സമസ്ത പൊതുപരീക്ഷകൾക്ക് ഒമാനിൽ തുടക്കം; 24 സെന്ററുകളിലായി 407 വിദ്യാർത്ഥികൾ പരീക്ഷ എഴുതുന്നു

മസ്കത്ത്: സമസ്ത കേരള ഇസ്‌ലാം മത വിദ്യാഭ്യാസ ബോർഡിന്റെ സ്കൂൾ വർഷ സിലബസ് പ്രകാരമുള്ള മദ്രസ പൊതുപരീക്ഷകൾക്ക് ഒമാനിൽ ഉജ്ജ്വല തുടക്കം. ഇന്നും നാളെയുമായി നടക്കുന്ന പരീക്ഷകളിൽ മസ്‌കത്ത് റെയിഞ്ചിലെ 35 മദ്രസകളിൽ 32 മദ്രസകളിൽ നിന്നുള്ള വിദ്യാർത്ഥികളാണ് പങ്കെടുക്കുന്നത്. 5, 7, 10, 12 ക്ലാസുകളിലായി ആകെ 407 വിദ്യാർത്ഥികൾ 24 പരീക്ഷാ സെന്ററുകളിലായി പരീക്ഷ എഴുതുന്നുണ്ട്.

വ്യത്യസ്ത സമയക്രമങ്ങളിലായി ക്രമീകരിച്ചിരിക്കുന്ന പരീക്ഷകളിൽ ഇന്ന് രണ്ട് വിഷയങ്ങളിലും, നാളെ മൂന്ന് വിഷയങ്ങളിലുമാണ് മൂല്യനിർണ്ണയം നടക്കുക. പരീക്ഷാ നടപടികൾ സുതാര്യമായും കൃത്യമായും നിയന്ത്രിക്കുന്നതിനായി പ്രഗത്ഭരായ 28 സൂപ്പർവൈസർമാരെയാണ് പ്രത്യേകമായി നിയോഗിച്ചിട്ടുള്ളത്. പരീക്ഷാ നടത്തിപ്പിന് മുന്നോടിയായി സൂപ്പർവൈസർമാർക്കായി വിപുലമായ പരിശീലന ക്യാമ്പും സംഘടിപ്പിച്ചിരുന്നു. പരിശീലന ക്ലാസിന്റെ ഉദ്ഘാടനം എസ്.ഐ.സി ഒമാൻ നാഷണൽ കമ്മിറ്റി പ്രസിഡൻ്റ് അൻവർ ഹാജി നിർവ്വഹിച്ചു.

Also Read: സൗദിക്ക് നേരെ ഡ്രോൺ ആക്രമണം; 14 എണ്ണം തകർത്തെന്ന് പ്രതിരോധ മന്ത്രാലയം

മസ്കത്ത് സുന്നി സെന്ററിന് കീഴിൽ പ്രവർത്തിക്കുന്ന മമ്പഹുൽ ഹുദാ മദ്രസ്സയിൽ ഇത്തവണ അറുപതോളം കുട്ടികളാണ് പരീക്ഷ എഴുതുന്നത്. മദ്രസ്സയിലെത്തിയ പരീക്ഷാർത്ഥികൾക്ക് അധ്യാപകരും സുന്നി സെന്റർ ഭാരവാഹികളും ചേർന്ന് ഊഷ്മളമായ സ്വീകരണവും ആശംസകളും നൽകി. മുൻ വർഷങ്ങളിലേതുപോലെ ഇത്തവണയും മികച്ച വിജയം കുട്ടികൾ കൈവരിക്കുമെന്ന ആത്മവിശ്വാസത്തിലാണ് മദ്രസാ അധികൃതർ.

രണ്ട് ദിവസത്തെ പരീക്ഷാ നടപടികൾക്ക് ശേഷം ഏപ്രിൽ 5-ഓടെ ഉത്തരപ്പേപ്പറുകൾ മൂല്യനിർണയത്തിനായി ചേളാരിയിലുള്ള സമസ്താലയത്തിലേക്ക് അയക്കും. പരീക്ഷാ ഫലം ഈ മാസാവസാനത്തോടെ ഔദ്യോഗികമായി പ്രഖ്യാപിക്കുമെന്ന് ബന്ധപ്പെട്ട അധികൃതർ അറിയിച്ചു.

NB: ഈ വാർത്തയിൽ ഉപയോഗിച്ചിരിക്കുന്ന ചിത്രം പ്രതീകാത്മകമാണ്. (Generated by AI)

The post സമസ്ത പൊതുപരീക്ഷകൾക്ക് ഒമാനിൽ തുടക്കം; 24 സെന്ററുകളിലായി 407 വിദ്യാർത്ഥികൾ പരീക്ഷ എഴുതുന്നു appeared first on Express Kerala.