തിരുവോണ ദിനത്തിൽ ഡോക്ടറില്ല; ഷോളയൂർ പ്രാഥമിക ആരോഗ്യകേന്ദ്രത്തിൽ ചികിത്സ കിട്ടാതെ രോഗികൾ വലഞ്ഞെന്ന് പരാതി

അട്ടപ്പാടി: തിരുവോണ ദിനത്തിൽ ഷോളയൂർ പ്രാഥമിക ആരോഗ്യകേന്ദ്രത്തിൽ ഡോക്ടറുടെയും ആവശ്യമായ ജീവനക്കാരുടെയും സേവനം ലഭിക്കാതെ രോഗികൾ ബുദ്ധിമുട്ടിലായതായി പരാതി (Attappady Sholayar PHC). ഇന്നലെ ഉച്ചയ്ക്ക് ശേഷം ആശുപത്രിയിൽനിന്ന് പോയ ഡോക്ടർ ഇതുവരെ തിരിച്ചെത്തിയിട്ടില്ലെന്നും പകരം ചികിത്സാ സംവിധാനം ഒരുക്കിയിട്ടില്ലെന്നുമാണ് നാട്ടുകാരുടെയും രോഗികളുടെ ബന്ധുക്കളുടെയും ആരോപണം.

അപസ്മാരം അനുഭവപ്പെട്ട മൂന്നര മാസം പ്രായമുള്ള കുഞ്ഞുമായി എത്തിയ കുടുംബത്തിന് മണിക്കൂറുകളോളം ആശുപത്രിയിൽ കാത്തിരിക്കേണ്ടിവന്നതായും പരാതിയുണ്ട്. അടിയന്തര ചികിത്സ ആവശ്യമായ സാഹചര്യത്തിൽ പോലും ഡോക്ടറുടെ സേവനം ലഭിക്കാത്തത് രോഗികളെയും ബന്ധുക്കളെയും ആശങ്കയിലാക്കിയിരിക്കുകയാണ്.

ആശുപത്രി വളപ്പിൽ ആംബുലൻസ് ഉണ്ടായിരുന്നെങ്കിലും വാഹനം ഓടിക്കാൻ ഡ്രൈവറില്ലാത്ത സ്ഥിതിയാണെന്നും നാട്ടുകാർ ആരോപിച്ചു. നിലവിൽ ഒരു സ്റ്റാഫ് നഴ്‌സും ഒരു അറ്റൻഡറും മാത്രമാണ് ആശുപത്രിയിൽ സേവനത്തിലുള്ളതെന്നാണ് വിവരം.

എസ്റ്റേറ്റ് മേഖലകളിൽ നിന്നുൾപ്പെടെ ദിവസേന നിരവധി രോഗികൾ ചികിത്സയ്ക്കായി എത്തുന്ന ആരോഗ്യകേന്ദ്രമാണിത്. മറ്റ് ആശുപത്രികളിലേക്ക് ചികിത്സ തേടി പോകണമെങ്കിൽ ഏകദേശം 30 കിലോമീറ്റർ വരെ യാത്ര ചെയ്യേണ്ട സാഹചര്യമുണ്ട്. അടിയന്തര ചികിത്സ ആവശ്യമായ രോഗികൾക്ക് ഇത് വലിയ ബുദ്ധിമുട്ടാണ് സൃഷ്ടിക്കുന്നത്.

ഡോക്ടർമാർ കൂട്ടത്തോടെ അവധിയെടുത്തതിനെ തുടർന്നാണ് തിരുവോണ ദിനത്തിൽ ചികിത്സാ സേവനം മുടങ്ങിയതെന്നാണ് ആരോപണം. ആരോഗ്യവകുപ്പിന്റെ ഭാഗത്തുനിന്ന് അടിയന്തരമായി പകരം സംവിധാനം ഏർപ്പെടുത്താത്തതിനെതിരെയും ജീവനക്കാരുടെ അഭാവത്തിനെതിരെയും പ്രദേശത്ത് പ്രതിഷേധം ശക്തമാകുകയാണ്.

Story Summary:
Patients at the Sholayar Primary Health Centre in Attappady reportedly faced difficulties due to the absence of doctors and staff on Thiruvonam day. A family with a three-and-a-half-month-old child suffering from seizures allegedly had to wait for hours, while the lack of an ambulance driver has also raised concerns.