അഞ്ച് ദിവസത്തെ പ്രവൃത്തിദിനവും മെച്ചപ്പെട്ട പെൻഷനും ആവശ്യപ്പെട്ട് സമരം ചെയ്യുന്ന ബാങ്ക് ജീവനക്കാരുടെ സംഘടനയ്ക്ക് സമരവേദി അനുവദിക്കാൻ ഡൽഹി പോലീസിന് ഡൽഹി ഹൈക്കോടതിയുടെ കർശന നിർദ്ദേശം: ജന്തർ മന്തറിന് പകരം ബദൽ വേദി തിങ്കളാഴ്ചയ്ക്കകം തീരുമാനിക്കണമെന്ന് കോടതി

ഡല്‍ഹി: അഞ്ച് ദിവസത്തെ പ്രവൃത്തിദിനം നടപ്പിലാക്കുക, പെന്‍ഷന്‍ ആനുകൂല്യങ്ങള്‍ വര്‍ദ്ധിപ്പിക്കുക തുടങ്ങി ദീര്‍ഘകാലമായി നിലനില്‍ക്കുന്ന വിവിധ ആനുകൂല്യ ആവശ്യങ്ങള്‍ ഉന്നയിച്ച് പ്രതിഷേധ സമരം നടത്തുന്ന ബാങ്ക് ജീവനക്കാരുടെ സംഘടനയായ യുണൈറ്റഡ് ഫോറം ഓഫ് ബാങ്ക് യൂണിയന്‍സിന് ജന്തര്‍ മന്തറിന് പകരം മറ്റ് അനുയോജ്യമായ സമരവേദി അനുവദിക്കുന്ന കാര്യത്തില്‍ തിങ്കളാഴ്ചയ്ക്കകം തീരുമാനമെടുക്കാന്‍ ഡല്‍ഹി ഹൈക്കോടതി ഡല്‍ഹി പോലീസിന് നിര്‍ദ്ദേശം നല്‍കി. 

സമാധാനപരമായി പ്രതിഷേധിക്കാനുള്ള സ്ഥലം ആവശ്യപ്പെട്ട് ബാങ്ക് ജീവനക്കാര്‍ക്ക് കോടതിയെ സമീപിക്കേണ്ടി വരുന്നത് ശരിയല്ലെന്ന് നിരീക്ഷിച്ച ജസ്റ്റിസ് അമിത് മഹാജന്‍ അധ്യക്ഷനായ ബെഞ്ചാണ് ഈ ഉത്തരവ് പുറപ്പെടുവിച്ചത്. 

സെപ്റ്റംബര്‍ 28 മുതല്‍ 30 വരെയുള്ള തീയതികളില്‍ ഡല്‍ഹിയില്‍ സമാധാനപരമായ ധര്‍ണ നടത്താന്‍ അനുമതി നല്‍കണമെന്ന് ആവശ്യപ്പെട്ട് ബാങ്ക് ജീവനക്കാരുടെ സംഘടന സമര്‍പ്പിച്ച ഹര്‍ജി പരിഗണിക്കുകയായിരുന്നു കോടതി.

ബാങ്ക് ജീവനക്കാരുടെയും ഓഫീസര്‍മാരുടെയും സര്‍വീസ് വ്യവസ്ഥകളുമായി ബന്ധപ്പെട്ട ചര്‍ച്ചകളില്‍ അവരെ പ്രതിനിധീകരിക്കുന്ന പ്രമുഖ സംഘടനയാണ് യുണൈറ്റഡ് ഫോറം ഓഫ് ബാങ്ക് യൂണിയന്‍സ്. സെപ്റ്റംബര്‍ 11, 18 തീയതികളില്‍ ധര്‍ണ നടത്തുന്നതിനായി മുന്‍പ് ഓഗസ്റ്റിലും സെപ്റ്റംബര്‍ ആദ്യവാരത്തിലും സമര്‍പ്പിച്ച അപേക്ഷകള്‍ പോലീസ് തള്ളിക്കളഞ്ഞതായി യൂണിയന്‍ കോടതിയെ അറിയിച്ചു. 

തുടര്‍ന്നാണ് സെപ്റ്റംബര്‍ 28 മുതല്‍ 30 വരെ മൂന്ന് ദിവസത്തെ സമരത്തിന് പോലീസിന് അപേക്ഷ നല്‍കിയതെങ്കിലും മറുപടിയൊന്നും ലഭിച്ചില്ലെന്ന് ഹര്‍ജിയില്‍ ചൂണ്ടിക്കാട്ടി. 

ഭരണഘടനയുടെ ആര്‍ട്ടിക്കിള്‍ 19(1)(a), (b) പ്രകാരം സമാധാനപരമായി ഒത്തുചേരാനും പ്രതിഷേധിക്കാനും പൗരന്മാര്‍ക്ക് അവകാശമുണ്ടെന്നും അതിന് അനുമതി നിഷേധിക്കുന്നത് മൗലികാവകാശ ലംഘനമാണെന്നും ഹര്‍ജിക്കാര്‍ വാദിച്ചു. തുടര്‍ന്ന് ഈ ഹര്‍ജിയില്‍ ഡല്‍ഹി പോലീസിന് കൃത്യമായ ബദല്‍ വേദി നിര്‍ദ്ദേശിക്കാന്‍ ഹൈക്കോടതി ഉത്തരവിടുകയായിരുന്നു.