ഗാർട്‌നർ മാജിക് ക്വാഡ്രന്റിൽ മൂന്നാം തവണയും ഫ്ളൈടെക്സ്റ്റ്; ടെലികോം എഐ രംഗത്ത് ആഗോള അംഗീകാരം | Flytxt

തിരുവനന്തപുരം: ടെക്നോപാർക്ക് ആസ്ഥാനമായി പ്രവർത്തിക്കുന്ന എന്റർപ്രൈസ് എഐ സേവനദാതാക്കളായ ഫ്ളൈടെക്സ്റ്റിന് ആഗോള അംഗീകാരം (Flytxt). ടെലികോം മേഖലയിലെ മികച്ച എഐ സൊല്യൂഷൻ ദാതാക്കളെ വിലയിരുത്തുന്ന ഗാർട്‌നറിന്റെ ‘മാജിക് ക്വാഡ്രന്റ്’ റിപ്പോർട്ടിൽ തുടർച്ചയായ മൂന്നാം തവണയാണ് ഫ്ളൈടെക്സ്റ്റ് ഇടം നേടുന്നത്.

ടെലികോം മേഖലയ്ക്കായി എഐ അധിഷ്ഠിത മാർക്കറ്റിംഗ്, സെയിൽസ് സൊല്യൂഷനുകൾ വികസിപ്പിക്കുന്നതിലെ മികവാണ് പട്ടികയിൽ ഇടം നേടാൻ ഫ്ളൈടെക്സ്റ്റിനെ സഹായിച്ചത്. Oracle, Salesforce തുടങ്ങിയ ആഗോള ടെക്നോളജി കമ്പനികൾക്കൊപ്പമാണ് ഫ്ളൈടെക്സ്റ്റും പട്ടികയിൽ ഇടംപിടിച്ചിരിക്കുന്നത്.

പുതിയ നേട്ടത്തോടെ ആഗോള എന്റർപ്രൈസ് എഐ രംഗത്ത് തങ്ങളുടെ സാന്നിധ്യം കൂടുതൽ ശക്തമാക്കുകയാണ് കമ്പനി. തുടർച്ചയായ മൂന്നാം തവണയും ഗാർട്‌നറിന്റെ ആഗോള പട്ടികയിൽ ഇടം നേടിയത് എന്റർപ്രൈസ് എഐ മേഖലയിൽ ഫ്ളൈടെക്സ്റ്റ് നടത്തുന്ന നൂതന പ്രവർത്തനങ്ങൾക്കുള്ള അംഗീകാരമാണെന്ന് സിഇഒ ഡോ. വിനോദ് വാസുദേവൻ പറഞ്ഞു.

കോ-പൈലറ്റുകളിലും ടാസ്ക് ഓട്ടോമേഷനുകളിലും മാത്രം ഒതുങ്ങാതെ, സംരംഭങ്ങൾക്കായി സ്വതന്ത്രമായി വാണിജ്യ തീരുമാനങ്ങൾ എടുക്കാനും മികച്ച ഫലങ്ങൾ കൈവരിക്കാനും കഴിയുന്ന ‘എഐ എക്സ്പെർട്ട് ഫോഴ്സ്’ രൂപപ്പെടുത്തുകയാണ് കമ്പനിയുടെ ലക്ഷ്യമെന്നും അദ്ദേഹം വ്യക്തമാക്കി.

വരും വർഷങ്ങളിൽ കോർപ്പറേറ്റ് സ്ഥാപനങ്ങളുടെ തന്ത്രപരമായ തീരുമാനങ്ങളെയും പ്രവർത്തന രീതികളെയും എഐ സാങ്കേതികവിദ്യ കാര്യമായി മാറ്റിമറിക്കുമെന്നാണ് പ്രതീക്ഷിക്കുന്നതെന്നും അദ്ദേഹം കൂട്ടിച്ചേർത്തു.

Story Summary:
Technopark-based enterprise AI company Flytxt has been included in Gartner’s Magic Quadrant for the third consecutive time for its telecom AI solutions. The company was recognized for its AI-driven marketing and sales solutions designed for the telecommunications sector.