അഖിൽ സത്യൻ സംവിധാനം ചെയ്ത സർവ്വം മായ എന്ന ചിത്രത്തിൽ ചെറിയൊരു വേഷമാണെങ്കിലും മികച്ച അഭിനയം കാഴ്ചവെക്കാൻ കഴിഞ്ഞതിന്റെ സന്തോഷത്തിലാണ് പ്രിയ വാര്യർ. ചിത്രത്തിലെ തന്റെ കഥാപാത്രത്തിന് ലഭിക്കുന്ന മികച്ച പ്രതികരണങ്ങൾക്ക് നന്ദി പറഞ്ഞുകൊണ്ട് താരം സോഷ്യൽ മീഡിയയിൽ പങ്കുവെച്ച കുറിപ്പാണ് ഇപ്പോൾ ശ്രദ്ധേയമാകുന്നത്. ചിത്രത്തിൽ ‘ഡെലുലു ഓൺ ഫ്ലൈറ്റ് മോഡ്’ എന്ന രസകരമായ വിശേഷണത്തോടെയാണ് പ്രിയയുടെ കഥാപാത്രം എത്തുന്നത്.
ഈ ചിത്രത്തിന്റെ ഭാഗമാകാൻ കഴിഞ്ഞത് വലിയൊരു ഭാഗ്യമായി കരുതുന്നുവെന്നും ഇത്രയും മനോഹരമായ ഒരു ടീമിനൊപ്പം പ്രവർത്തിച്ചിട്ടും കൊതി തീർന്നില്ലെന്നും പ്രിയ കുറിച്ചു. ഷൂട്ടിംഗ് അനുഭവങ്ങൾ വളരെ പോസിറ്റീവ് ആയിരുന്നുവെന്നും ഇനിയും കൂടുതൽ സമയം ഈ സെറ്റിൽ ചെലവഴിക്കാൻ ആഗ്രഹമുണ്ടായിരുന്നുവെന്നും താരം വ്യക്തമാക്കി. തന്നെ ഈ ചിത്രത്തിലേക്ക് ക്ഷണിച്ച സംവിധായകൻ അഖിൽ സത്യനോടുള്ള പ്രത്യേക നന്ദിയും പ്രിയ അറിയിച്ചിട്ടുണ്ട്.
Also Read: ബാച്ച്ലർ പാർട്ടിക്ക് രണ്ടാം ഭാഗം; അമൽ നീരദിന്റെ പുതിയ പ്രഖ്യാപനം
സഹതാരമായ നിവിൻ പോളിയെക്കുറിച്ചും വലിയ പ്രശംസയാണ് പ്രിയ പങ്കുവെച്ചത്. നിവിൻ പോളി സെറ്റിലേക്ക് വരുമ്പോൾ ഉണ്ടാകുന്ന പോസിറ്റീവ് എനർജിയെക്കുറിച്ചും അദ്ദേഹത്തിന്റെ പകരുന്ന ചിരിയെക്കുറിച്ചും താരം വാചാലയായി. നിവിൻ പോളിയെ ഒരു യഥാർത്ഥ ‘ചിരിക്കുടുക്ക’ എന്നാണ് പ്രിയ വിശേഷിപ്പിച്ചത്. അജു വർഗീസ്, പ്രീതി മുകുന്ദൻ തുടങ്ങിയ മറ്റ് താരങ്ങൾക്കൊപ്പമുള്ള അനുഭവങ്ങളും താരം തന്റെ കുറിപ്പിൽ പങ്കുവെച്ചിട്ടുണ്ട്.
ക്രിസ്മസ് റിലീസായി എത്തിയ സർവ്വം മായ ബോക്സ് ഓഫീസിൽ വലിയ വിജയമാണ് കരസ്ഥമാക്കുന്നത്. 100 കോടി ക്ലബ്ബിൽ ഇടംപിടിച്ച ചിത്രം നിവിൻ പോളിയുടെ ഗംഭീര തിരിച്ചുവരവായാണ് ആരാധകർ വിലയിരുത്തുന്നത്. പ്രിയയുടെ അതിഥിവേഷം സിനിമയിലെ തന്റെ പ്രിയപ്പെട്ട അഞ്ച് രംഗങ്ങളിൽ ഒന്നാണെന്ന് സംവിധായകൻ അഖിൽ സത്യനും നേരത്തെ വ്യക്തമാക്കിയിരുന്നു.
The post കൊതി തീർന്നില്ല, അത്രമേൽ ഇഷ്ടപ്പെട്ട സെറ്റ്; ‘സർവ്വം മായ’യെക്കുറിച്ച് പ്രിയ വാര്യർ appeared first on Express Kerala.
