ഇയർഔട്ട് ആകുമെന്ന ഭയം, കോതമംഗലത്ത് എഞ്ചിനീയറിങ് വിദ്യാർത്ഥി ജീവനൊടുക്കിയ നിലയിൽ; കോളേജിനെതിരെ കടുത്ത പ്രതിഷേധവുമായി സഹപാഠികൾ | MA College Kothamangalam student death

കോതമംഗലം: കോതമംഗലം എം.എ എഞ്ചിനീയറിങ് കോളേജിലെ (MA College of Engineering) മൂന്നാം വർഷ സിവിൽ എഞ്ചിനീയറിങ് വിദ്യാർത്ഥിയെ താമസസ്ഥലത്ത് ജീവനൊടുക്കിയ നിലയിൽ കണ്ടെത്തി. അരുണാചൽ പ്രദേശ് സ്വദേശിയായ മിച്ചി മിർപുവാണ് (21) മരിച്ചത്. ശനിയാഴ്ച വൈകുന്നേരം മൂന്നുമണിയോടെ കോളേജിന് സമീപത്തെ പേയിങ് ഗസ്റ്റ് (PG) താമസസ്ഥലത്താണ് മിർപുവിനെ തൂങ്ങിമരിച്ച നിലയിൽ കണ്ടെത്തിയത്. സംഭവസ്ഥലത്തുനിന്ന് മൂന്ന് പേജുള്ള ഹിന്ദിയിലുള്ള ആത്മഹത്യാക്കുറിപ്പ് പോലീസ് കണ്ടെടുത്തു.

കോളേജിലെ ക്രെഡിറ്റ് സ്‌കോർ (Credit Score) നയവും ‘ഇയർ ബാക്ക്’ (Year Back) ഭീഷണിയുമാണ് ആത്മഹത്യയ്ക്ക് കാരണമെന്ന് ആരോപിച്ചു വിദ്യാർത്ഥികൾ കടുത്ത പ്രതിഷേധത്തിലാണ്. മറ്റ് സാങ്കേതിക സർവ്വകലാശാലകളിൽ കുറഞ്ഞ ക്രെഡിറ്റ് സ്‌കോർ 18 ആയിരിക്കെ, ഓട്ടോണോമസ് പദവിയുള്ള എം.എ കോളേജിൽ ഇത് 22 ആണ്. ക്രെഡിറ്റ് സ്‌കോർ തികയ്ക്കാൻ കഴിയാത്തതിനെ തുടർന്ന് ഇയർ ഔട്ട് ആകുമെന്ന ഭയമാണ് മിർപുവിനെ ആത്മഹത്യയിലേക്ക് നയിച്ചതെന്നും, ആത്മഹത്യാക്കുറിപ്പിൽ ഇതേക്കുറിച്ച് പരാമർശമുണ്ടെന്നും സഹപാഠികൾ ആരോപിക്കുന്നു.

വിഷയത്തിൽ കോളേജ് മാനേജ്‌മെന്റും ഉന്നതവിദ്യാഭ്യാസ മന്ത്രിയും ഇടപെട്ടിട്ടും മാറ്റമുണ്ടായില്ലെന്ന് ചൂണ്ടിക്കാട്ടി വിദ്യാർത്ഥികൾ കോതമംഗലം പോലീസ് സ്റ്റേഷനു മുന്നിൽ തടിച്ചുകൂടി പ്രതിഷേധിച്ചു. അതേസമയം, വിദ്യാർത്ഥികളുടെ പഠനനിലവാരം ഉയർത്തുന്നതിനും വിദേശപഠനത്തിനും പ്ലേസ്‌മെന്റുകൾക്കും സഹായിക്കുന്ന ഇൻഡസ്ട്രിയൽ സ്റ്റാൻഡേർഡ് അനുസരിച്ചാണ് അക്കാദമിക് കൗൺസിൽ ക്രെഡിറ്റ് സ്‌കോർ നിശ്ചയിച്ചിരിക്കുന്നതെന്നാണ് കോളേജ് അധികൃതരുടെ വിശദീകരണം.

Story Summary: Michi Mirpu, a third-year civil engineering student at MA Engineering College Kothamangalam, died by suicide in his PG, prompting intense student protests against the college’s strict credit score norms and year-back policies.