Skip to content
November 19, 2026
⌕

‘വോട്ട് മോഷണത്തിന്റെ മുഖ്യ ആസൂത്രകൻ മോദി. നടപ്പാക്കുന്നത് അമിത് ഷായും ഗ്യാനേഷ് കുമാറും. വസ്തുത രാഷ്ട്രപതിയും നിഷേധിച്ചില്ല’; രാഷ്ട്രപതിയുമായുള്ള കൂടിക്കാഴ്ചയ്ക്ക് ശേഷം രാഹുൽ ഗാന്ധി. തെളിവുകൾ ഹാജരാക്കാൻ രാഷ്ട്രപതി നിർദ്ദേശിച്ചെന്ന് മല്ലികാർജുൻ ഖാർഗെ. ഇ.വി.എം ഒഴിവാക്കി ബാലറ്റ് പേപ്പർ തിരികെ കൊണ്ടുവരണമെന്ന ആവശ്യവും മുന്നോട്ടുവച്ച് ഇന്ത്യാ സഖ്യം

October 9, 2026
Share this post to

ന്യൂഡൽഹി: രാജ്യത്ത് തെരഞ്ഞെടുപ്പുകളിൽ വ്യാപകമായി വോട്ടുകൾ മോഷ്ടിക്കപ്പെടുകയാണെന്ന വസ്തുത പൊതുസമൂഹത്തിന് വ്യക്തമായി ബോധ്യമുള്ളതാണെന്നും, ഇതിന്റെ പ്രധാന ആസൂത്രകൻ പ്രധാനമന്ത്രി നരേന്ദ്ര മോദിയും അത് നടപ്പിലാക്കുന്നവർ അമിത് ഷായും മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറുമാണെന്നും രാഹുൽ ഗാന്ധി. 

ഇന്ത്യാ സഖ്യ നേതാക്കൾക്കൊപ്പം രാഷ്ട്രപതി ഭവനിലെത്തി രാഷ്ട്രപതി ദ്രൗപതി മുർമുവിന് സംയുക്ത നിവേദനം കൈമാറിയ ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. തങ്ങൾ ഉന്നയിച്ച ഗുരുതരമായ ആക്ഷേപങ്ങളെ രാഷ്ട്രപതി ഒരുതരത്തിലും നിഷേധിച്ചില്ലെന്നും അദ്ദേഹം വെളിപ്പെടുത്തി.


അവിശ്വസനീയമായ ഒരു കൂടിക്കാഴ്ചയ്ക്കാണ് തങ്ങൾ സാക്ഷ്യം വഹിച്ചതെന്ന് രാഹുൽ ഗാന്ധി പറഞ്ഞു. പ്രധാനമന്ത്രിയും ആഭ്യന്തര മന്ത്രിയും മുഖ്യ തെരഞ്ഞെടുപ്പ് കമ്മീഷണറും ചേർന്ന് ഇന്ത്യൻ ജനാധിപത്യത്തെ തകർക്കാൻ ക്രിമിനൽ ഗൂഢാലോചന നടത്തുകയാണെന്ന് വ്യക്തമാക്കിയാണ് നിവേദനം നൽകിയത്. 


ഈ ആരോപണങ്ങളെ രാഷ്ട്രപതി തള്ളിക്കളയുകയോ വിയോജിക്കുകയോ ചെയ്തില്ല. മറിച്ച്, തങ്ങളുടെ വാദങ്ങൾ കേട്ട ശേഷം വോട്ട് മോഷണവുമായി ബന്ധപ്പെട്ട കൂടുതൽ തെളിവുകൾ ഔദ്യോഗികമായി സമർപ്പിക്കാൻ ആവശ്യപ്പെടുകയാണുണ്ടായത്. 

രാജ്യത്ത് സ്വതന്ത്രവും നീതിപൂർവ്വവുമായ തെരഞ്ഞെടുപ്പ് സംവിധാനമാണ് ഉള്ളതെന്ന് പറഞ്ഞ് രാഷ്ട്രപതി പ്രതിരോധിക്കുമെന്ന് കരുതിയ തനിക്ക്, അവർ ആരോപണങ്ങൾ നിഷേധിക്കാതിരുന്നത് വലിയ അമ്പരപ്പുണ്ടാക്കിയെന്നും രാഹുൽ വ്യക്തമാക്കി. 

ഓരോ സംസ്ഥാനത്തെയും തെരഞ്ഞെടുപ്പുകളും 2024-ലെ ലോക്സഭാ തെരഞ്ഞെടുപ്പും മോഷ്ടിക്കപ്പെട്ടതാണെന്നും ഇതുസംബന്ധിച്ച് സഖ്യം ശേഖരിച്ച മുഴുവൻ തെളിവുകളും ഉടൻതന്നെ രാഷ്ട്രപതിക്ക് മുന്നിൽ ഹാജരാക്കുമെന്നും അദ്ദേഹം കൂട്ടിച്ചേർത്തു.


വോട്ട് ചോരിക്കെതിരെ പ്രതിപക്ഷം ആരംഭിച്ച പ്രക്ഷോഭത്തിന്റെ ഭാഗമായാണ് രാഷ്ട്രപതിയെ നേരിൽ കണ്ടതെന്ന് കോൺഗ്രസ് അധ്യക്ഷൻ മല്ലികാർജുൻ ഖാർഗെ വിശദീകരിച്ചു. തെരഞ്ഞെടുപ്പ് കമ്മീഷണർ ഗ്യാനേഷ് കുമാർ വരുത്തിയ ഗുരുതരമായ പിഴവുകൾ നിവേദനത്തിൽ വിശദീകരിച്ചിട്ടുണ്ട്. 


ഭാവി തെരഞ്ഞെടുപ്പുകളിൽ ഇലക്ട്രോണിക് വോട്ടിങ് യന്ത്രങ്ങൾ (ഇ.വി.എം) പൂർണ്ണമായി ഒഴിവാക്കി ബാലറ്റ് പേപ്പറുകൾ തിരികെ കൊണ്ടുവരണമെന്ന് മുന്നണി ശക്തമായി ആവശ്യപ്പെട്ടു. 

വോട്ട് തട്ടിപ്പിന്റെ തെളിവുകൾ ആവശ്യപ്പെട്ട രാഷ്ട്രപതിയുടെ നിർദ്ദേശപ്രകാരം വിവരങ്ങൾ ശേഖരിച്ചുവരികയാണെന്നും, വിഷയം വിശദമായി പരിശോധിച്ച് ഉചിതമായ തീരുമാനമെടുക്കാമെന്ന് രാഷ്ട്രപതി ഉറപ്പുനൽകിയതായും ഖാർഗെ വ്യക്തമാക്കി.

കോൺഗ്രസ് നേതാക്കളായ രാഹുൽ ഗാന്ധി, മല്ലികാർജുൻ ഖാർഗെ എന്നിവർക്ക് പുറമെ പശ്ചിമ ബംഗാൾ മുഖ്യമന്ത്രി മമതാ ബാനർജി, സി.പി.എം ജനറൽ സെക്രട്ടറി എം.എ. ബേബി, സി.പി.ഐ ജനറൽ സെക്രട്ടറി ഡി. രാജ, എസ്.പി നേതാവ് രാജീവ് റായ്, എൻ.സി.പി നേതാവ് സുപ്രിയ സുലെ, 

ജമ്മു കശ്മീർ മുഖ്യമന്ത്രി ഒമർ അബ്ദുള്ള, ആർ.ജെ.ഡി എം.പി മനോജ് ഝാ, വി.സി.കെ നേതാവ് തോൽ തിരുമാവളവൻ തുടങ്ങിയ ഇന്ത്യാ സഖ്യത്തിലെ പ്രമുഖ നേതാക്കളടങ്ങിയ സംഘമാണ് രാഷ്ട്രപതി ഭവനിലെത്തി നിവേദനം സമർപ്പിച്ചത്.

Get more updates from Pudukad News on Google