1947-ൽ 12 പൈസയ്ക്ക് പാൽ, 88 രൂപയ്ക്ക് സ്വർണം..! 2026 ൽ എന്ത് സംഭവിച്ചു

സ്വാതന്ത്ര്യം കിട്ടുമ്പോൾ നമ്മുടെ രാജ്യത്ത് പാൽ ലിറ്ററിന് വെറും 12 പൈസയും, 10 ഗ്രാം സ്വർണത്തിന് 88 രൂപയുമായിരുന്നു വിലയെന്നറിഞ്ഞാൽ ഇന്നത്തെ തലമുറ ഒന്ന് അമ്പരക്കുമെന്നുറപ്പാണ്. അന്നത്തെ കാലത്തെ ചെറിയ വേതനവും നാണയ വ്യവസ്ഥകളും വെച്ച് നോക്കുമ്പോൾ അന്ന് സാധനങ്ങൾ വാങ്ങാൻ വലിയ തുകയൊന്നും വേണ്ടി വന്നിരുന്നില്ല. എന്നാൽ 1947-ലെ ആ കാലഘട്ടത്തിൽ നിന്ന് 2026-ലേക്ക് എത്തിനിൽക്കുമ്പോൾ നമ്മുടെ രാജ്യത്തെ അവശ്യസാധനങ്ങളുടെ വിലയിലുണ്ടായിരിക്കുന്ന കുതിച്ചുചാട്ടം ഏതൊരാളെയും ഞെട്ടിപ്പിക്കുന്നതാണ്. ഇന്ത്യൻ സമ്പദ്‌വ്യവസ്ഥയുടെ ഈ വലിയ മാറ്റത്തെക്കുറിച്ച് പുറത്തുവന്ന റിപ്പോർട്ടുകൾ ഏറെ കൗതുകമുണർത്തുന്നവയാണ്.

അന്ന് രൂപ അന്നങ്ങളായും പൈസകളായും വിഭജിച്ചിരുന്ന കാലത്ത് സാധാരണക്കാരുടെ ശമ്പളം വെറും മുപ്പത് മുതൽ അമ്പത് രൂപ വരെയായിരുന്നു. ആ കണക്കുവെച്ച് നോക്കിയാൽ അന്നത്തെ ഒരു സൈക്കിളിന്റെ വില പോലും ഒരു തൊഴിലാളിയുടെ മാസവരുമാനത്തിന്റെ പകുതിയോളം വരുമായിരുന്നു. അന്നത്തെ കണക്കനുസരിച്ച് സ്വർണത്തിന് 88.62 രൂപയും, പാൽ ലിറ്ററിന് 12 പൈസയും, അരി കിലോയ്ക്ക് 12 മുതൽ 16 പൈസ വരെയുമായിരുന്നു വില. ഗ്രാമങ്ങളിലും നഗരങ്ങളിലും വലിയ സാമ്പത്തിക വ്യത്യാസങ്ങൾ ഉണ്ടായിരുന്നുവെങ്കിലും അന്നത്തെ വിലനിലവാരം ഇന്നത്തെ കാലവുമായി താരതമ്യം ചെയ്യുമ്പോൾ വളരെ കുറവായിരുന്നു എന്ന് വ്യക്തമാണ്. ഗോതമ്പ് ക്വിന്റലിന് 20 മുതൽ 24 രൂപ വരെയും, പഞ്ചസാര കിലോയ്ക്ക് 40 മുതൽ 45 പൈസ വരെയുമായിരുന്നു വിപണി വില. പെട്രോളിനാകട്ടെ ലിറ്ററിന് വെറും 27 പൈസ മാത്രമായിരുന്നു അന്ന് ഈടാക്കിയിരുന്നത്. യാത്രകളുടെ കാര്യമെടുത്താൽ ഡൽഹിയിൽ നിന്ന് കൊൽക്കത്തയിലേക്കോ ബോംബെയിലേക്കോ ഉള്ള ഫസ്റ്റ് ക്ലാസ് തീവണ്ടി യാത്രാക്കൂലി 123 രൂപയും, വിമാന ടിക്കറ്റ് നിരക്ക് 140 രൂപയുമായിരുന്നു.

ALSO READ;ബാങ്കുകളിൽ അവകാശികളില്ലാതെ കിടക്കുന്നത് ലക്ഷം കോടിയോളം രൂപ! ആ പണത്തിന് എന്ത് സംഭവിക്കും?

എന്നാൽ ഇന്ന് 2026-ൽ എത്തുമ്പോൾ ഈ വിലകളെല്ലാം ലക്ഷക്കണക്കിന് രൂപയുടെ വർധനവാണ് രേഖപ്പെടുത്തിയിരിക്കുന്നത്. 10 ഗ്രാം സ്വർണത്തിന്റെ വില 1,55,300 രൂപയായി ഉയർന്നിരിക്കുന്നു. പാൽ വില ലിറ്ററിന് 66 മുതൽ 68 രൂപയായും, അരി വില 50 മുതൽ 60 രൂപയായും, ഗോതമ്പ് വില കിലോയ്ക്ക് 38 മുതൽ 45 രൂപയായും കുത്തനെ കൂടിയിട്ടുണ്ട്. പെട്രോൾ വില 94 മുതൽ 102 രൂപ വരെ എത്തിനിൽക്കുമ്പോൾ, തീവണ്ടി യാത്രയും വിമാനയാത്രയും സാധാരണക്കാർക്ക് വലിയ സാമ്പത്തിക ബാധ്യതയായി മാറിയിരിക്കുകയാണ്. അന്നത്തെ കാലത്തെ നാണയ വ്യവസ്ഥകളും (1 രൂപ = 16 അന്ന, 1 അന്ന = 4 പൈസ) ഇന്നത്തെ ആധുനിക ഡിജിറ്റൽ യുഗവും തമ്മിലുള്ള വ്യത്യാസം നമ്മുടെ സാമ്പത്തിക വളർച്ചയുടെയും പണപ്പെരുപ്പത്തിന്റെയും വലിയൊരു ചിത്രമാണ് നൽകുന്നത്.

കാലം മാറുന്നതിനനുസരിച്ച് ജീവിതച്ചെലവിലുണ്ടായ ഈ മാറ്റം സാമ്പത്തിക ലോകത്തെ വലിയൊരു യാഥാർത്ഥ്യമാണ് നമ്മെ ഓർമ്മിപ്പിക്കുന്നത്.

The post 1947-ൽ 12 പൈസയ്ക്ക് പാൽ, 88 രൂപയ്ക്ക് സ്വർണം..! 2026 ൽ എന്ത് സംഭവിച്ചു appeared first on Express Kerala.