ഇത്തവണ പൊങ്കൽ സമ്മാനം 3,000 കടക്കുമോ? റേഷൻ കാർഡ് ഉടമകൾക്ക് ലോട്ടറി; 5,000 രൂപ വേണമെന്ന് ഇ.പി.എസ്

ചെന്നൈ: തമിഴ്‌നാടിന്റെ ദേശീയ ഉത്സവമായ പൊങ്കൽ വരാനിരിക്കെ, റേഷൻ കാർഡ് ഉടമകൾക്കുള്ള സമ്മാനപ്പൊതിയെച്ചൊല്ലി സംസ്ഥാനത്ത് രാഷ്ട്രീയപ്പോര് കടുക്കുന്നു. ഇത്തവണത്തെ പൊങ്കൽ സമ്മാന പാക്കേജിനൊപ്പം ഓരോ കുടുംബത്തിനും 5,000 രൂപ വീതം പണമായി നൽകണമെന്ന് മുൻ മുഖ്യമന്ത്രിയും പ്രതിപക്ഷ നേതാവുമായ എടപ്പാടി പളനിസ്വാമി ആവശ്യപ്പെട്ടതോടെയാണ് ചർച്ചകൾ ചൂടുപിടിച്ചത്.

പണം നൽകാത്തതിൽ പ്രതിഷേധം; ഇത്തവണ മാറ്റം വരുമോ?

കഴിഞ്ഞ വർഷം അരിയും പഞ്ചസാരയും കരിമ്പും അടങ്ങിയ പാക്കേജ് നൽകിയെങ്കിലും പണം നൽകാതിരുന്നത് വ്യാപക വിമർശനത്തിന് ഇടയാക്കിയിരുന്നു. 2021-ൽ എ.ഐ.എ.ഡി.എം.കെ ഭരണകാലത്ത് 2,500 രൂപ വീതം നൽകിയതാണ് ഇതുവരെയുള്ളതിൽ ഏറ്റവും ഉയർന്ന തുക. ഡി.എം.കെ സർക്കാർ മുൻപ് 1,000 രൂപ വീതം നൽകിയിരുന്നു. എന്നാൽ സാമ്പത്തിക പ്രതിസന്ധി ചൂണ്ടിക്കാട്ടിയാണ് കഴിഞ്ഞ തവണ പണം ഒഴിവാക്കിയത്.

Also Read: ശ്വാസം മുട്ടി തലസ്ഥാനം; കനത്ത പുകമഞ്ഞിൽ മൂടി ഡൽഹി! ദ്വാരകയിൽ ശ്വസിക്കുന്നത് വിഷവായു

തിരഞ്ഞെടുപ്പ് അടുക്കുന്നു; വാരിക്കോരി നൽകാൻ സ്റ്റാലിൻ സർക്കാർ?

അടുത്ത വർഷം നിയമസഭാ തിരഞ്ഞെടുപ്പ് നടക്കാനിരിക്കുന്ന സാഹചര്യത്തിൽ, ജനരോഷം തണുപ്പിക്കാൻ വൻതുക തന്നെ പണമായി നൽകാൻ സർക്കാർ ആലോചിക്കുന്നതായി റിപ്പോർട്ടുകളുണ്ട്. എല്ലാ റേഷൻ കാർഡ് ഉടമകൾക്കും 5,000 രൂപ വീതം നൽകണമെന്ന് ചില മുതിർന്ന മന്ത്രിമാർ ഉദ്യോഗസ്ഥരോട് ആവശ്യപ്പെട്ടതായാണ് വിവരം. എന്നാൽ, സ്ത്രീകൾക്കായുള്ള പ്രതിമാസ സഹായ പദ്ധതി ഉൾപ്പെടെയുള്ളവ നടപ്പിലാക്കുന്നതിനാൽ സംസ്ഥാന ഖജനാവ് നേരിടുന്ന കടുത്ത സാമ്പത്തിക പരിമിതി സർക്കാരിന് മുന്നിൽ വലിയ വെല്ലുവിളിയാണ്.
The post ഇത്തവണ പൊങ്കൽ സമ്മാനം 3,000 കടക്കുമോ? റേഷൻ കാർഡ് ഉടമകൾക്ക് ലോട്ടറി; 5,000 രൂപ വേണമെന്ന് ഇ.പി.എസ് appeared first on Express Kerala.