സൂര്യനിൽ നിന്ന് അകന്നു! പ്ലൂട്ടോയുടെ അന്തരീക്ഷം തണുത്തുറഞ്ഞ് ചുരുങ്ങുന്നതായി കണ്ടെത്തൽ

സൂര്യനിൽനിന്ന് ക്രമേണ അകലേക്ക് നീങ്ങിക്കൊണ്ടിരിക്കുന്ന കുള്ളൻ ഗ്രഹമായ പ്ലൂട്ടോയുടെ അന്തരീക്ഷം തണുത്തുറഞ്ഞ് ചുരുങ്ങുന്നതായി ശാസ്ത്രജ്ഞർ കണ്ടെത്തി. അരിസോണയിലെ പ്ലാനറ്ററി സയൻസ് ഇൻസ്റ്റിറ്റ്യൂട്ടിലെ അമാൻഡ സിക്കാഫൂസിന്റെ നേതൃത്വത്തിലുള്ള ഗവേഷക സംഘമാണ് ഈ വിവരങ്ങൾ പുറത്തുവിട്ടത്. പഠന റിപ്പോർട്ട് ദി പ്ലാനറ്ററി സയൻസ് ജേണലിൽ പ്രസിദ്ധീകരിച്ചിട്ടുണ്ട്.

2017 മുതൽ 2023 വരെയുള്ള കാലയളവിൽ പ്ലൂട്ടോ ദൂരെയുള്ള നക്ഷത്രങ്ങൾക്ക് മുന്നിലൂടെ കടന്നുപോയപ്പോൾ നടത്തിയ 10 പരോക്ഷ നിരീക്ഷണങ്ങളിൽ നിന്നാണ് വിവരങ്ങൾ ശേഖരിച്ചത്. 2015 മുതൽ 2021 പകുതി വരെ അന്തരീക്ഷമർദ്ദത്തിൽ വലിയ മാറ്റമില്ലായിരുന്നെങ്കിലും, 2021 പകുതിക്ക് ശേഷം മർദ്ദം 16 ശതമാനം കുറഞ്ഞതായി രേഖപ്പെടുത്തി. പ്ലൂട്ടോയിലെ പ്രധാന വാതകമായ നൈട്രജൻ, താപനില കുറയുന്നതോടെ തണുത്തുറഞ്ഞ് മഞ്ഞായി ഉപരിതലത്തിൽ അടിഞ്ഞുകൂടുകയാണ്. ഉപരിതല താപനില –230°C (-382°F) വരെ താഴുന്നു. 248 വർഷം നീളുന്ന ഭ്രമണപഥത്തിൽ 1989-ൽ സൂര്യനോട് ഏറ്റവും അടുത്തായിരുന്ന പ്ലൂട്ടോ, ഇപ്പോൾ തുടർച്ചയായി സൂര്യനിൽനിന്ന് അകലുകയാണ്. 2114-ഓടെ പ്ലൂട്ടോ സൂര്യനിൽനിന്ന് ഏറ്റവും അകലെയുള്ള സ്ഥാനത്ത് (ഏകദേശം 7.3 ബില്യൺ കി.മീ) എത്തും.

Also Read: റീഫണ്ട് ആയോ? ഇനി ക്ലോഡിനോട് ചോദിക്കാം; പേടിഎമ്മിൽ ആന്ത്രോപിക് ക്ലോഡ് എഐ എത്തി!

സൂര്യനിൽനിന്ന് ഏറ്റവും അകലെയെത്തുമ്പോഴും പ്ലൂട്ടോയുടെ നേർത്ത അന്തരീക്ഷം പൂർണ്ണമായി അപ്രത്യക്ഷമാകില്ലെന്നാണ് വിലയിരുത്തൽ. പിന്നീട് സൂര്യനിലേക്ക് വീണ്ടും അടുത്ത് തുടങ്ങുമ്പോൾ, ചൂടേറ്റ് ഉപരിതലത്തിലെ നൈട്രജൻ മഞ്ഞ് വാതകമായി മാറി അന്തരീക്ഷം വീണ്ടും ശക്തമാകും. 2015-ൽ നാസയുടെ ന്യൂ ഹൊറൈസൺസ് ദൗത്യം പ്ലൂട്ടോയെ കടന്നുപോയതിനു ശേഷം, ഭൂമിയിൽ നിന്നുള്ള നക്ഷത്ര മറയൽ നിരീക്ഷണങ്ങളിലൂടെ മാത്രമാണ് ഈ മാറ്റങ്ങൾ ശാസ്ത്രജ്ഞർ മനസ്സിലാക്കുന്നത്.

NB: ഈ വാർത്തയിൽ ഉപയോഗിച്ചിരിക്കുന്ന ചിത്രം പ്രതീകാത്മകമാണ്. (AI SOURCES)

The post സൂര്യനിൽ നിന്ന് അകന്നു! പ്ലൂട്ടോയുടെ അന്തരീക്ഷം തണുത്തുറഞ്ഞ് ചുരുങ്ങുന്നതായി കണ്ടെത്തൽ appeared first on Express Kerala.