‘രാഹുൽ ഗാന്ധി പാർലമെന്റിനെ ബന്ദിയാക്കുന്നു’: പ്രക്ഷുബ്ധമായി പാർലമെൻ്റ്, ഇരുസഭകളും നാളത്തേക്ക് പിരിഞ്ഞു; ട്രൈബ്യൂണൽസ് റീഫോംസ് ബിൽ 2026 പാസാക്കി

ന്യൂഡൽഹി: പാർലമെന്റിന്റെ ഇരുസഭകളിലും നീറ്റ് (NEET) പരീക്ഷാ ക്രമക്കേട് ഉൾപ്പെടെയുള്ള വിഷയങ്ങളിൽ പ്രതിപക്ഷം ഉയർത്തിയ കടുത്ത ബഹളത്തെയും പ്രതിഷേധത്തെയും തുടർന്ന് സഭാനടപടികൾ തടസ്സപ്പെട്ടു. ലോക്സഭയും രാജ്യസഭയും ഓഗസ്റ്റ് 12 ബുധനാഴ്ച രാവിലെ 11 മണി വരെ പിരിഞ്ഞു. പ്രതിപക്ഷത്തിന്റെ ശക്തമായ പ്രതിഷേധങ്ങൾക്കിടയിലും ലോക്സഭയിൽ ‘ദി നാഷണൽ കോ-ഓപ്പറേറ്റീവ് ഡെവലപ്‌മെന്റ് കോർപ്പറേഷൻ (ഭേദഗതി) ബിൽ 2026’, കേരളത്തിന്റെ ഔദ്യോഗിക പേര് ‘കേരളം’ എന്ന് പുനർനാമകരണം ചെയ്യാനുള്ള ബിൽ ഉൾപ്പെടെ രണ്ട് ബില്ലുകൾ ചർച്ച കൂടാതെ പാസാക്കി.(Parliament Adjourned Till August Twelve Lok Sabha Passes Bill Renaming Kerala As Keralam)

കേന്ദ്ര ആഭ്യന്തര മന്ത്രി അമിത് ഷാ സഭയിൽ നേരിട്ടെത്തി വിശദീകരണം നൽകണമെന്ന് ആവശ്യപ്പെട്ട് പ്ലക്കാർഡുകളുമേന്തി പ്രതിപക്ഷാംഗങ്ങൾ സഭയുടെ നടുത്തളത്തിൽ ഇറങ്ങി മുദ്രാവാക്യം വിളിച്ചതോടെയാണ് ലോക്സഭ അലങ്കോലപ്പെട്ടത്. സഭ ശാന്തമായി നടത്താൻ പ്രതിപക്ഷം സഹകരിക്കണമെന്ന് അഭ്യർത്ഥിച്ചെങ്കിലും ബഹളം തുടർന്നതോടെ സഭ നാളത്തേക്ക് പിരിയുകയായിരുന്നു. അതേസമയം, പ്രതിപക്ഷ നേതാവ് രാഹുൽ ഗാന്ധി തന്റെ വാശിയിലൂടെയും അച്ചടക്കമില്ലാത്ത പെരുമാറ്റത്തിലൂടെയും പാർലമെന്റിനെ ബന്ദിയാക്കുകയാണെന്ന് ബി.ജെ.പി ദേശീയ വക്താവ് സുധാൻഷു ത്രിവേദി വാർത്താസമ്മേളനത്തിൽ കുറ്റപ്പെടുത്തി. നീറ്റ് വിഷയത്തിൽ രാഹുൽ ഗാന്ധിയുടെ ആവശ്യങ്ങൾ സർക്കാർ അംഗീകരിച്ചിട്ടുണ്ടെന്നും ആഭ്യന്തര മന്ത്രി അമിത് ഷാ വിശദമായ പ്രസ്താവന നടത്താൻ തയ്യാറായിട്ടും കോൺഗ്രസ് നേതാവ് ചർച്ചകളിൽ നിന്ന് ഒളിച്ചോടുകയാണെന്നും അദ്ദേഹം ആരോപിച്ചു.

അതേസമയം രാജ്യസഭയിൽ പ്രതിപക്ഷ നേതാവ് മല്ലികാർജുൻ ഖാർഗെയ്ക്ക് സംസാരിക്കാൻ ചെയർ അനുമതി നൽകാത്തതിൽ പ്രതിഷേധിച്ച് ‘ഇന്ത്യ’ സഖ്യത്തിലെ കക്ഷികൾ സഭയിൽ നിന്ന് ഇറങ്ങിപ്പോയി. പ്രതിപക്ഷത്തിന്റെ അസാന്നിധ്യത്തിൽ, രാജ്യത്തുടനീളമുള്ള വിവിധ ട്രിബ്യൂണലുകളിലെ അധ്യക്ഷന്മാരെയും അംഗങ്ങളെയും തിരഞ്ഞെടുക്കുന്നതിനായി ‘നാഷണൽ ട്രിബ്യൂണൽ കമ്മീഷൻ’ രൂപീകരിക്കുന്നതിനുള്ള ‘ട്രിബ്യൂണൽ പരിഷ്കരണ ബിൽ 2026’ രാജ്യസഭ പാസാക്കി. ഈ ബിൽ തിങ്കളാഴ്ച ലോക്സഭ പാസാക്കിയിരുന്നു.

Story Summary

Both Houses of Parliament were adjourned until August 12 following intense Opposition protests over the NEET issue and demands for Home Minister Amit Shah’s presence. Amid the din, the Lok Sabha passed the National Co-operative Development Corporation Amendment Bill and a bill renaming Kerala to ‘Keralam’ without debate, while the Rajya Sabha passed the Tribunals Reforms Bill 2026 after an INDIA bloc walkout.