ഡിആർ കോംഗോയിൽ എബോള കേസുകൾ 5,515 ആയി; മരണസംഖ്യ 2,642, ആഗോള ഇടപെടൽ ആവശ്യപ്പെട്ട് പോപ്പ് ലിയോ | Ebola outbreak DRC

ഡെമോക്രാറ്റിക് റിപ്പബ്ലിക് ഓഫ് കോംഗോയിൽ (ഡിആർസി) എബോള വ്യാപനം രൂക്ഷമാകുന്നു. ഏറ്റവും പുതിയ സർക്കാർ കണക്കുകൾ പ്രകാരം രാജ്യത്ത് 5,515 സ്ഥിരീകരിച്ച കേസുകളും 2,642 മരണങ്ങളും റിപ്പോർട്ട് ചെയ്തു. ഇറ്റൂരി, നോർത്ത് കിവു പ്രവിശ്യകളിലായി 51 പുതിയ കേസുകളാണ് സ്ഥിരീകരിച്ചത്. (Ebola outbreak DRC)

മെയ് മധ്യത്തിൽ ആരംഭിച്ച നിലവിലെ വ്യാപനം ഡിആർസിയുടെ 17-ാമത്തെ എബോള പകർച്ചവ്യാധിയാണ്. രാജ്യത്തിന്റെ ചരിത്രത്തിലെ ഏറ്റവും മാരകമായ എബോള വ്യാപനമായി ഇത് മാറിക്കൊണ്ടിരിക്കുകയാണ്. രോഗബാധിതരിൽ മരണപ്പെടുന്നവരുടെ നിരക്ക് ജൂൺ ആദ്യവാരത്തിലെ ഏകദേശം 20 ശതമാനത്തിൽ നിന്ന് ഇപ്പോൾ 48 ശതമാനത്തോട് അടുത്തെത്തി. അതായത് രോഗബാധിതരായ രണ്ടുപേരിൽ ഒരാൾ മരിക്കുന്ന സാഹചര്യമാണുള്ളത്.

അതേസമയം, രോഗബാധിതരുമായി സമ്പർക്കത്തിലായവരെ കണ്ടെത്തുന്നതിലെ പുരോഗതി പ്രതീക്ഷ നൽകുന്നതാണ്. ജൂണിൽ 30 ശതമാനമായിരുന്ന കോൺടാക്ട് ട്രേസിങ് നിലവിൽ 85 ശതമാനത്തിലേറെയായി. എന്നാൽ സായുധ സംഘർഷം, ജനങ്ങളുടെ കുടിയൊഴിപ്പിക്കൽ, ആരോഗ്യപ്രവർത്തകർക്കും ആരോഗ്യകേന്ദ്രങ്ങൾക്കും നേരെയുള്ള ആക്രമണം, അടിസ്ഥാന സൗകര്യങ്ങളുടെ അഭാവം എന്നിവ രോഗനിയന്ത്രണ പ്രവർത്തനങ്ങൾക്ക് വലിയ വെല്ലുവിളിയാണ്.

രോഗത്തിനെതിരെ പ്രവർത്തിക്കുന്ന ആരോഗ്യപ്രവർത്തകരും വലിയ അപകടത്തിലാണ്. ലോകാരോഗ്യ സംഘടനയുടെ കണക്കനുസരിച്ച് 160ഓളം ആരോഗ്യപ്രവർത്തകർക്ക് രോഗബാധയുണ്ടാകുകയും 45ഓളം പേർ മരിക്കുകയും ചെയ്തു. നിലവിലെ വ്യാപനത്തിന് കാരണമായ ബുണ്ടിബുഗ്യോ എബോള വൈറസ് വകഭേദത്തിനെതിരെ അംഗീകൃത വാക്സിനോ ചികിത്സയോ നിലവിലില്ല. മുൻ എബോള വ്യാപനങ്ങളിൽ ഉപയോഗിച്ച Ervebo വാക്സിൻ ബുണ്ടിബുഗ്യോയ്ക്കെതിരെ ചില സംരക്ഷണം നൽകാമെന്ന സൂചനയാണ് പ്രാഥമിക പഠനങ്ങളിലുള്ളത്.

ഡിആർസിയിലേക്ക് ഇതിനകം 16,250 വാക്സിൻ ഡോസുകൾ എത്തിച്ചെങ്കിലും രോഗനിയന്ത്രണ പ്രവർത്തനങ്ങൾ രണ്ടോ മൂന്നോ മടങ്ങ് ശക്തിപ്പെടുത്തേണ്ടതുണ്ടെന്ന് ലോകാരോഗ്യ സംഘടന വ്യക്തമാക്കി. വാക്സിനുകൾ, വ്യക്തിഗത സുരക്ഷാ ഉപകരണങ്ങൾ, വേഗത്തിലുള്ള രോഗനിർണയം, ചികിത്സാ സംവിധാനങ്ങൾ എന്നിവയ്ക്കായി കൂടുതൽ അന്താരാഷ്ട്ര സഹായവും ആവശ്യപ്പെട്ടിട്ടുണ്ട്. ഡിആർസിയിലെ സ്ഥിതിയിൽ ആശങ്ക പ്രകടിപ്പിച്ച പോപ്പ് ലിയോ ഞായറാഴ്ച അന്താരാഷ്ട്ര സമൂഹത്തോട് അടിയന്തരമായി ഇടപെടണമെന്ന് ആവശ്യപ്പെട്ടു. പ്രാദേശിക സമൂഹങ്ങളെ കൂടി പ്രതിരോധ പ്രവർത്തനങ്ങളിൽ ഉൾപ്പെടുത്തി കൂടുതൽ ജീവനുകൾ രക്ഷിക്കാൻ ആഗോളതലത്തിൽ നടപടി വേണമെന്നാണ് അദ്ദേഹത്തിന്റെ ആഹ്വാനം. അതേസമയം, ഡിആർസിക്ക് പുറത്തുള്ള ആഗോള ജനാരോഗ്യ അപകടസാധ്യത നിലവിൽ കുറവാണെന്നാണ് ലോകാരോഗ്യ സംഘടനയുടെ വിലയിരുത്തൽ.

Summary: The Ebola outbreak in the Democratic Republic of Congo has reached 5,515 confirmed cases and 2,642 deaths, with the case fatality rate nearing 48 percent. Pope Leo has urged the international community to step up support, while WHO says the response must be significantly expanded to contain the outbreak.