ടാറ്റ മോട്ടോഴ്സിന്റെ സ്റ്റൈലിഷ് എസ്യുവി-കൂപ്പെ മോഡലായ ‘ടാറ്റ കർവ്’ വിപണിയിൽ തരംഗമാകുന്നു. പുറത്തിറങ്ങി ചുരുങ്ങിയ കാലയളവിനുള്ളിൽ തന്നെ 50,000 യൂണിറ്റുകൾ എന്ന നാഴികക്കല്ല് പിന്നിട്ടിരിക്കുകയാണ് ഈ വാഹനം. 2024 ഓഗസ്റ്റിൽ ഇലക്ട്രിക് പതിപ്പായും സെപ്റ്റംബറിൽ പെട്രോൾ, ഡീസൽ പതിപ്പുകളായും എത്തിയ കർവ്, ടാറ്റയുടെ മൊത്തം എസ്യുവി വിൽപ്പനയുടെ എട്ട് ശതമാനത്തിലധികം വിഹിതം ഇതിനോടകം സ്വന്തമാക്കി.
വിപണിയിലെത്തി 16 മാസത്തിനുള്ളിൽ 50,091 യൂണിറ്റുകളാണ് കർവ് വിറ്റഴിച്ചത്. 2024 ഒക്ടോബറിലെ ഉത്സവ സീസണിലാണ് വാഹനം ഏറ്റവും ഉയർന്ന പ്രതിമാസ വിൽപ്പന (5,351 യൂണിറ്റുകൾ) രേഖപ്പെടുത്തിയത്. നിലവിൽ ഏകദേശം 50 വേരിയന്റുകളിൽ കർവ് ലഭ്യമാണ്. ഇതിൽ 20 പെട്രോൾ, 14 ഡീസൽ, 7 ഇലക്ട്രിക് പതിപ്പുകൾ ഉൾപ്പെടുന്നു.
Also Read: രക്ഷാപ്രവർത്തകർക്കും തുറക്കാനാവില്ല! അപകടത്തിൽ വില്ലനാകുന്ന ഇലക്ട്രിക് ഡോർ ഹാൻഡിലുകൾ; കാർ കമ്പനികൾക്ക് തിരിച്ചടി
ഐസിഇ (ICE) പതിപ്പിന് 9.65 ലക്ഷം രൂപ മുതൽ 18.73 ലക്ഷം രൂപ വരെയാണ് എക്സ്-ഷോറൂം വില. മൂന്ന് എഞ്ചിൻ ഓപ്ഷനുകളിൽ ലഭ്യമായ വാഹനത്തിന് 6-സ്പീഡ് മാനുവൽ, 7-സ്പീഡ് ഡ്യുവൽ-ക്ലച്ച് ഓട്ടോമാറ്റിക് ഗിയർബോക്സ് ഓപ്ഷനുകളുണ്ട്. 17.49 ലക്ഷം രൂപ മുതൽ ആരംഭിക്കുന്ന കർവ് ഇവി (EV) പതിപ്പ് ഹ്യുണ്ടായി ക്രെറ്റ ഇലക്ട്രിക്, മഹീന്ദ്ര BE 6 എന്നിവരുമായാണ് പ്രധാനമായും മത്സരിക്കുന്നത്. 45kWh, 55kWh എന്നിങ്ങനെ രണ്ട് ബാറ്ററി പാക്കുകളിൽ ലഭ്യമായ ഇവി പതിപ്പ് ഒറ്റ ചാർജിൽ 502 കിലോമീറ്റർ വരെ റേഞ്ച് വാഗ്ദാനം ചെയ്യുന്നു.
സുരക്ഷയുടെ കാര്യത്തിലും വിട്ടുവീഴ്ചയില്ലാത്ത കർവിന് ഭാരത് എൻസിഎപി ക്രാഷ് ടെസ്റ്റിൽ 5-സ്റ്റാർ റേറ്റിംഗ് ലഭിച്ചിട്ടുണ്ട്. സിട്രോൺ ബസാൾട്ട് ആണ് കർവിന്റെ പ്രധാന എതിരാളി എങ്കിലും ക്രെറ്റ, സെൽറ്റോസ്, ഗ്രാൻഡ് വിറ്റാര തുടങ്ങിയ മിഡ്-സൈസ് എസ്യുവികൾക്കും കർവ് കനത്ത വെല്ലുവിളിയാണ് ഉയർത്തുന്നത്.
The post ഇന്ത്യക്കാർക്ക് ഇതിനോട് പ്രണയം! 50,000 യൂണിറ്റുകൾ വിറ്റഴിച്ച് ടാറ്റ കർവ്വ്; വിപണിയിൽ തരംഗമായി കൂപ്പെ എസ്യുവി appeared first on Express Kerala.
