കാസർഗോഡ്: 64-മത് കേരള സ്കൂൾ കലോത്സവത്തിന്റെ ആവേശമുണർത്തിക്കൊണ്ട് കാസർഗോഡ് ജില്ലയിൽ നിന്നും സ്വർണ്ണക്കപ്പ് പ്രയാണം ആരംഭിച്ചു. മൊഗ്രാൽ ഗവൺമെൻ്റ് വൊക്കേഷണൽ ഹയർസെക്കൻഡറി സ്കൂളിൽ നടന്ന ചടങ്ങിൽ മഞ്ചേശ്വരം എം.എൽ.എ കെ.എം അഷ്റഫ് സ്വർണ്ണക്കപ്പ് കൈമാറി യാത്ര ഉദ്ഘാടനം ചെയ്തു. ജില്ലാ പഞ്ചായത്ത് പ്രസിഡൻ്റ് സാബു എബ്രഹാം അധ്യക്ഷത വഹിച്ച ചടങ്ങിൽ വിദ്യാർത്ഥികളും അധ്യാപകരും ജനപ്രതിനിധികളുമടക്കം വൻ ജനവലിയാണ് കലോത്സവ വിജയികൾക്ക് നൽകുന്ന കിരീടത്തിന് ആവേശകരമായ യാത്രയയപ്പ് നൽകാൻ എത്തിയത്. പോലീസ് സുരക്ഷയിൽ തുറന്ന വാഹനത്തിൽ ഒരുക്കിയിരിക്കുന്ന സ്വർണ്ണക്കപ്പ് ജനുവരി 13-ന് കലോത്സവ വേദിയായ തൃശൂരിലെ തേക്കിൻകാട് മൈതാനിയിൽ എത്തിച്ചേരും.
വിവിധ ജില്ലകളിലൂടെ കടന്നുപോകുന്ന ഈ യാത്രയ്ക്ക് 36 പ്രധാന കേന്ദ്രങ്ങളിൽ സ്വീകരണം ഒരുക്കിയിട്ടുണ്ട്. 117.5 പവൻ തൂക്കമുള്ള സ്വർണ്ണക്കപ്പ് പൊതുജനങ്ങൾക്ക് നേരിട്ട് കാണാനുള്ള അവസരവും യാത്രയിലുടനീളം ഉണ്ടാകും. സുരക്ഷാ ക്രമീകരണങ്ങളുടെ ഭാഗമായി ഓരോ ദിവസവും യാത്ര അവസാനിക്കുന്ന ഇടങ്ങളിലെ സബ് ട്രഷറികളിലാകും കപ്പ് സൂക്ഷിക്കുക. കഴിഞ്ഞ വർഷം കിരീടം നേടിയ തൃശൂർ ജില്ലയിലെ സബ് ട്രഷറിയിലായിരുന്നു ഒരു വർഷമായി ഈ സ്വർണ്ണക്കപ്പ് സൂക്ഷിച്ചിരുന്നത്. ജനുവരി 13-ന് വൈകുന്നേരം പ്രധാന വേദിയിൽ കപ്പ് എത്തുന്നതോടെ കലാമാമാങ്കത്തിന് ഔദ്യോഗികമായി തുടക്കമാകും. നിലവിലെ ചാമ്പ്യന്മാരായ തൃശൂർ ആതിഥ്യമരുളുന്ന ഇത്തവണത്തെ പോരാട്ടത്തിൽ സുവർണ്ണ കിരീടം ആര് സ്വന്തമാക്കുമെന്ന ആകാംക്ഷയിലാണ് കായിക-കലാ കേരളം.
The post സ്വർണ്ണക്കപ്പ് പ്രയാണം തുടങ്ങി; കേരളം ഇനി തൃശൂരിലെ സ്കൂൾ കലോത്സവ മാമാങ്കത്തിലേക്ക്! appeared first on Express Kerala.
