ലിംഗമാറ്റ ശസ്ത്രക്രിയയെച്ചൊല്ലി തർക്കം; ലഖ്നൗവിൽ അമ്മയെ മകൻ കൊലപ്പെടുത്തി | Lucknow mother murder

ലഖ്നൗ: ലിംഗമാറ്റ ശസ്ത്രക്രിയയെച്ചൊല്ലിയുള്ള തർക്കത്തിനിടെ 17കാരൻ അമ്മയെ കൊലപ്പെടുത്തിയതായി പൊലീസ് (Lucknow mother murder). ലഖ്നൗവിലെ രാജേന്ദ്ര നഗർ മേഖലയിലെ അപ്പാർട്ട്മെന്റിലാണ് സംഭവം. ശസ്ത്രക്രിയ നടത്തണമെന്ന മകന്റെ ആവശ്യത്തെ കുടുംബം എതിർത്തിരുന്നതായാണ് പൊലീസ് പറയുന്നത്.

ലിംഗപരമായ തിരിച്ചറിയലുമായി ബന്ധപ്പെട്ട് 17കാരൻ കുടുംബത്തോട് തന്റെ നിലപാട് വ്യക്തമാക്കിയിരുന്നുവെന്നും ശസ്ത്രക്രിയ നടത്തണമെന്ന ആവശ്യം ഉന്നയിച്ചിരുന്നുവെന്നും പൊലീസ് അറിയിച്ചു. മകനെ കൗൺസിലിങ്ങിനും ചികിത്സയ്ക്കുമായി കൊണ്ടുപോയിരുന്നെങ്കിലും അഭിപ്രായവ്യത്യാസം പരിഹരിക്കാനായില്ലെന്നാണ് വിവരം.

വീണ്ടും ശസ്ത്രക്രിയ വേണമെന്ന ആവശ്യത്തെച്ചൊല്ലി അമ്മയും മകനും തമ്മിൽ തർക്കമുണ്ടായി. തർക്കം രൂക്ഷമായതോടെ മകൻ സ്പാനർ ഉപയോഗിച്ച് അമ്മയുടെ തലയ്ക്ക് അടിച്ചെന്നാണ് പൊലീസ് പറയുന്നത്. ഗുരുതരമായി പരിക്കേറ്റ യുവതി സംഭവസ്ഥലത്തുവച്ച് തന്നെ മരിച്ചതായാണ് വിവരം.

സംഭവത്തിന് പിന്നാലെ മകൻ തന്നെയാണ് പൊലീസിൽ വിവരം അറിയിച്ചത്. പൊലീസ് ഫ്ലാറ്റിലെത്തിയപ്പോൾ യുവതിയെ മരിച്ചനിലയിൽ കണ്ടെത്തുകയായിരുന്നു. ചോദ്യംചെയ്യലിൽ 17കാരൻ കുറ്റം സമ്മതിച്ചതായി പൊലീസ് അറിയിച്ചു.

മകൻ ഏകാന്തത ഇഷ്ടപ്പെട്ടിരുന്നുവെന്നും മാതാപിതാക്കളുടെ സ്നേഹപ്രകടനങ്ങൾ പോലും ചിലപ്പോൾ അസ്വസ്ഥതയുണ്ടാക്കിയിരുന്നുവെന്നും പൊലീസ് പറഞ്ഞു. കൊലപാതകത്തിന് ശേഷമുള്ള നടപടിക്രമങ്ങളെക്കുറിച്ച് അറിയാൻ പ്രതി ചാറ്റ്ജിപിടിയിൽ തിരച്ചിൽ നടത്തിയിരുന്നതായും അന്വേഷണത്തിൽ കണ്ടെത്തിയതായി പൊലീസ് വ്യക്തമാക്കി.

സംഭവത്തിൽ പൊലീസ് കൂടുതൽ അന്വേഷണം തുടരുകയാണ്. പ്രായപൂർത്തിയാകാത്ത പ്രതിക്കെതിരായ തുടർനിയമനടപടികളും ബാലനീതി നിയമപ്രകാരമുള്ള വ്യവസ്ഥകൾ അനുസരിച്ചായിരിക്കും.

Story Summary:
A 17-year-old boy has allegedly killed his mother in Lucknow following an argument over his demand for gender-affirming surgery, police said. The teenager reportedly informed police about the incident himself, and investigators also found searches related to post-crime procedures on ChatGPT.