ജി.എസ്.ടി കൗൺസിൽ യോഗം ഒക്ടോബർ 7ന്: നടപടിക്രമ ലളിതവൽക്കരണത്തിന് മുൻഗണന | GST Council

ന്യൂഡൽഹി: ഒരു വർഷത്തെ ഇടവേളയ്ക്ക് ശേഷം ഒക്ടോബർ 7-ന് ചേരുന്ന ജി.എസ്.ടി കൗൺസിൽ യോഗത്തിൽ നികുതി നിരക്ക് മാറ്റങ്ങളേക്കാൾ നടപടിക്രമങ്ങൾ ലളിതമാക്കുന്നതിനും പരിഷ്കരിക്കുന്നതിനുമാകും മുൻഗണന നൽകുകയെന്ന് ഔദ്യോഗിക വൃത്തങ്ങൾ അറിയിച്ചു. അതേസമയം, മെർച്ചന്റ് ഡിസ്കൗണ്ട് റേറ്റിന് (MDR) ഈടാക്കുന്ന 18% ജി.എസ്.ടി പുനഃപരിശോധിക്കുന്നത് അജണ്ടയിലില്ലെങ്കിലും യോഗത്തിൽ ചർച്ചയായേക്കാം. യു.പി.ഐ ഇടപാടുകളിൽ ഇത് സൃഷ്ടിക്കുന്ന അധിക സാമ്പത്തിക ബാധ്യത കണക്കിലെടുത്താണിത്.(GST Council October 7 Meeting Focus On Process Reforms)

സപ്ലയർമാർ നികുതി അടയ്ക്കുന്നതിൽ വീഴ്ച വരുത്തിയാൽ ഉൽപ്പന്നങ്ങൾ വാങ്ങിയ വ്യാപാരികൾക്ക് ഇൻപുട്ട് ടാക്സ് ക്രെഡിറ്റ് തടയുന്ന നിലവിലെ രീതി വലിയ നിയമതർക്കങ്ങൾക്ക് വഴിതുറന്നിരുന്നു. കൃത്യമായി നികുതി പാലിക്കുന്ന വ്യാപാരികളുടെ ഐ.ടി.സി അവകാശം സംരക്ഷിക്കാനുള്ള പുതിയ മാർഗ്ഗരേഖകൾ കൗൺസിൽ പരിശോധിക്കും. പ്രതിമാസം 2.5 ലക്ഷം രൂപയ്ക്ക് മുകളിൽ ടാക്സ് ക്രെഡിറ്റ് കൈമാറുന്ന വൻകിട വ്യവസായങ്ങളുടെ ജി.എസ്.ടി രജിസ്ട്രേഷൻ വേഗത്തിലാക്കാനും, രജിസ്ട്രേഷൻ റദ്ദാക്കൽ നടപടികളിൽ ഏകീകൃത സ്വഭാവം വരുത്താനും ലക്ഷ്യമിട്ടുള്ള മാർഗ്ഗരേഖകൾ യോഗത്തിൽ അന്തിമമാക്കും.

മോട്ടോർ വാഹനങ്ങൾ, ഫുഡ് ആന്റ് ബെവറേജസ്, ഔട്ട്ഡോർ കേറ്ററിംഗ്, ഹെൽത്ത് സർവീസസ്, ക്ലബ് അംഗത്വങ്ങൾ, കെട്ടിട നിർമ്മാണം എന്നിവയ്ക്ക് നിലവിലുള്ള ഇൻപുട്ട് ടാക്സ് ക്രെഡിറ്റ് നിയന്ത്രണങ്ങൾ നീക്കം ചെയ്യുന്നത് കൗൺസിലിന്റെ പരിഗണനയിലുണ്ട്. ഓട്ടോമൊബൈൽ ഡീലർമാർക്കിടയിൽ കെട്ടിക്കിടക്കുന്ന 2,500 കോടി രൂപയുടെ കോമ്പൻസേഷൻ സെസ് ക്രെഡിറ്റുമായി ബന്ധപ്പെട്ട് സുപ്രീം കോടതിയിലുള്ള ഹർജിയും ഈ ഘട്ടത്തിൽ ശ്രദ്ധേയമാണ്.

Story Summary

The GST Council meeting scheduled for October 7 will focus on process reforms, particularly protecting buyers from ITC losses due to supplier tax defaults and simplifying registration for large businesses. Though not officially on the agenda, a review of the 18% GST on Merchant Discount Rate (MDR) for digital payments may also be considered.