അത്താഴം നേരത്തെയാക്കാം, ആരോഗ്യം കാക്കാം; സമയക്രമത്തിലെ മാറ്റം നൽകുന്ന ഗുണങ്ങൾ വെളിപ്പെടുത്തി വിദഗ്ധർ

ആരോഗ്യകരമായ ശരീരം നിലനിർത്താൻ ഭക്ഷണക്രമത്തിൽ വരുത്തുന്ന മാറ്റങ്ങൾക്കൊപ്പം തന്നെ അത് കഴിക്കുന്ന സമയത്തിനും വലിയ പ്രാധാന്യമുണ്ടെന്ന് കാലിഫോർണിയയിലെ ഗ്യാസ്ട്രോഎൻട്രോളജിസ്റ്റ് ഡോ. സൗരഭ് സേഥി വ്യക്തമാക്കുന്നു. പലരും പോഷകസമൃദ്ധമായ ഭക്ഷണം കഴിക്കാൻ ശ്രദ്ധിക്കാറുണ്ടെങ്കിലും സമയത്തിന്റെ കാര്യത്തിൽ വേണ്ടത്ര ജാഗ്രത പുലർത്താറില്ല. രാത്രി വൈകി ഭക്ഷണം കഴിക്കുന്നത് ശരീരത്തിന്റെ ഇൻസുലിൻ സെൻസിറ്റിവിറ്റി മുപ്പത് മുതൽ നാൽപത് ശതമാനം വരെ കുറയ്ക്കുമെന്നും കൊഴുപ്പിനെ എരിച്ചു കളയുന്ന പ്രക്രിയയെ മന്ദഗതിയിലാക്കുമെന്നും അദ്ദേഹം ചൂണ്ടിക്കാട്ടുന്നു.

രാത്രി വൈകി ഭക്ഷണം കഴിക്കുമ്പോൾ ശരീരം വിശ്രമിക്കേണ്ട സമയത്ത് ദഹനപ്രക്രിയ നടക്കുന്നത് ഉറക്കത്തിന്റെ ഹോർമോണായ മെലാടോണിനെ പ്രതികൂലമായി ബാധിക്കും. ഇതുകൊണ്ടാണ് എട്ട് മണിക്കൂർ ഉറങ്ങിയിട്ടും അടുത്ത ദിവസം രാവിലെ എഴുന്നേൽക്കുമ്പോൾ അമിതമായ ക്ഷീണവും വയർ വീർത്തതുപോലെയുള്ള അസ്വസ്ഥതകളും അനുഭവപ്പെടുന്നത്. എന്നാൽ വൈകുന്നേരം ഏഴ് മണിക്ക് മുൻപായി അത്താഴം കഴിക്കുന്നവരിൽ രാത്രികാലത്തെ ഗ്ലൂക്കോസ് നില പതിനഞ്ച് ശതമാനത്തോളം കുറയുകയും ഇൻസുലിൻ പ്രതിരോധം മെച്ചപ്പെടുകയും ചെയ്യുന്നു. പ്രീ ഡയബറ്റിസ്, ഡയബറ്റിസ്, ഫാറ്റി ലിവർ തുടങ്ങിയ പ്രശ്നങ്ങളുള്ളവർക്ക് രക്തത്തിലെ പഞ്ചസാരയുടെ അളവ് നിയന്ത്രിക്കാൻ നേരത്തെയുള്ള അത്താഴം ഏറെ സഹായിക്കും.

Also Read:കടലാഴങ്ങളിൽ സൂര്യൻ അലിയുമ്പോൾ; ഇന്ത്യയിൽ അസ്തമയക്കാഴ്ചയ്ക്ക് പേരുകേട്ട ബീച്ചുകൾ

ആരോഗ്യകരമായ ജീവിതശൈലിക്കായി ചില നിർദ്ദേശങ്ങളും അദ്ദേഹം പങ്കുവെക്കുന്നുണ്ട്. രാവിലെ ഒൻപത് മണിക്ക് മുൻപായി പ്രഭാതഭക്ഷണവും ഒന്നരയ്ക്ക് മുൻപ് ഉച്ചഭക്ഷണവും രാത്രി എട്ടരയ്ക്ക് മുൻപെങ്കിലും അത്താഴവും കഴിക്കാൻ ശ്രമിക്കണം. ഉറങ്ങുന്നതിന് കുറഞ്ഞത് രണ്ട് മണിക്കൂർ മുൻപെങ്കിലും ഭക്ഷണം പൂർത്തിയാക്കുന്നത് ദഹനം സുഗമമാക്കും. ടിവിയോ മൊബൈലോ നോക്കി ഭക്ഷണം കഴിക്കുന്ന ശീലം ഒഴിവാക്കി, നന്നായി ചവച്ചരച്ച് സാവധാനം കഴിക്കുന്നത് അമിതമായി ആഹാരം ഉള്ളിലെത്തുന്നത് തടയും. വറുത്ത പലഹാരങ്ങൾക്ക് പകരം പഴങ്ങളും നട്സുകളും സ്നാക്സായി ഉപയോഗിക്കുന്നതും ധാരാളം വെള്ളം കുടിക്കുന്നതും ആരോഗ്യകരമായ ശരീരഭാരം നിലനിർത്താൻ അത്യന്താപേക്ഷിതമാണെന്നും ഡോക്ടർ കൂട്ടിച്ചേർക്കുന്നു.

NB: ഈ വാർത്തയിൽ ഉപയോഗിച്ചിരിക്കുന്ന ചിത്രം പ്രതീകാത്മകമാണ്. (Generated by AI)

The post അത്താഴം നേരത്തെയാക്കാം, ആരോഗ്യം കാക്കാം; സമയക്രമത്തിലെ മാറ്റം നൽകുന്ന ഗുണങ്ങൾ വെളിപ്പെടുത്തി വിദഗ്ധർ appeared first on Express Kerala.