ഹൈദരാബാദിൽ നടന്ന ആവേശകരമായ പോരാട്ടത്തിൽ സൺറൈസേഴ്സ് ഹൈദരാബാദിനെ അഞ്ച് വിക്കറ്റിന് തകർത്ത് ലക്നൗ സൂപ്പർ ജയന്റ്സ് സീസണിലെ ആദ്യ വിജയം സ്വന്തമാക്കി. ഹൈദരാബാദ് ഉയർത്തിയ 157 റൺസ് വിജയലക്ഷ്യം പിന്തുടർന്ന ലക്നൗ, ഒരു പന്ത് ബാക്കിനിൽക്കെ അഞ്ച് വിക്കറ്റ് നഷ്ടത്തിൽ ലക്ഷ്യത്തിലെത്തി. 50 പന്തിൽ 68 റൺസുമായി പുറത്താകാതെ നിന്ന് ഇന്നിംഗ്സിനെ മുന്നിൽ നിന്ന് നയിച്ച ക്യാപ്റ്റൻ റിഷഭ് പന്തിന്റെ പ്രകടനമാണ് ലക്നൗവിന് കരുത്തായത്. ഓപ്പണർ ഏയ്ഡൻ മാർക്രം 45 റൺസെടുത്ത് മികച്ച തുടക്കം നൽകിയതും വിജയത്തിൽ നിർണ്ണായകമായി.
നേരത്തെ ടോസ് നഷ്ടപ്പെട്ട് ബാറ്റിംഗിനിറങ്ങിയ ഹൈദരാബാദിന്റെ തുടക്കം തകർച്ചയോടെയായിരുന്നു. എട്ടാം ഓവറിൽ 26 റൺസിന് നാല് വിക്കറ്റ് എന്ന നിലയിൽ പതറിയ ടീമിനെ ഹെൻറിച്ച് ക്ലാസനും (62) നിതീഷ് കുമാർ റെഡ്ഡിയും (56) ചേർന്നാണ് രക്ഷിച്ചത്. അഞ്ചാം വിക്കറ്റിൽ ഇരുവരും ചേർന്നുണ്ടാക്കിയ 116 റൺസിന്റെ കൂട്ടുകെട്ടാണ് ഹൈദരാബാദിനെ 156 റൺസെന്ന ഭേദപ്പെട്ട സ്കോറിലെത്തിച്ചത്. അഭിഷേക് ശർമ്മ, ട്രാവിസ് ഹെഡ്, ക്യാപ്റ്റൻ ഇഷാൻ കിഷൻ എന്നിവർ ബാറ്റിംഗിൽ പരാജയപ്പെട്ടത് അവർക്ക് തിരിച്ചടിയായി. ലക്നൗവിനായി മുഹമ്മദ് ഷമി, ആവേശ് ഖാൻ, പ്രിൻസ് യാദവ് എന്നിവർ രണ്ട് വിക്കറ്റ് വീതം വീഴ്ത്തി.
മറുപടി ബാറ്റിംഗിൽ ലക്നൗവിനായി മാർക്രവും മിച്ചൽ മാർഷും ചേർന്ന് മികച്ച തുടക്കം നൽകിയെങ്കിലും കൃത്യമായ ഇടവേളകളിൽ വിക്കറ്റുകൾ വീഴ്ത്തി ഹൈദരാബാദ് സമ്മർദ്ദം ചെലുത്തി. ബദോനിയും പുരാനും നിരാശപ്പെടുത്തിയതോടെ ഒരു ഘട്ടത്തിൽ ലക്നൗ പതറിയെങ്കിലും ഒരറ്റത്ത് ഉറച്ചുനിന്ന റിഷഭ് പന്ത് ടീമിനെ വിജയത്തിലേക്ക് നയിച്ചു. ഹൈദരാബാദിനായി ഹർഷ് ദുബെ രണ്ട് വിക്കറ്റുകൾ വീഴ്ത്തി പൊരുതിയെങ്കിലും അവസാന ഓവറിൽ മത്സരം ലക്നൗ കൈപ്പിടിയിലൊതുക്കുകയായിരുന്നു.
The post റിഷഭ് പന്തിന്റെ ക്യാപ്റ്റൻ ഇന്നിംഗ്സ്; സൺറൈസേഴ്സിനെ വീഴ്ത്തി ലക്നൗവിന് ആദ്യ ജയം appeared first on Express Kerala.
