താങ് രാജവംശം നിലനിന്നിരുന്നില്ലേ?: സോഷ്യൽ മീഡിയയിലെ പ്രചാരണത്തിനെതിരെ ചൈനീസ് ഭരണകൂടം | Tang Dynasty

ബെയ്ജിങ്: എ.ഡി. 618 മുതൽ 907 വരെ ചൈന ഭരിക്കുകയും രാജ്യത്തിന്റെ സാംസ്കാരിക-സാമ്പത്തിക വളർച്ചയ്ക്ക് അടിത്തറയിടുകയും ചെയ്ത പ്രശസ്തമായ താങ് രാജവംശം (Tang dynasty) നിലനിന്നിരുന്നതേയില്ലെന്ന വിചിത്രമായ ഗൂഢാലോചനാ സിദ്ധാന്തം സോഷ്യൽ മീഡിയയിൽ പ്രചരിക്കുന്നു. ചൈനീസ് സോഷ്യൽ മീഡിയ പ്ലാറ്റ്‌ഫോമായ വീബോയിൽ ദശലക്ഷക്കണക്കിന് ആളുകളാണ് ഈ പ്രചാരണം കണ്ടത്. എന്നാൽ, ചരിത്രത്തെ വളച്ചൊടിക്കുന്ന ഈ ‘ചരിത്ര നിഷേധത്തിനെതിരെ’ ഔദ്യോഗിക മാധ്യമങ്ങളെ രംഗത്തിറക്കിയും അക്കൗണ്ടുകൾ ബ്ലോക്ക് ചെയ്തും ശക്തമായ നടപടിയെടുക്കുകയാണ് ചൈനീസ് ഭരണകൂടം.(Tang Dynasty Non Existence Controversy China Crackdown Historical Nihilism)

വിവാദത്തിന് വഴിവെച്ചത് എന്ത്?

കഴിഞ്ഞ മേയ് മാസത്തിൽ ഒരു ഹിസ്റ്ററി ബ്ലോഗർ പങ്കുവെച്ച വീഡിയോയാണ് വിവാദങ്ങൾക്ക് തുടക്കമിട്ടത്. ജ്യോതിശാസ്ത്ര വിവരങ്ങൾ അടിസ്ഥാനമാക്കി, തങ് രാജവംശത്തിന് ശേഷം വന്ന ‘സോങ് രാജവംശം’ പറയപ്പെടുന്നതിനേക്കാൾ മുൻപേ ആരംഭിച്ചിരുന്നതാണെന്നും അതിനാൽ തങ് രാജവംശത്തിന്റെ ഭരണകാലഘട്ടം ചരിത്രത്തിൽ നിന്ന് ഒഴിവാക്കപ്പെടേണ്ടതാണെന്നും ഇയാൾ അവകാശപ്പെട്ടു.

എന്നിരുന്നാലും, തങ് രാജവംശത്തിന്റെ സ്ഥാപകർ ചൈനയിലെ ഭൂരിപക്ഷ വിഭാഗമായ ‘ഹാൻ’ വംശജരല്ല, മറിച്ച് ഇന്നർ ഏഷ്യൻ പാരമ്പര്യമുള്ളവരാണെന്നതും ഈ തർക്കത്തിന് പിന്നിലുണ്ടെന്ന് പ്രമുഖ ചരിത്രകാരൻ വില്യം കർബി ചൂണ്ടിക്കാണിക്കുന്നു. സോങ് രാജവംശം ഹാൻ വംശജരായിരുന്നു. ചരിത്രസത്യങ്ങളെ കുട്ടികൾ പോലും സംശയിക്കാൻ ഈ പ്രചാരണം കാരണമായെന്ന് മാധ്യമങ്ങൾ റിപ്പോർട്ട് ചെയ്തു. ഇതിന് പിന്നാലെ ഭരണകക്ഷിയായ കമ്മ്യൂണിസ്റ്റ് പാർട്ടിയുടെ ഔദ്യോഗിക പത്രമായ ‘പീപ്പിൾസ് ഡെയ്‌ലി’ ഇതിനെതിരെ ശക്തമായി രംഗത്തെത്തി.

ചൈനീസ് കമ്മ്യൂണിസ്റ്റ് പാർട്ടി ഔദ്യോഗിക ചരിത്രവ്യാഖ്യാനങ്ങൾക്ക് വിരുദ്ധമായ ചർച്ചകളെ ‘ഹിസ്റ്റോറിക്കൽ നിഹിലിസം’ എന്നാണ് വിശേഷിപ്പിക്കുന്നത്. ഇതിനെ യുക്തിസഹമായ ഗവേഷണങ്ങളിലൂടെ പ്രതിരോധിക്കണമെന്ന് ഷാങ്ഹായ് ഭരണകൂടവുമായി ബന്ധപ്പെട്ട് റിപ്പോർട്ട് ചെയ്തു. ചൈനീസ് പ്രസിഡന്റ് ഷി ജിൻപിങ് തന്റെ ഭരണത്തിന് കീഴിൽ ചൈനീസ് സാംസ്കാരിക തനിമയും ചരിത്രപരമായ ഐക്യവും ഉയർത്തിക്കാട്ടാൻ തങ് രാജവംശത്തിന്റെ പ്രതീകങ്ങൾ വ്യാപകമായി ഉപയോഗിക്കാറുണ്ട്. 2023-ൽ ഷിയാൻ നഗരത്തിൽ നടന്ന സെൻട്രൽ ഏഷ്യൻ ഉച്ചകോടിയിൽ തങ് ശൈലിയിലുള്ള വസ്ത്രങ്ങളണിഞ്ഞ കലാകാരന്മാരുടെ പ്രകടനങ്ങൾ ഇതിന് ഉദാഹരണമാണ്. ഓഗസ്റ്റ് മധ്യത്തോടെ, ഈ വ്യാജ സിദ്ധാന്തം പ്രചരിപ്പിച്ച ബ്ലോഗർ ക്യാവോ യുവിന്റെ സോഷ്യൽ മീഡിയ അക്കൗണ്ടുകൾ ചൈനീസ് അധികൃതർ പൂർണ്ണമായി ബ്ലോക്ക് ചെയ്യുകയും വീഡിയോകൾ നീക്കം ചെയ്യുകയും ചെയ്തു.

Story Summary

A viral conspiracy theory on Chinese social media claiming the Tang dynasty never existed has drawn a stern crackdown from Chinese authorities. Refuting the claims as “historical nihilism,” state media like People’s Daily defended the historical dynasty, while the blogger’s accounts were blocked.