുകളിലെത്തും. സിക്സ് പാക്ക് ഗെറ്റപ്പിൽ നാനി എത്തുന്ന ചിത്രത്തിന് സംഗീതം നൽകുന്നത് അനിരുദ്ധ് രവിചന്ദറാണ്.

ഓഗസ്റ്റ് 21-ന് ‘ദി പാരഡൈസ്’ റിലീസ് ചെയ്യുമ്പോൾ വലിയ മത്സരമാണ് കാത്തിരിക്കുന്നത്. ദുൽഖർ സൽമാൻ ചിത്രം ഐ ആം ഗെയിം, രജനികാന്ത് ചിത്രം ജയിലർ 2 എന്നീ സിനിമകൾക്ക് ഒപ്പമാണ് ദി പാരഡൈസ് റിലീസിനെത്തുന്നത്. മലയാളം, തെലുങ്ക്, തമിഴ്, ഹിന്ദി, സ്പാനിഷ് ഭാഷകളിൽ പുറത്തിറങ്ങുന്ന ‘ദി പാരഡൈസ്’, കേരളത്തിലും തമിഴ്നാട്ടിലും ഈ വമ്പൻ ചിത്രങ്ങളുമായി നേരിട്ട് ഏറ്റുമുട്ടും. നാനിയുടെ കരിയറിലെ തന്നെ ഏറ്റവും ചിലവേറിയ ചിത്രമായാണ് ‘ദി പാരഡൈസ്’ ഒരുങ്ങുന്നത്. അനിരുദ്ധ് രവിചന്ദറാണ് സിനിമയുടെ സംഗീതം നിർവഹിക്കുന്നത്. നവീൻ നൂലിയാണ് എഡിറ്റിംഗ്.

The post നാനി നിർമ്മാതാവാകുന്നു; ദുൽഖറും നസ്ലെനും നായകന്മാർ! സൗത്ത് ഇന്ത്യ കാത്തിരിക്കുന്ന വമ്പൻ പ്രോജക്റ്റുകൾ appeared first on Express Kerala.