തൃശൂർ: കുന്നംകുളത്ത് ഓടിക്കൊണ്ടിരുന്ന ബിഎംഡബ്ല്യു കാറിന് തീപിടിച്ചു. കുന്നംകുളം – പട്ടാമ്പി റോഡിൽ പാറയിൽ സെന്റ് ജോർജ് പള്ളിക്ക് മുന്നിൽ വെള്ളിയാഴ്ച വൈകീട്ട് ആറുമണിയോടെയാണ് അപകടം നടന്നത്. പെരുമ്പിലാവ് സ്വദേശി മണികണ്ഠനും കുടുംബവും സഞ്ചരിച്ചിരുന്ന കാറാണ് കത്തിനശിച്ചത്. പുറകെ വന്ന വാഹനത്തിലെ യാത്രക്കാരുടെ സമയോചിതമായ ഇടപെടൽ മൂലമാണ് വലിയൊരു ദുരന്തം ഒഴിവായത്.
അത്ഭുതകരമായ രക്ഷപെടൽ
കാറിന്റെ പിൻഭാഗത്തെ ഡോറിന് അടിയിൽ നിന്നും പുക ഉയരുന്നത് ശ്രദ്ധയിൽപ്പെട്ട പിന്നാലെ വന്ന യാത്രക്കാർ ഹോൺ മുഴക്കി മണികണ്ഠന് മുന്നറിയിപ്പ് നൽകുകയായിരുന്നു. ഉടൻ തന്നെ വാഹനം റോഡരികിലേക്ക് ഒതുക്കി നിർത്തി മണികണ്ഠനും ഭാര്യയും കുട്ടിയും പുറത്തിറങ്ങി. നിമിഷങ്ങൾക്കുള്ളിൽ തന്നെ കാർ പൂർണ്ണമായും തീ വിഴുങ്ങി.
നാട്ടുകാർ വിവരമറിയിച്ചതിനെത്തുടർന്ന് കുന്നംകുളം അഗ്നിരക്ഷാ സേനയും പൊലീസും സ്ഥലത്തെത്തി. തീ നിയന്ത്രിക്കാൻ കഴിയാത്ത സാഹചര്യത്തിൽ ഗുരുവായൂർ നിലയത്തിൽ നിന്നും മൂന്ന് യൂണിറ്റുകൾ കൂടി എത്തിയാണ് തീ പൂർണ്ണമായും അണച്ചത്. അപകടത്തെത്തുടർന്ന് കുന്നംകുളം – പട്ടാമ്പി പാതയിൽ ഏറെ നേരം വാഹനഗതാഗതം തടസ്സപ്പെട്ടു. ബിഎംഡബ്ല്യു 320 d മോഡൽ കാറാണ് അപകടത്തിൽപ്പെട്ടത്.
The post കുന്നംകുളത്ത് ബിഎംഡബ്ല്യു കാർ കത്തിനശിച്ചു; മണികണ്ഠനും കുടുംബവും രക്ഷപ്പെട്ടത് അത്ഭുതകരമായി appeared first on Express Kerala.
