കാസർകോട്: ഫ്രൈഡ് ചിക്കൻ വിളമ്പാൻ വൈകിയെന്നാരോപിച്ച് കാസർകോട് തൃക്കരിപ്പൂരിലെ പോഗോ ഹോട്ടലിന് നേരെ യുവാക്കളുടെ ക്രൂരമായ ആക്രമണം. പുതുവത്സരത്തലേന്ന് രാത്രി നടന്ന സംഭവത്തിൽ പയ്യന്നൂർ സ്വദേശികളായ യുവാക്കളാണ് ഹോട്ടൽ തല്ലിത്തകർത്തത്. ഫ്രൈഡ് ചിക്കൻ ഓർഡർ ചെയ്ത യുവാക്കളോട് 20 മിനിറ്റ് കാത്തിരിക്കണമെന്ന് ജീവനക്കാർ ആവശ്യപ്പെട്ടിരുന്നു. എന്നാൽ 15 മിനിറ്റ് കഴിഞ്ഞപ്പോഴേക്കും ക്ഷമകെട്ട യുവാക്കൾ ജീവനക്കാരുമായി വാക്കുതർക്കത്തിലേർപ്പെടുകയും സംഘർഷം സൃഷ്ടിക്കുകയുമായിരുന്നു. ഹോട്ടലുടമ വിവരമറിയിച്ചതിനെ തുടർന്ന് സ്ഥലത്തെത്തിയ പോലീസ് പ്രതികളെ കസ്റ്റഡിയിലെടുത്തെങ്കിലും പിന്നീട് വിട്ടയച്ചു. പോലീസ് സ്റ്റേഷനിൽ നിന്നിറങ്ങിയ സംഘം വീണ്ടും ഹോട്ടലിലെത്തി അക്രമം അഴിച്ചുവിടുകയായിരുന്നു എന്നാണ് ഉടമയുടെ പരാതി. സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചു.
The post തൃക്കരിപ്പൂരിൽ ഫ്രൈഡ് ചിക്കൻ വൈകിയതിന് ഹോട്ടൽ അടിച്ചുതകർത്ത് യുവാക്കൾ appeared first on Express Kerala.
