ശ്രീ സിറ്റിയിലെ ബോയിലർ സ്ഫോടനം; ടാബ്ലെറ്റ്സ് ഇന്ത്യയ്ക്ക് ബന്ധമില്ലെന്ന് കമ്പനി | Tablets India Sri City boiler blast clarification
Current: മലയാളം
ആന്ധ്രപ്രദേശിലെ ശ്രീ സിറ്റിയിലെ ഫാർമസ്യൂട്ടിക്കൽ നിർമാണശാലയിലുണ്ടായ ബോയിലർ സ്ഫോടനവുമായി ബന്ധപ്പെട്ട് വ്യക്തത വരുത്തി ടാബ്ലെറ്റ്സ് (ഇന്ത്യ) ലിമിറ്റഡ്. അപകടമുണ്ടായ ടി.ഐ.എൽ ഹെൽത്ത്‌കെയർ പ്രൈവറ്റ് ലിമിറ്റഡുമായി തങ്ങൾക്ക് യാതൊരു ബന്ധവുമില്ലെന്നും രണ്ട് കമ്പനികളും സ്വതന്ത്ര സ്ഥാപനങ്ങളാണെന്നും കമ്പനി വ്യക്തമാക്കി. (Tablets India Sri City boiler blast clarification)
ഒക്ടോബർ 3ന് തിരുപ്പതി ജില്ലയിലെ ശ്രീ സിറ്റി സ്പെഷ്യൽ ഇക്കണോമിക് സോണിലെ ടി.ഐ.എൽ ഹെൽത്ത്‌കെയർ പ്ലാന്റിലാണ് ബോയിലർ പൊട്ടിത്തെറിച്ചത്. അപകടത്തിൽ അഞ്ച് തൊഴിലാളികൾ മരിക്കുകയും പത്തിലേറെ പേർക്ക് പരിക്കേൽക്കുകയും ചെയ്തതായി റിപ്പോർട്ടുകൾ പറയുന്നു. ഫാക്ടറി പരിസരത്ത് വൻ നാശനഷ്ടമുണ്ടായതിനെ തുടർന്ന് രക്ഷാപ്രവർത്തനവും അന്വേഷണവും ആരംഭിച്ചിരുന്നു.
പേരിലെ സാമ്യമാണ് ആശയക്കുഴപ്പത്തിന് കാരണം
ടാബ്ലെറ്റ്സ് (ഇന്ത്യ) ലിമിറ്റഡ്, ടി.ഐ.എൽ ഹെൽത്ത്‌കെയർ പ്രൈവറ്റ് ലിമിറ്റഡ് എന്നീ പേരുകളിലെ സാമ്യമാണ് ആശയക്കുഴപ്പത്തിന് കാരണമായതെന്നാണ് സൂചന. അപകടത്തെക്കുറിച്ചുള്ള ചില പ്രാഥമിക റിപ്പോർട്ടുകളിൽ ശ്രീ സിറ്റിയിലെ സ്ഥാപനത്തെ ‘ടാബ്ലെറ്റ്സ് ഇന്ത്യ’ എന്ന പേരിൽ പരാമർശിച്ചതോടെയാണ് ടാബ്ലെറ്റ്സ് (ഇന്ത്യ) ലിമിറ്റഡിനും അപകടവുമായി ബന്ധമുണ്ടെന്ന ധാരണയ്ക്ക് ഇടയായത്.
ശ്രീ സിറ്റിയിൽ തങ്ങൾക്ക് ഫാക്ടറിയോ നിർമാണ യൂണിറ്റോ ഇല്ലെന്ന് ടാബ്ലെറ്റ്സ് (ഇന്ത്യ) വ്യക്തമാക്കി. ടി.ഐ.എൽ ഹെൽത്ത്‌കെയറും ടാബ്ലെറ്റ്സ് (ഇന്ത്യ) ലിമിറ്റഡും തമ്മിൽ പൊതുവായ ഉടമസ്ഥതയോ മാനേജ്മെന്റ് ബന്ധമോ ഇല്ലെന്നും കമ്പനി അറിയിച്ചു.
ബോയിലർ സ്ഫോടനത്തിൽ അന്വേഷണം തുടരുന്നു
ടി.ഐ.എൽ ഹെൽത്ത്‌കെയർ പ്ലാന്റിലുണ്ടായ സ്ഫോടനത്തിന്റെ കൃത്യമായ കാരണം ഇതുവരെ വ്യക്തമായിട്ടില്ല. അപകടത്തിന്റെ സാഹചര്യങ്ങളും സുരക്ഷാ വീഴ്ചകളുണ്ടായോയെന്നതും പരിശോധിക്കാൻ ആന്ധ്രപ്രദേശ് സർക്കാർ ഉന്നതതല അന്വേഷണം പ്രഖ്യാപിച്ചിട്ടുണ്ട്. അന്വേഷണത്തിന്റെ ഭാഗമായി ബോയിലർ ഇൻസ്പെക്ടറെ സസ്പെൻഡ് ചെയ്തതായും റിപ്പോർട്ടുകളുണ്ട്.
സ്ഫോടനത്തെ തുടർന്ന് പൊലീസ്, അഗ്നിരക്ഷാസേന, അടിയന്തര രക്ഷാപ്രവർത്തകർ എന്നിവർ സ്ഥലത്തെത്തി. ചികിത്സയിലായിരുന്ന ചിലർ മരിച്ചതോടെയാണ് മരണസംഖ്യ അഞ്ചായി ഉയർന്നത്. ബോയിലറിലേക്കുള്ള ജലവിതരണത്തിലെ കുറവ് സ്ഫോടനത്തിന് കാരണമായിരിക്കാമെന്ന് ടൈംസ് ഓഫ് ഇന്ത്യ ഉദ്ധരിച്ച പ്രാഥമിക റിപ്പോർട്ടിൽ പറയുന്നുണ്ടെങ്കിലും, യഥാർഥ കാരണം അന്വേഷണത്തിലൂടെയാണ് സ്ഥിരീകരിക്കേണ്ടത്.
അപകടത്തിൽ മരിച്ച തൊഴിലാളികളുടെ കുടുംബങ്ങൾക്ക് ടാബ്ലെറ്റ്സ് (ഇന്ത്യ) അനുശോചനം രേഖപ്പെടുത്തി. ശ്രീ സിറ്റിയിലെ സംഭവവുമായി ബന്ധപ്പെട്ട വാർത്തകളിൽ ടി.ഐ.എൽ ഹെൽത്ത്‌കെയറും ടാബ്ലെറ്റ്സ് (ഇന്ത്യ) ലിമിറ്റഡും തമ്മിൽ വ്യക്തമായ വ്യത്യാസം പാലിക്കണമെന്നും കമ്പനി ആവശ്യപ്പെട്ടു.
Summary: Tablets (India) Limited has clarified that it has no factory or manufacturing facility in Sri City and has no common ownership or management with TIL Healthcare Private Limited. The clarification follows a boiler explosion at the TIL Healthcare facility that reportedly killed five workers and injured several others.
