രാജ്യത്തെ കെട്ടിടങ്ങളിലും ഫ്ലാറ്റുകളിലും ലഭിക്കുന്ന ഇന്റർനെറ്റ്, ഫോൺ കണക്റ്റിവിറ്റി എന്നിവയുടെ നിലവാരം പരിശോധിച്ച് ഇനി ‘ഡിജിറ്റൽ റേറ്റിംഗ്’ നൽകും. ഇതിനായി പ്രത്യേക ഏജൻസിയെ എംപാനൽ ചെയ്തുകൊണ്ട് ടെലികോം റെഗുലേറ്ററി അതോറിറ്റി ഓഫ് ഇന്ത്യ ഉത്തരവിറക്കി. ആർഎനെക്സ്റ്റ് ടെക്നോളജീസിനെ ആണ് രാജ്യത്തെ ആദ്യ ഡിജിറ്റൽ കണക്റ്റിവിറ്റി റേറ്റിംഗ് ഏജൻസിയായി (ഡിസിആർഎ) തിരഞ്ഞെടുത്തത്.
ഡിജിറ്റൽ കണക്റ്റിവിറ്റി റേറ്റിംഗ് ഏജൻസി നടപ്പിലാക്കുന്ന സ്റ്റാൻഡേർഡ് സ്റ്റാർ-റേറ്റിംഗ് സംവിധാനം റിയൽ എസ്റ്റേറ്റ് മേഖലയിൽ വലിയ മാറ്റങ്ങൾക്ക് വഴിയൊരുക്കും. ഡെവലപ്പർമാർ, പ്രോപ്പർട്ടി മാനേജർമാർ, വീട് വാങ്ങുന്നവർ എന്നിവർക്കിടയിൽ സുതാര്യമായ ഒരു മാനദണ്ഡം ഉറപ്പാക്കാൻ ഇതിലൂടെ സാധിക്കും. കെട്ടിടങ്ങൾ രൂപകൽപ്പന ചെയ്യുന്ന ഘട്ടത്തിൽ തന്നെ മികച്ച ഡിജിറ്റൽ ഇൻഫ്രാസ്ട്രക്ചർ ഒരുക്കാൻ ഡെവലപ്പർമാരെ ഈ റേറ്റിംഗ് പ്രോത്സാഹിപ്പിക്കും.
Also Read: ഉറക്കം നോക്കി രോഗം പ്രവചിക്കും; ‘സ്ലീപ്പ് എഫ്എം’ എഐ മോഡലുമായി സ്റ്റാൻഫോർഡ്
ഒരു കെട്ടിടത്തിന് എത്രത്തോളം ഡിജിറ്റൽ ശേഷിയുണ്ടെന്ന് സ്റ്റാർ റേറ്റിംഗിലൂടെ ആർക്കും എളുപ്പത്തിൽ മനസ്സിലാക്കാം. മികച്ച ഇന്റർനെറ്റ് സൗകര്യമുള്ള വീടുകളോ ഓഫീസുകളോ തിരഞ്ഞെടുക്കാൻ വാങ്ങുന്നവർക്കും വാടകക്കാർക്കും കമ്പനികൾക്കും ഈ റേറ്റിംഗ് സഹായകമാകും. ഗുണനിലവാരമുള്ള കണക്റ്റിവിറ്റി ഉറപ്പാക്കുന്ന പ്രോപ്പർട്ടികൾക്ക് വിപണിയിൽ മികച്ച മൂല്യം ലഭിക്കാൻ ഇത് കാരണമാകും. ഗൃഹോപകരണങ്ങൾ ഇലക്ട്രിക് പോയിന്റുകൾ നോക്കി വാങ്ങുന്നത് പോലെ, ഇനി കെട്ടിടങ്ങളുടെ ഡിജിറ്റൽ ശേഷി നോക്കി വാങ്ങാൻ ഉപഭോക്താക്കൾക്ക് സാധിക്കും.
ഇന്ത്യയിൽ ഇന്റർനെറ്റ് ഉപഭോക്താക്കളുടെ എണ്ണം 100 കോടി കടന്ന സാഹചര്യത്തിലാണ് ട്രായ്യുടെ ഈ നീക്കം. ഇന്ന് ജോലി, വിദ്യാഭ്യാസം, ബാങ്കിംഗ് തുടങ്ങിയ എല്ലാ കാര്യങ്ങൾക്കും തടസ്സമില്ലാത്ത കണക്റ്റിവിറ്റി അനിവാര്യമാണ്. എന്നാൽ പല പുതിയ കെട്ടിടങ്ങളിലും ഇത്തരം സൗകര്യങ്ങൾ മുൻകൂട്ടി പ്ലാൻ ചെയ്യാത്തതിനാൽ താമസം തുടങ്ങുമ്പോൾ ഇന്റർനെറ്റ് വേഗത കുറയുന്നതും റേഞ്ച് ലഭിക്കാത്തതും വലിയ പരാതികൾക്ക് കാരണമാകുന്നുണ്ട്. ട്രായ്യുടെ ഈ തീരുമാനം ആർഎനെക്സ്റ്റിനെ സംബന്ധിച്ചിടത്തോളം വലിയൊരു നാഴികക്കല്ലാണെന്ന് സ്പേസ് വേൾഡ് ഗ്രൂപ്പ് ചെയർമാനും സ്ഥാപകനുമായ അങ്കിത് ഗോയൽ അഭിപ്രായപ്പെട്ടു.
The post കെട്ടിടങ്ങൾക്കും ഇനി ‘ഡിജിറ്റൽ സ്റ്റാർ റേറ്റിംഗ്’; ഏജൻസിയെ നിയമിച്ച് ട്രായ് appeared first on Express Kerala.
