രക്ഷാബന്ധൻ ദിനത്തിൽ ദുരന്തം; സഹോദരന് രാഖി കെട്ടാനെത്തിയ 16കാരി കുഴൽക്കിണറിൽ വീണ് മരിച്ചു

കാൻപുർ: രക്ഷാബന്ധൻ ദിനത്തിൽ സഹോദരന് രാഖി കെട്ടാനെത്തിയ 16കാരി ഉപേക്ഷിച്ച കുഴൽക്കിണറിൽ വീണ് മരിച്ചു (Kanpur borewell accident). കാൻപൂരിൽ നിന്ന് 35 കിലോമീറ്റർ അകലെയുള്ള പുർവാമിർ ഗ്രാമത്തിലാണ് ദാരുണമായ സംഭവം.

വെള്ളിയാഴ്ച രാവിലെ 6.40ഓടെയാണ് വീടിന്റെ മുറ്റത്തുണ്ടായിരുന്ന ഏകദേശം 20 അടി ആഴമുള്ള കുഴൽക്കിണറിൽ പെൺകുട്ടി വീണത്. നിർമാണം പൂർത്തിയാക്കാതെ ഉപേക്ഷിച്ച നിലയിലായിരുന്നു കുഴൽക്കിണർ.

വിവരമറിഞ്ഞ് എൻഡിആർഎഫ് ഉൾപ്പെടെയുള്ള രക്ഷാപ്രവർത്തക സംഘം സ്ഥലത്തെത്തി. മണ്ണുമാന്തി ഉപയോഗിച്ച് കുഴൽക്കിണറിന് സമാന്തരമായി മറ്റൊരു കുഴിയെടുത്താണ് രക്ഷാപ്രവർത്തനം നടത്തിയത്. വെള്ളിയാഴ്ച ഉച്ചയോടെ ഏകദേശം 12 അടി ആഴത്തിൽ വരെ കുഴിയെടുത്ത് രക്ഷാപ്രവർത്തനം പുരോഗമിച്ചിരുന്നു.

#WATCH | Kanpur, UP: Rescue operation underway after a 16-year-old girl falls into a borewell. pic.twitter.com/zV6TYtK769
— ANI (@ANI) August 28, 2026

മണ്ണിടിച്ചിൽ സാധ്യതയുള്ള പ്രദേശമായതിനാൽ ഏറെ ജാഗ്രതയോടെയാണ് രക്ഷാപ്രവർത്തനം നടത്തിയത്. മണിക്കൂറുകൾ നീണ്ട ശ്രമത്തിനൊടുവിൽ പെൺകുട്ടിയെ കുഴൽക്കിണറിൽ നിന്ന് പുറത്തെടുത്തു. തുടർന്ന് സമീപത്തെ പ്രാഥമികാരോഗ്യ കേന്ദ്രത്തിലെത്തിച്ചെങ്കിലും മരിച്ചതായി ഡോക്ടർമാർ സ്ഥിരീകരിച്ചു.

മൂന്ന് വർഷം മുമ്പാണ് ഇവിടെ കുഴൽക്കിണർ നിർമിക്കാൻ ശ്രമിച്ചത്. ഏകദേശം 20 അടി ആഴത്തിൽ എത്തിയപ്പോൾ മണ്ണിടിഞ്ഞതിനെ തുടർന്ന് നിർമാണം ഉപേക്ഷിക്കുകയായിരുന്നു. പിന്നീട് മറ്റൊരു സ്ഥലത്ത് പുതിയ കുഴൽക്കിണർ നിർമിച്ചതായാണ് വിവരം. ഉപേക്ഷിച്ച കുഴൽക്കിണർ സുരക്ഷിതമായി അടച്ചുപൂട്ടാതിരുന്നതാണ് അപകടത്തിന് കാരണമായത്.

Story Summary:
A 16-year-old girl died after falling into an abandoned 20-foot-deep borewell in Kanpur on Raksha Bandhan. Rescue teams, including the NDRF, conducted a hours-long operation but could not save her.