‘മകനോട് ഒന്നു നല്ലത് പറഞ്ഞിട്ടില്ല, ഞാൻ ചെയ്തത് തെറ്റ്’; മനസുതുറന്ന് ജാക്കി ചാൻ

ആയോധനകലയിലെ ഇതിഹാസതാരം ജാക്കി ചാൻ തന്റെ പിതൃത്വത്തെക്കുറിച്ചും മകൻ ജെയ്‌സി ചാനുമായുള്ള ബന്ധത്തെക്കുറിച്ചും നടത്തിയ തുറന്നുപറച്ചിലുകൾ ശ്രദ്ധേയമാകുന്നു. തന്റെ കർക്കശമായ സ്വഭാവം മകനുമായുള്ള ബന്ധം വഷളാക്കിയെന്നും അവനെ വളർത്തുന്നതിൽ തനിക്ക് വലിയ വീഴ്ചകൾ പറ്റിയെന്നും താരം സമ്മതിച്ചു. തന്റെ പുതിയ ചിത്രമായ ‘വിസ്‌പേഴ്‌സ് ഓഫ് ഗ്രാറ്റിറ്റ്യൂഡ്’ എന്ന സിനിമയുടെ പ്രചാരണത്തിനിടെയാണ് ജാക്കി ചാൻ മനസ്സുതുറന്നത്.

ശകാരങ്ങൾ തകർത്ത ബന്ധം

പഴയകാലത്ത് താനൊരു കർക്കശക്കാരനായ അച്ഛനായിരുന്നുവെന്ന് ജാക്കി ചാൻ പറയുന്നു. “പണ്ട്, മകനെ കാണുമ്പോഴെല്ലാം ഞാൻ അവനെ ശകാരിക്കുമായിരുന്നു. ഒരു നല്ല വാക്ക് പോലും അവനോട് പറഞ്ഞിട്ടില്ല. ടിവിയിൽ വരുമ്പോൾ പോലും അവനെ വിമർശിക്കാനാണ് ഞാൻ ശ്രമിച്ചത്. സത്യത്തിൽ ഞാൻ ചെയ്തത് തെറ്റാണ്,” ജാക്കി ചാൻ പറഞ്ഞു.

മകന് കൂടുതൽ സ്വാതന്ത്ര്യം നൽകേണ്ടതായിരുന്നുവെന്നും അമിതമായ നിയന്ത്രണങ്ങൾ അവനെ ഭയപ്പെടുത്തിയെന്നും താരം കൂട്ടിച്ചേർത്തു. ഒരിക്കൽ ജെയ്‌സി ജന്മദിനാശംസകൾ നേരാൻ വിളിച്ചപ്പോൾ, ഇത്തരം വിശേഷദിവസങ്ങളിൽ മാത്രം വിളിച്ചാൽ പോരെന്നും ഇടയ്ക്കിടെ വിളിക്കണമെന്നും പറഞ്ഞ് താൻ ശകാരിച്ചു. എന്നാൽ ആ ശകാരം കേട്ടതോടെ മകൻ പിന്നീട് ഫോൺ വിളിക്കുന്നത് പോലും നിർത്തിയെന്നും ഏകദേശം ഒരു വർഷത്തോളം അവർ തമ്മിൽ സംസാരിച്ചില്ലെന്നും അദ്ദേഹം വെളിപ്പെടുത്തി.

Also Read: ബോക്സോഫീസ് കീഴടക്കാൻ സൂര്യ; വൻ തുകയ്ക്ക് ഡിജിറ്റൽ അവകാശങ്ങൾ വിറ്റുപോയി!

മാറ്റം വന്ന സമീപനം

പ്രായം കൂടുന്തോറും തന്റെ നിലപാടുകളിൽ മാറ്റം വരുത്താൻ ശ്രമിക്കുന്നുണ്ടെന്ന് 71-കാരനായ ജാക്കി ചാൻ പറഞ്ഞു. “കർക്കശക്കാരനായ അച്ഛൻ” എന്ന പ്രതിച്ഛായ കൈവിട്ട് മകന്റെ സന്തോഷത്തിന് മുൻഗണന നൽകാനാണ് ഇപ്പോൾ ആഗ്രഹിക്കുന്നത്. മകനിൽ ഇപ്പോൾ വലിയ പ്രതീക്ഷകൾ അടിച്ചേൽപ്പിക്കുന്നില്ലെന്നും അവൻ സുരക്ഷിതനും സന്തുഷ്ടനുമായി ജീവിക്കുന്നത് കാണാൻ മാത്രമാണ് ആഗ്രഹിക്കുന്നതെന്നും അദ്ദേഹം പറഞ്ഞു.

ജെയ്‌സി ചാൻ: അച്ഛന്റെ പാതയിൽ

ജാക്കി ചാന്റെയും തായ്‌വാൻ നടി ലിൻ ഫെങ്‌ജിയാവോയുടെയും ഏക മകനാണ് 43-കാരനായ ജെയ്‌സി ചാൻ. അഭിനയത്തിലും സംഗീതത്തിലും താൽപ്പര്യമുള്ള ജെയ്‌സി ‘ഗുഡ് നൈറ്റ് ബെയ്‌ജിങ്‌’ എന്ന ചിത്രം സംവിധാനം ചെയ്യുകയും നിരവധി ആൽബങ്ങളിൽ പ്രവർത്തിക്കുകയും ചെയ്തിട്ടുണ്ട്. 2014-ൽ മയക്കുമരുന്ന് കേസിൽപ്പെട്ട് ജെയ്‌സി ആറുമാസം തടവുശിക്ഷ അനുഭവിച്ചിരുന്നു. ഈ സംഭവം തന്നെ ഏറെ വേദനിപ്പിച്ചുവെന്നും എന്നാൽ ശിക്ഷാകാലം മകനെ കൂടുതൽ പക്വതയുള്ളവനാക്കാൻ സഹായിച്ചുവെന്നും മുൻപ് ജാക്കി ചാൻ പ്രതികരിച്ചിരുന്നു.

സിനിമയിലെ അച്ഛനും മകനും തമ്മിലുള്ള വൈകാരികമായ രംഗങ്ങൾ കണ്ടപ്പോഴാണ് തന്റെ ജീവിതത്തെക്കുറിച്ചും മകനുമായുള്ള ബന്ധത്തെക്കുറിച്ചും ചിന്തിക്കാൻ പ്രേരിപ്പിച്ചതെന്നും താരം വ്യക്തമാക്കി.

The post ‘മകനോട് ഒന്നു നല്ലത് പറഞ്ഞിട്ടില്ല, ഞാൻ ചെയ്തത് തെറ്റ്’; മനസുതുറന്ന് ജാക്കി ചാൻ appeared first on Express Kerala.