ഇന്ത്യൻ ഇലക്ട്രിക് ഇരുചക്ര വാഹന വിപണിയിൽ 2025-ൽ വൻ അഴിച്ചുപണികൾ നടന്നതായി ഫെഡറേഷൻ ഓഫ് ഓട്ടോമൊബൈൽ ഡീലേഴ്സ് അസോസിയേഷൻസ് (FADA) പുറത്തുവിട്ട കണക്കുകൾ വ്യക്തമാക്കുന്നു. വിപണിയിലെ ഒന്നാമനായിരുന്ന ഓല ഇലക്ട്രിക് വൻ തകർച്ച നേരിട്ടപ്പോൾ, ടിവിഎസ് ഒന്നാം സ്ഥാനം പിടിച്ചെടുക്കുകയും ഏതർ ഉൾപ്പെടെയുള്ള കമ്പനികൾ കരുത്ത് തെളിയിക്കുകയും ചെയ്തു.
ഓലയ്ക്ക് കനത്ത തിരിച്ചടി, ആതർ മുന്നിലേക്ക്
ഒരുകാലത്ത് വിപണി അടക്കിവാണിരുന്ന ഓല ഇലക്ട്രിക്കിന്റെ വാർഷിക വിൽപ്പനയിൽ 51.11% ഇടിവാണ് രേഖപ്പെടുത്തിയത്. 2024-ൽ 407,700 യൂണിറ്റുകൾ വിറ്റഴിച്ച ഓലയ്ക്ക് 2025-ൽ കേവലം 199,318 യൂണിറ്റുകൾ മാത്രമേ വിൽക്കാൻ സാധിച്ചുള്ളൂ. ഇതോടെ ഓലയെ മറികടന്ന് ആതർ എനർജി മൂന്നാം സ്ഥാനത്തെത്തി. ആതർ റിസ്റ്റ, 450 സീരീസ് എന്നിവയുടെ കരുത്തിൽ 58.1% വളർച്ചയോടെ 200,797 യൂണിറ്റുകളാണ് ആതർ വിറ്റഴിച്ചത്.
Also Read: തിരിച്ചുവരവിൽ ചരിത്രം കുറിച്ച് ടാറ്റ സിയറ; ഒരു മാസം കൊണ്ട് നേടിയത് റെക്കോർഡ് ബുക്കിംഗ്!
വിപണിയിലെ കരുത്തർ
ടിവിഎസ് മോട്ടോർ (ഒന്നാം സ്ഥാനം): ഐക്യൂബ്, ഓർബിറ്റർ മോഡലുകളുടെ സ്വീകാര്യത ടിവിഎസിനെ ഒന്നാമതെത്തിച്ചു. 35.35% വളർച്ചയോടെ 298,881 യൂണിറ്റുകൾ കമ്പനി വിറ്റഴിച്ചു.
ബജാജ് ഓട്ടോ (രണ്ടാം സ്ഥാനം): ചേതക് ഇവിയുടെ ജനപ്രീതി ബജാജിനെ രണ്ടാം സ്ഥാനത്ത് എത്തിച്ചു. 39.34% വളർച്ചയോടെ 269,847 യൂണിറ്റുകളാണ് ബജാജ് വിറ്റത്.
ഹീറോ മോട്ടോകോർപ്പ് (അതിവേഗ വളർച്ച): വിഡ (Vida) ബ്രാൻഡിന് കീഴിൽ വിസ്മയിപ്പിക്കുന്ന വളർച്ചയാണ് ഹീറോ കാഴ്ചവെച്ചത്. 149.74% വളർച്ചയോടെ 109,168 യൂണിറ്റുകൾ വിൽക്കാൻ ഹീറോയ്ക്ക് സാധിച്ചു.
വിപണി മൊത്തത്തിൽ വളരുന്നു
ഓലയ്ക്ക് തിരിച്ചടി നേരിട്ടെങ്കിലും ഇന്ത്യൻ ഇലക്ട്രിക് ഇരുചക്ര വാഹന വിപണി മൊത്തത്തിൽ 11.36% വളർച്ച രേഖപ്പെടുത്തി. 2024-ലെ 1,149,416 യൂണിറ്റുകളിൽ നിന്ന് 2025-ൽ ആകെ വിൽപ്പന 1,279,951 യൂണിറ്റിലെത്തി.
The post വിറച്ച് ഓല, കുതിച്ച് ഏതറും ഹീറോയും! 2025-ൽ ഇന്ത്യൻ ഇലക്ട്രിക് വിപണി മാറ്റിമറിച്ച കണക്കുകൾ ഇതാ… appeared first on Express Kerala.
