കെ.സി.എൽ മൂന്നാം സീസൺ: ബോണ്ടിങ് സെഷനായി ആലപ്പി റിപ്പിൾസ് കൊല്ലങ്കോട്ട്; അക്കാദമി കുട്ടികൾക്ക് പ്രചോദനമായി താരങ്ങൾ | Alleppey Ripples Kollengode visit

പാലക്കാട്: കേരള ക്രിക്കറ്റ് ലീഗിന്റെ (KCL) മൂന്നാം സീസണിന് മുന്നോടിയായി ആലപ്പി റിപ്പിൾസ് ടീം അംഗങ്ങൾ ടീം ബോണ്ടിങ് സെഷന്റെ ഭാഗമായി പാലക്കാട് കൊല്ലങ്കോട് സന്ദർശിച്ചു (Alleppey Ripples Kollengode visit). ടീം നായകൻ സച്ചിൻ ബേബി, വൈസ് ക്യാപ്റ്റൻ മുഹമ്മദ് അസ്ഹറുദ്ദീൻ, മുഖ്യപരിശീലകൻ നിഖിലേഷ് സുരേന്ദ്രൻ എന്നിവരുടെ നേതൃത്വത്തിൽ കളിക്കാരും കോച്ചിങ് സ്റ്റാഫും അടങ്ങുന്ന സമ്പൂർണ്ണ സംഘമാണ് കൊല്ലങ്കോട്ടെത്തിയത്. മലനിരകളും പച്ചപ്പും നിറഞ്ഞ കൊല്ലങ്കോടിന്റെ സ്വാഭാവിക മനോഹാരിത കളിക്കാർക്ക് വരും മത്സരങ്ങൾക്കായുള്ള മികച്ച മാനസിക ഉന്മേഷവും ഊർജ്ജവും പകർന്നു നൽകി.

തുടർന്ന്, ആലപ്പി റിപ്പിൾസ് ടീം ഡോക്ടറായ ഡോ. ആബിന്ദ് എസ്. ദേവിന്റെ ഉടമസ്ഥതയിലുള്ള ‘ഗ്രിറ്റ് സ്പോർട്സ് ഹബ്ബ്’ (Grit Sports Hub) അക്കാദമി സന്ദർശിച്ച ടീം അംഗങ്ങൾ അവിടെ പരിശീലനം നടത്തുന്ന കൊച്ചു കൂട്ടുകാരുമായി സമയം ചെലവഴിച്ചു. പ്രൊഫഷണൽ ക്രിക്കറ്റിലെ അനുഭവങ്ങൾ, സമ്മർദ്ദ ഘട്ടങ്ങളെ അതിജീവിക്കാനുള്ള തന്ത്രങ്ങൾ, സാങ്കേതിക മികവ് എന്നിവ മുതിർന്ന താരങ്ങൾ കുട്ടിത്താരങ്ങൾക്ക് വിശദീകരിച്ചു നൽകി. പ്രമുഖ കളിക്കാരെ നേരിൽ കാണാനും സംസാരിക്കാനും സാധിച്ചത് കുട്ടികൾക്ക് വലിയ പ്രചോദനവും അപൂർവ്വ അനുഭവവുമാണെന്ന് ഗ്രിറ്റ് സ്പോർട്സ് അക്കാദമി കോച്ച് ഗുരു മാധവ് വ്യക്തമാക്കി.

വരുന്ന കെ.സി.എൽ മൂന്നാം സീസണിൽ കന്നി കിരീടം സ്വന്തമാക്കുകയെന്ന ഉറച്ച ലക്ഷ്യത്തോടെയാണ് ആലപ്പി റിപ്പിൾസ് ഇത്തവണ മത്സരത്തിനിറങ്ങുന്നത്. ജലജ് സക്സേന, റെക്കോർഡ് തുകയ്ക്ക് ടീമിലെത്തിയ സിബിൻ ഗിരീഷ് തുടങ്ങിയ പ്രമുഖ താരങ്ങളും യുവനിരയും ഉൾപ്പെടുന്ന കരുത്തുറ്റ സ്ക്വാഡാണ് ടീമിന്റെ പ്രതീക്ഷ.

Story Summary:
Ahead of the Kerala Cricket League (KCL) Season 3, the Alleppey Ripples squad, led by Sachin Baby and Mohammed Azharuddeen, visited Kollengode for a team bonding session and interacted with young players at Grit Sports Hub.