ഇറാനെതിരായ യു.എസ് ഉപരോധത്തിൽ പ്രതിഷേധവുമായി ചൈന; ‘നിയമവിരുദ്ധ നീക്കങ്ങളെ നേരിടും’ | China US Iran sanctions

ബീജിങ്: ഇറാനുമേൽ സാമ്പത്തിക ഉപരോധം കടുപ്പിക്കാനും ഇറാനുമായി വ്യാപാരബന്ധമുള്ള രാജ്യങ്ങൾക്കെതിരെ നടപടിയെടുക്കാനുമുള്ള അമേരിക്കൻ നീക്കത്തിനെതിരെ കടുത്ത പ്രതിഷേധവുമായി ചൈന (China US Iran sanctions). അമേരിക്കയുടേത് അന്താരാഷ്ട്ര നിയമങ്ങൾക്ക് വിരുദ്ധമായ ഏകപക്ഷീയമായ നടപടിയാണെന്ന് ചൈന വ്യക്തമാക്കി. സ്വന്തം രാജ്യത്തിന്റെ സാമ്പത്തിക താല്പര്യങ്ങൾ സംരക്ഷിക്കാൻ ആവശ്യമായ ശക്തമായ നടപടികൾ സ്വീകരിക്കുമെന്ന് ചൈനീസ് വിദേശകാര്യ മന്ത്രാലയം അറിയിച്ചു.

ഇറാനുമായി സാമ്പത്തിക ബന്ധം തുടരുന്ന രാജ്യങ്ങൾക്ക് കനത്ത പ്രത്യാഘാതം നേരിടേണ്ടി വരുമെന്നും അവരെ അന്താരാഷ്ട്ര തലത്തിൽ ഒറ്റപ്പെടുത്തുമെന്നും അമേരിക്കൻ ട്രഷറി സെക്രട്ടറി സ്കോട്ട് ബെസന്റ് മുന്നറിയിപ്പ് നൽകിയിരുന്നു. ഇതിനു പിന്നാലെയാണ് ശക്തമായ മറുപടിയുമായി ചൈന രംഗത്തെത്തിയത്. ഇറാനിൽ നിന്ന് ഏറ്റവും കൂടുതൽ ക്രൂഡ് ഓയിൽ ഇറക്കുമതി ചെയ്യുന്ന രാജ്യമാണ് ചൈന. അന്താരാഷ്ട്ര നിയമങ്ങൾക്ക് വിധേയമായാണ് തങ്ങളും ഇറാനും തമ്മിലുള്ള സഹകരണമെന്നും ഇതിൽ മൂന്നാമതൊരു രാജ്യം ഇടപെടേണ്ടതില്ലെന്നും ചൈനീസ് വിദേശകാര്യ വക്താവ് ലിൻ ജിയാൻ വ്യക്തമാക്കി.

അതേസമയം അമേരിക്കയുടെ ഉപരോധങ്ങളെ നേരിടാൻ പൂർണ്ണ സജ്ജമാണെന്ന് ഇറാനും പ്രതികരിച്ചു. ഉപരോധങ്ങൾ മറികടക്കാൻ രണ്ട് വർഷത്തെ കൃത്യമായ സാമ്പത്തിക പദ്ധതി തയ്യാറാക്കിയിട്ടുണ്ടെന്ന് ഇറാൻ സാമ്പത്തിക കാര്യ മന്ത്രി അലി മദനിസാദെ പറഞ്ഞു. രണ്ടു മാസമായി തുടരുന്ന യു.എസ്-ഇസ്രായേൽ സംഘർഷത്തിനും ഹോർമുസ് കടലിടുക്കിലെ തടസ്സങ്ങൾക്കും പിന്നാലെ ആഗോളതലത്തിൽ എണ്ണവില വർദ്ധിച്ച പശ്ചാത്തലത്തിലാണ് അമേരിക്ക ഉപരോധം ശക്തമാക്കാൻ തീരുമാനിച്ചത്. എന്നാൽ ഇറാനിയൻ എണ്ണയുടെ 90 ശതമാനവും വാങ്ങുന്നത് ചൈനയായതിനാൽ പുതിയ ഉപരോധം ഇറാൻ എണ്ണവ്യാപാരത്തെ കാര്യമായി ബാധിച്ചേക്കില്ലെന്നാണ് സാമ്പത്തിക വിദഗ്ധരുടെ വിലയിരുത്തൽ.

Story Summary:
China strongly criticized the U.S. sanctions against Iran and foreign trading partners as “illegal and unilateral,” vowing to protect its national interests while Iran declared a 2-year strategy to counter the economic measures.