‘എനിക്ക് വാടക അടയ്ക്കണം, സാമ്പത്തിക പ്രതിസന്ധി’: BJPയിൽ നിന്ന് രാജിവച്ചതിനുള്ള കാരണം വെളിപ്പെടുത്തി ഷെഹ്സാദ് പൂനവാല

ന്യൂഡൽഹി: ബി.ജെ.പി ദേശീയ വക്താവ് സ്ഥാനം ഒഴിഞ്ഞതിന് പിന്നിൽ കടുത്ത സാമ്പത്തിക പ്രതിസന്ധിയാണെന്ന വെളിപ്പെടുത്തലുമായി ഷെഹ്സാദ് പൂനവാല. പാർട്ടിയുടെ പ്രാഥമിക അംഗത്വത്തിൽ നിന്നും എല്ലാ ഔദ്യോഗിക ചുമതലകളിൽ നിന്നും രാജി സമർപ്പിച്ചതിന് പിന്നാലെ മാധ്യമങ്ങൾക്ക് നൽകിയ അഭിമുഖത്തിലാണ് അദ്ദേഹം കാര്യങ്ങൾ വ്യക്തമാക്കിയത്.(Shehzad Poonawalla Resigns From BJP Citing Financial Pressures)

രാഷ്ട്രീയ പാർട്ടികൾ വക്താക്കൾക്ക് പ്രതിമാസ ശമ്പളം നൽകുന്നില്ലെന്നും, ഉപജീവനവും ചെലവുകളും മുന്നോട്ടുകൊണ്ടുപോകാൻ സ്വകാര്യ മേഖലയിലേക്ക് മടങ്ങുക മാത്രമാണ് വഴിയെന്നും അദ്ദേഹം പറഞ്ഞു. “എനിക്ക് വാടക അടയ്ക്കണം. ബി.ജെ.പി നേതാവായതുകൊണ്ട് വീടുടമ എനിക്ക് വാടകയിളവ് തരില്ല. രാഷ്ട്രീയ പ്രസ്ഥാനത്തിൽ പ്രവർത്തിക്കുന്നത് ഒരു ജോലിയല്ല. ആശയങ്ങളോടും പ്രസ്ഥാനത്തോടുമുള്ള സ്നേഹം കൊണ്ടാണ് പ്രവർത്തകനാകുന്നത്. ബി.ജെ.പിക്ക് എന്നെ സംരക്ഷിക്കേണ്ട ഉത്തരവാദിത്തമില്ല. എന്നാൽ കുടുംബ മഹിമയോ മറ്റ് സാമ്പത്തിക പശ്ചാത്തലമോ ഇല്ലാത്ത സ്വയം വളർന്നുവന്ന രാഷ്ട്രീയക്കാർക്ക് നിലനിൽപ്പിന് വരുമാനം അനിവാര്യമാണ്,” പൂനവാല ചൂണ്ടിക്കാട്ടി.

പാർട്ടി ആശയങ്ങളോടും പ്രധാനമന്ത്രി നരേന്ദ്ര മോദിയോടുമുള്ള പിന്തുണ തുടരുമെന്നും താൻ വ്യവസ്ഥയെ മാത്രമാണ് ഉപേക്ഷിക്കുന്നതെന്നും അദ്ദേഹം വ്യക്തമാക്കി. കോൺഗ്രസിലേക്ക് മടങ്ങുമെന്ന അഭ്യൂഹങ്ങൾ തള്ളിയ അദ്ദേഹം, ഗാന്ധി കുടുംബത്തെ മാറ്റുകയും നെഹ്‌റുവിന്റെ തീരുമാനങ്ങളിൽ മാപ്പ് പറയുകയും ചെയ്താൽ മാത്രമേ അക്കാര്യം ആലോചിക്കൂ എന്ന് തമാശ രൂപേണ കൂട്ടിച്ചേർത്തു. ബി.ജെ.പി ദേശീയ അധ്യക്ഷൻ നിതിൻ നബിന് അദ്ദേഹം ആഗസ്റ്റ് 17-നാണ് ഔദ്യോഗികമായി രാജി സമർപ്പിച്ചത്.

Story Summary

Former BJP national spokesperson Shehzad Poonawalla explained that financial constraints led to his resignation from the party, pointing out that political roles are voluntary and unpaid. He plans to move to the private sector while continuing to support PM Narendra Modi and the BJP’s ideology.