വേനൽക്കാലത്തെ കഠിനമായ ചൂടിൽ നിന്ന് ശരീരത്തിന് കുളിർമയും ഉന്മേഷവും നൽകാൻ സഹായിക്കുന്ന മികച്ചൊരു ആരോഗ്യപാനീയമാണ് റാഗി ചാസ്. പോഷകസമൃദ്ധമായ റാഗിയും ദഹനത്തിന് ഉത്തമമായ തൈരും ചേർത്താണ് ഇത് തയ്യാറാക്കുന്നത്. കാൽസ്യം, ഇരുമ്പ്, നാരുകൾ എന്നിവയാൽ സമ്പന്നമായ റാഗി എല്ലുകളുടെ ആരോഗ്യത്തിനും പ്രമേഹ നിയന്ത്രണത്തിനും സഹായിക്കുമ്പോൾ, മോര് ശരീരത്തിലെ ചൂട് കുറയ്ക്കാനും നിർജ്ജലീകരണം തടയാനും സഹായിക്കുന്നു. ആരോഗ്യകരമായ ഭക്ഷണശീലം ആഗ്രഹിക്കുന്നവർക്കും വേനൽക്കാല അസ്വസ്ഥതകൾ അകറ്റാൻ ആഗ്രഹിക്കുന്നവർക്കും ഒരുപോലെ ഔഷധതുല്യമായ ഈ പാനീയം ഉത്തമമായ ഒരു തിരഞ്ഞെടുപ്പാണ്.
ചേരുവകൾ
റാഗി- 2 ടേബിൾസ്പൂൺ
വെള്ളം- 1/2 കപ്പ്
തൈര്
ഉപ്പ്
നെയ്യ്
ജീരകം
കടുക്
കറിവേപ്പില
മല്ലിയില
തയ്യാറാക്കുന്ന വിധം
ഒരു ബൗളിലേയ്ക്ക് രണ്ട് ടേബിൾസ്പൂൺ റാഗിപ്പൊടിയെടുക്കാം. അതിലേയ്ക്ക് അര കപ്പ് വെള്ളം ഒഴിച്ച് കട്ടകളില്ലാതെ ഇളക്കി യോജിപ്പിക്കാം. ഇത് അടുപ്പിൽ വച്ച് തിളപ്പിക്കാം. റാഗി കുറുകി വരുമ്പോൾ തീ കുറയ്ക്കാം. ശേഷം അടുപ്പണച്ച് റാഗി മിശ്രിതം തണുക്കാൻ മാറ്റി വയ്ക്കാം. ഒരു ബൗളിലേയ്ക്ക് തൈരെടുക്കാം. അതിലേയ്ക്ക് വെള്ളമൊഴിച്ച് ആവശ്യത്തിന് ഉപ്പ് ചേർത്തിളക്കി യോജിപ്പിക്കാം. ഇതിലേയ്ക്ക് റാഗി ചേർത്ത് യോജിപ്പിക്കാം. അടികട്ടിയുള്ള ഒരു പാത്രം അടുപ്പിൽ വച്ച് അൽപം നെയ്യ് ഒഴിക്കാം. നെയ്യ് ചുടായി വരുമ്പോൾ ജീരകം, കടുക്, കറിവേപ്പില എന്നിവ ചേർത്തു വറുക്കാം. ഈ താളിപ്പ് റാഗി-തൈര് മിശ്രിത്തിലേയ്ക്കു ചേർത്തിളക്കി യോജിപ്പിക്കാം. മുകളിൽ കുറച്ച് മല്ലിയില കൂടി ചേർത്ത് വിളമ്പാം.
The post ആരോഗ്യവും തണുപ്പും ഒന്നിച്ച്! വേനൽക്കാലത്ത് ശീലമാക്കാം പോഷകഗുണമേറിയ റാഗി പാനീയം appeared first on Express Kerala.
