ഓണത്തിന് നാട്ടിലേക്ക് പോകാൻ തയാറെടുത്തോളൂ! ബെംഗളൂരു-കണ്ണൂർ പ്രത്യേക ട്രെയിൻ പ്രഖ്യാപിച്ചു; സമയവും സ്റ്റോപ്പുകളും അറിയാം

ഓണക്കാലത്ത് നാട്ടിലേക്ക് മടങ്ങാൻ തയ്യാറെടുക്കുന്ന പ്രവാസികൾക്കും യാത്രക്കാർക്കും വലിയ ആശ്വാസമായി ബെംഗളൂരുവിൽ നിന്ന് കേരളത്തിലേക്ക് പ്രത്യേക ട്രെയിൻ സർവീസ് പ്രഖ്യാപിച്ചു. ഉത്സവ സീസണിലെ വൻ തിരക്ക് മുൻകൂട്ടി കണ്ട് റെയിൽവേ അനുവദിച്ച ഈ സ്പെഷ്യൽ ട്രെയിൻ സർവീസ് ബെംഗളൂരു കന്റോൺമെന്റിൽ നിന്ന് കണ്ണൂരിലേക്കും തിരിച്ചും ആണ് സർവീസ് നടത്തുന്നത്. യാത്രാപ്രശ്നങ്ങൾക്ക് പരിഹാരമാകുന്ന ഈ പ്രത്യേക സർവീസിന്റെ സമയക്രമങ്ങളും സ്റ്റോപ്പുകളും സംബന്ധിച്ചുള്ള മുഴുവൻ വിവരങ്ങളും പുറത്തുവന്നിട്ടുണ്ട്.

ഓഗസ്റ്റ് 20-ന് രാത്രി 10.30-ന് ബെംഗളൂരു കന്റോൺമെന്റിൽ നിന്ന് പുറപ്പെടുന്ന ട്രെയിൻ, അടുത്ത ദിവസം ഉച്ചയ്ക്ക് 12.50-ഓടെ കണ്ണൂരിലെത്തിച്ചേരും. തിരിച്ച് കണ്ണൂർ-ബെംഗളൂരു കന്റോൺമെന്റ് സ്പെഷ്യൽ ട്രെയിൻ ഓഗസ്റ്റ് 21-ന് വൈകുന്നേരം 4.10-ന് കണ്ണൂരിൽ നിന്ന് പുറപ്പെട്ട്, 22-ാം തീയതി രാവിലെ 6 മണിക്ക് ബെംഗളൂരുവിൽ എത്തിച്ചേരുന്ന രീതിയിലാണ് സമയം ക്രമീകരിച്ചിരിക്കുന്നത്. ആകെ 23 കോച്ചുകളോടെയാണ് ഈ പ്രത്യേക ട്രെയിൻ സർവീസ് നടത്തുത്.

ALSO READ;കേവലം മൂന്ന് മിനിറ്റിൽ സഭ പിരിഞ്ഞു; ബഹളത്തിനിടയിൽ ചർച്ചകളില്ലാതെ ബില്ലുകൾ പാസാക്കി പാർലമെന്റ് വർഷകാല സമ്മേളനത്തിന് അന്ത്യം!

പാലക്കാട് വഴിയാണ് ഈ ട്രെയിൻ സർവീസ് കടന്നുപോകുന്നത്. യാത്രക്കാർക്കായി നിരവധി പ്രധാന സ്റ്റേഷനുകളിൽ സ്റ്റോപ്പുകൾ അനുവദിച്ചിട്ടുണ്ട്. ബെംഗളൂരു, കൃഷ്ണരാജപുരം, ബംഗരപേട്ട്, കുപ്പം, സേലം, ഈറോഡ്, തിരുപ്പൂർ, പോഡാനൂർ, പാലക്കാട്, ഷൊർണൂർ, തിരൂർ, പരപ്പനങ്ങാടി, കോഴിക്കോട്, വടകര, തലശ്ശേരി, കണ്ണൂർ എന്നിങ്ങനെയാണ് ട്രെയിനിന്റെ പ്രധാന സ്റ്റേഷനുകൾ. ഈ റൂട്ടിൽ യാത്ര ചെയ്യുന്നവർക്ക് ഏറെ ഉപകാരപ്പെടുന്ന രീതിയിലാണ് സ്റ്റോപ്പുകൾ ക്രമീകരിച്ചിരിക്കുന്നത്.

ഓണക്കാലത്തെ ടിക്കറ്റ് തിരക്കുകൾ ഒഴിവാക്കി സുഖമായി നാട്ടിലെത്താൻ ആഗ്രഹിക്കുന്നവർക്ക് ഈ സ്പെഷ്യൽ ട്രെയിൻ വലിയൊരു അനുഗ്രഹമായിരിക്കും. മുൻകൂട്ടി ബുക്ക് ചെയ്ത് യാത്രക്കാർക്ക് ഈ സേവനം പൂർണ്ണമായി പ്രയോജനപ്പെടുത്താം.

The post ഓണത്തിന് നാട്ടിലേക്ക് പോകാൻ തയാറെടുത്തോളൂ! ബെംഗളൂരു-കണ്ണൂർ പ്രത്യേക ട്രെയിൻ പ്രഖ്യാപിച്ചു; സമയവും സ്റ്റോപ്പുകളും അറിയാം appeared first on Express Kerala.