എൻടിഎയിൽ വൻ അഴിച്ചുപണി; പരീക്ഷാ സുരക്ഷ ശക്തമാക്കാൻ 600 വിദഗ്ധരെ മാറ്റും, 4-തല സുരക്ഷാ സംവിധാനം | National Testing Agency

ന്യൂഡൽഹി: പരീക്ഷാ നടത്തിപ്പിലെ സുരക്ഷാ വീഴ്ചകൾ ഒഴിവാക്കുന്നതിനായി ദേശീയ പരീക്ഷാ ഏജൻസിയിൽ (National Testing Agency) വൻ അഴിച്ചുപണി. പരീക്ഷാ സംവിധാനത്തിൽ സമഗ്രമായ മാറ്റങ്ങൾ വരുത്താനും ചോദ്യപേപ്പർ ചോർച്ച തടയുന്നതിനുമായി കേന്ദ്ര വിദ്യാഭ്യാസ മന്ത്രാലയം നിർണായക നിർദേശങ്ങൾ നൽകി.

പരീക്ഷാ നടത്തിപ്പുമായി ബന്ധപ്പെട്ട സമിതിയിൽ ഉൾപ്പെട്ടിരുന്ന 600 വിദഗ്ധരെ മാറ്റി പുതിയ വിദഗ്ധരെ ഉൾപ്പെടുത്താനാണ് തീരുമാനം. ചോദ്യപേപ്പറുകളുടെ സുരക്ഷ ഉറപ്പാക്കുന്നതിനായി നാല് ഘട്ട പരിശോധനാ സംവിധാനവും ഏർപ്പെടുത്തും. പരീക്ഷാ നടപടികളിലെ രഹസ്യസ്വഭാവമുള്ള ഘട്ടങ്ങളിൽ കൂടുതൽ കർശനമായ നിയന്ത്രണങ്ങൾ കൊണ്ടുവരാനും നിർദേശമുണ്ട്.

NTAയുടെ ഓഫീസുകൾ അടിയന്തരമായി പുതിയ കെട്ടിടത്തിലേക്ക് മാറ്റുന്നതിനുള്ള നടപടികളും ആരംഭിക്കും. ഓഫീസുകളുടെ സുരക്ഷാ ചുമതല കേന്ദ്ര വ്യവസായ സുരക്ഷാ സേനയായ (CISF)ക്ക് കൈമാറും. അടുത്ത രണ്ടോ മൂന്നോ ആഴ്ചയ്ക്കുള്ളിൽ 20 മുതൽ 25 വരെ പുതിയ ഉദ്യോഗസ്ഥരെ നിയമിക്കുമെന്നും NTA ഡയറക്ടർ ജനറൽ കേന്ദ്ര വിദ്യാഭ്യാസ മന്ത്രിയെ അറിയിച്ചു.

ചോദ്യപേപ്പർ ചോർച്ചയിൽ NTAയിലെ ചില വിദഗ്ധർക്ക് പങ്കുണ്ടെന്ന് സിബിഐ കണ്ടെത്തിയതിന് പിന്നാലെയാണ് നടപടികൾ ശക്തമാക്കുന്നത്. പരീക്ഷകൾ പൂർണ സുരക്ഷയോടെയും പഴുതുകളില്ലാതെയും നടത്തണമെന്ന് കേന്ദ്ര വിദ്യാഭ്യാസ മന്ത്രി നിർദേശം നൽകിയിരുന്നു.

യുജിസി നെറ്റ് പരീക്ഷയിലെ മൂന്ന് വിഷയങ്ങളിൽ പുനഃപരീക്ഷ പ്രഖ്യാപിച്ചതിന് പിന്നാലെ ചേർന്ന ഉന്നതതല യോഗത്തിലാണ് പരീക്ഷാ സംവിധാനത്തിൽ സമഗ്രമായ പരിശോധന നടത്താൻ മന്ത്രാലയം നിർദേശിച്ചത്. നിലവിലെ നടപടിക്രമങ്ങൾ വിലയിരുത്തി ആവശ്യമായ തിരുത്തലുകൾ വരുത്തുകയും വിശദമായ റിപ്പോർട്ട് സമർപ്പിക്കുകയും വേണമെന്ന് NTAയോട് ആവശ്യപ്പെട്ടിട്ടുണ്ട്.

ചോദ്യപേപ്പർ തയ്യാറാക്കൽ ഉൾപ്പെടെയുള്ള രഹസ്യസ്വഭാവമുള്ള നടപടിക്രമങ്ങൾ പുനഃക്രമീകരിക്കാനും നിർദേശമുണ്ട്. ഇതിനായി പ്രത്യേക സുരക്ഷാ മുറികൾ സജ്ജീകരിക്കുക, മൊബൈൽ ഫോണുകളും മറ്റ് ഇലക്ട്രോണിക് ഉപകരണങ്ങളും ഉപയോഗിക്കുന്നതിന് കർശന നിയന്ത്രണം ഏർപ്പെടുത്തുക തുടങ്ങിയ സുരക്ഷാ പ്രോട്ടോക്കോളുകളും നടപ്പാക്കും.

നീറ്റ്-യുജി പരീക്ഷയിലെ ചോദ്യപേപ്പർ ചോർച്ചയും യുജിസി നെറ്റ് പരീക്ഷയുമായി ബന്ധപ്പെട്ട ക്രമക്കേടുകളും ഉയർത്തിയ ആശങ്കകൾക്കിടെയാണ് NTAയിൽ വലിയ പരിഷ്കാരങ്ങൾ നടപ്പാക്കുന്നത്. പരീക്ഷാ നടത്തിപ്പ് സംവിധാനം പൂർണമായി പുനഃസംഘടിപ്പിക്കുന്നതിന്റെ ഭാഗമായി 50ലധികം ജീവനക്കാരെ കേന്ദ്ര വിദ്യാഭ്യാസ മന്ത്രാലയം മാറ്റിനിർത്തിയതായും റിപ്പോർട്ടുകളുണ്ട്.

ഇതിന് പുറമെ NTAയിലെ പ്രധാനപ്പെട്ട പത്തോളം നേതൃസ്ഥാനങ്ങളിലേക്ക് പ്രൊഫഷണലുകളെ നിയമിക്കുന്നതിനുള്ള വിജ്ഞാപനവും പുറത്തിറക്കിയിട്ടുണ്ട്. പരീക്ഷാ നടത്തിപ്പിലെ സുതാര്യതയും സുരക്ഷയും ഉറപ്പാക്കുകയാണ് പരിഷ്കാരങ്ങളുടെ പ്രധാന ലക്ഷ്യം.

Story Summary: The National Testing Agency is set for a major overhaul following concerns over exam security and alleged question paper leaks. Around 600 experts will be replaced, while a four-tier question paper verification system and stricter security protocols are planned.