ജയസൂര്യയുടെ പാൻ-ഇന്ത്യൻ ആക്ഷൻ ത്രില്ലർ; ‘ഓപ്പറേഷൻ ത്രാൾ’ ടീസർ പുറത്തിറങ്ങി!

ഗുഡ്‌വിൽ എൻ്റർടെയ്ൻമെൻ്റ്സിൻ്റെ ബാനറിൽ രതീഷ് വേഗ രചനയും സംവിധാനവും നിർവഹിക്കുന്ന ജയസൂര്യ ചിത്രമായ ‘ഓപ്പറേഷൻ ത്രാൾ’ൻ്റെ ഔദ്യോഗിക ടീസർ പുറത്തിറങ്ങി. മലയാളം, ഹിന്ദി, തമിഴ്, തെലുങ്ക്, കന്നഡ എന്നീ അഞ്ച് ഭാഷകളിലാണ് ചിത്രം ഒരേസമയം പ്രേക്ഷകർക്ക് മുന്നിലെത്തുന്നത്. ജമ്മു കശ്മീരിലെ ത്രാളിൽ ഇന്ത്യൻ സൈന്യവും തീവ്രവാദികളും തമ്മിൽ നടന്ന ശ്രദ്ധേയമായ യഥാർത്ഥ സംഭവങ്ങളെ ആസ്പദമാക്കി ഒരുക്കുന്ന ഒരു പാൻ-ഇന്ത്യൻ ഇൻവെസ്റ്റിഗേറ്റീവ് ആക്ഷൻ ത്രില്ലറാണ് ഈ സിനിമ. ചിത്രത്തിൽ എൻ.ഐ.എ ഉദ്യോഗസ്ഥനായാണ് ജയസൂര്യ കേന്ദ്ര കഥാപാത്രത്തെ അവതരിപ്പിക്കുന്നത്.

ജമ്മു കശ്മീരിലെ സംഘർഷഭരിതമായ പശ്ചാത്തലവും രഹസ്യാന്വേഷണ പ്രവർത്തനങ്ങളുമാണ് ടീസറിന്റെ പ്രധാന ആകർഷണം. കഥയിലെ നിർണായക രഹസ്യങ്ങളൊന്നും വെളിപ്പെടുത്താതെ, സത്യം തേടിയുള്ള അന്വേഷണം എത്രത്തോളം അപകടം നിറഞ്ഞതാണെന്ന് വ്യക്തമാക്കുന്നതാണ് ടീസർ ദൃശ്യങ്ങൾ. തീവ്രമായ അന്വേഷണ രംഗങ്ങൾക്കൊപ്പം ഹൈ-സ്റ്റേക്സ് ആക്ഷൻ മുഹൂർത്തങ്ങൾക്കും ചിത്രം ഏറെ പ്രാധാന്യം നൽകുന്നുണ്ട്. കേരളം, കോയമ്പത്തൂർ, ഡെൽഹി, മണാലി, ലഡാക്ക് തുടങ്ങി രാജ്യത്തിന്റെ വിവിധ ഭാഗങ്ങളിലായാണ് ഈ ബ്രഹ്മാണ്ഡ ചിത്രം വിപുലമായി ചിത്രീകരിച്ചിരിക്കുന്നത്.

Also Read: ദിലീപ് ചിത്രമായ ‘നീക്ക’ത്തിന്റെ ഓണം സ്പെഷ്യൽ പോസ്റ്റർ പുറത്ത്!

മുരളി ശർമ്മ, വിനയ് റായ്, സിദ്ദിഖ്, സായ് കുമാർ, റിതിക സിംഗ് തുടങ്ങി പ്രമുഖരായ വലിയൊരു താരനിര തന്നെ ചിത്രത്തിലുണ്ട്. ജോബി ജോർജ് തടത്തിൽ നിർമ്മിക്കുന്ന ഈ ചിത്രത്തിന്റെ സംഗീതവും പശ്ചാത്തല സംഗീതവും സംവിധായകൻ രതീഷ് വേഗ തന്നെയാണ് ഒരുക്കിയിരിക്കുന്നത്. വലിയ ക്യാൻവാസിൽ ഒരുങ്ങുന്ന ഒരു മികച്ച സിനിമാറ്റിക് അനുഭവം തന്നെ ചിത്രം പ്രേക്ഷകർക്ക് സമ്മാനിക്കുമെന്നാണ് ടീസർ നൽകുന്ന സൂചന.

The post ജയസൂര്യയുടെ പാൻ-ഇന്ത്യൻ ആക്ഷൻ ത്രില്ലർ; ‘ഓപ്പറേഷൻ ത്രാൾ’ ടീസർ പുറത്തിറങ്ങി! appeared first on Express Kerala.