സന്നിധാനത്തും പമ്പയിലും ആധുനിക ‌‌‌നെയ്യ് പരിശോധനാ ലാബ് വരുന്നു; തിരുവിതാംകൂർ ദേവസ്വം ബോർഡിന് മന്ത്രിയുടെ നിർദ്ദേശം

തിരുവനന്തപുരം: സന്നിധാനത്തും പമ്പയിലും നെയ്യുടെ ഗുണനിലവാരം പരിശോധിക്കുന്നതിനായി ആധുനിക ലാബുകൾ സജ്ജമാക്കണമെന്ന് ദേവസ്വം മന്ത്രി കെ. മുരളീധരൻ ആവശ്യപ്പെട്ടു. ഇതുസംബന്ധിച്ച് തിരുവിതാംകൂർ ദേവസ്വം ബോർഡിന് മന്ത്രി ഔദ്യോഗികമായി കത്ത് നൽകിയിട്ടുണ്ട്. നിലവിലുള്ള ആശുപത്രികളിൽ ഫോറൻസിക് മെഡിസിൻ വിഭാഗം, ആരോഗ്യവകുപ്പ്, ഭക്ഷ്യസുരക്ഷാ വകുപ്പ് എന്നിവയുടെ സംയുക്ത സഹകരണത്തോടെയാണ് ലാബുകൾ സ്ഥാപിക്കേണ്ടത്.

ഭക്തജനങ്ങൾ നേർച്ചയായി സമർപ്പിക്കുന്ന നെയ്യ്, അപ്പം, അരവണ എന്നിവയുടെ നിർമ്മാണത്തിനായി ഉപയോഗിക്കുന്നതിന് മുൻപ് അവയുടെ ഗുണനിലവാരം കർശനമായി പരിശോധിക്കേണ്ടത് അത്യാവശ്യമാണെന്ന് മന്ത്രി കത്തിൽ ചൂണ്ടിക്കാണിക്കുന്നു. വരാനിരിക്കുന്ന മണ്ഡല-മകരവിളക്ക് സീസൺ ആരംഭിക്കുന്നതിന് മുൻപ് തന്നെ ലാബുകൾ പൂർണ്ണതോതിൽ പ്രവർത്തനസജ്ജമാക്കേണ്ടതുണ്ട്.

Also Read:ക്ഷേമപ്രവർത്തനങ്ങൾ ആരുടെയും ഔദാര്യമല്ല, അവകാശമാണ്; സ്വാതന്ത്ര്യദിന സന്ദേശവുമായി മുഖ്യമന്ത്രി വി.ഡി. സതീശൻ

ലാബ് സ്ഥാപിക്കുന്നതിനാവശ്യമായ ഉപകരണങ്ങൾ വാങ്ങുന്നതിന് തുക വകയിരുത്തണമെന്നും, അടിസ്ഥാന സൗകര്യങ്ങൾ അടിയന്തരമായി ഒരുക്കണമെന്നും മന്ത്രി നിർദേശിച്ചു. ഇതിനായി ബന്ധപ്പെട്ട വകുപ്പുകൾക്ക് ആവശ്യമായ എല്ലാ സഹകരണങ്ങളും നൽകാൻ തിരുവിതാംകൂർ ദേവസ്വം ബോർഡ് ഉടൻ നടപടി സ്വീകരിക്കണമെന്നും കത്തിൽ വശ്യപ്പെട്ടിട്ടുണ്ട്.

The post സന്നിധാനത്തും പമ്പയിലും ആധുനിക ‌‌‌നെയ്യ് പരിശോധനാ ലാബ് വരുന്നു; തിരുവിതാംകൂർ ദേവസ്വം ബോർഡിന് മന്ത്രിയുടെ നിർദ്ദേശം appeared first on Express Kerala.