വഡോദരയിൽ നടന്ന ഇന്ത്യ-ന്യൂസിലാൻഡ് ആദ്യ ഏകദിനത്തിനിടെ ക്രിക്കറ്റ് ആരാധകരെ അമ്പരപ്പിച്ചും ചിരിപ്പിച്ചും സൂപ്പർ താരങ്ങളായ രോഹിത് ശർമയുടെയും വിരാട് കോഹ്ലിയുടെയും ‘മാസ്’ എൻട്രി. സ്റ്റേഡിയം നിറഞ്ഞുനിന്ന മുപ്പതിനായിരത്തിലധികം കാണികളെ സാക്ഷിയാക്കി മൈതാനത്തേക്ക് കൊണ്ടുവന്ന ഒരു വലിയ അലമാരയിൽ നിന്നാണ് ഇരുവരും പുറത്തുവന്നത്.
ഇന്നിംഗ്സ് ബ്രേക്കിനിടെ വഡോദര കോടാംബി സ്റ്റേഡിയത്തിൽ നടന്ന ഈ വിചിത്രവും എന്നാൽ കൗതുകകരവുമായ സംഭവം നിമിഷങ്ങൾക്കകം സോഷ്യൽ മീഡിയയിൽ വൈറലായി. ഇന്ത്യൻ ക്രിക്കറ്റിലെ ഇതിഹാസ താരങ്ങളായ രോഹിത്തിനെയും കോഹ്ലിയെയും ആദരിക്കുന്നതിനായി സംഘടിപ്പിച്ച അനൗപചാരിക ചടങ്ങിന്റെ ഭാഗമായിരുന്നു ഈ സർപ്രൈസ്. ഐസിസി ചെയർമാൻ ജയ് ഷാ, ബറോഡ ക്രിക്കറ്റ് അസോസിയേഷൻ പ്രസിഡന്റ് പ്രണവ് അമിൻ തുടങ്ങിയ പ്രമുഖരുടെ സാന്നിധ്യത്തിലായിരുന്നു ചടങ്ങ്.
തങ്ങളുടെ തന്നെ ചിത്രങ്ങൾ പതിപ്പിച്ച വലിയ വെള്ള അലമാര തുറന്നപ്പോൾ, ചിരിയടക്കാൻ പാടുപെട്ടുകൊണ്ടാണ് രോഹിത്തും വിരാടും പുറത്തേക്ക് വന്നത്. ഇരുവരെയും സംഘാടകർ പൂച്ചെണ്ട് നൽകി സ്വീകരിച്ചു. തുടർന്ന് അലമാരയിൽ പതിപ്പിച്ചിരുന്ന തങ്ങളുടെ ചിത്രങ്ങളിൽ താരങ്ങൾ കൈയൊപ്പ് ചാർത്തുകയും ചെയ്തു. സ്റ്റേഡിയത്തിൽ തടിച്ചുകൂടിയ പതിനായിരക്കണക്കിന് ആരാധകർ ആവേശകരമായ കൈയടികളോടെയാണ് ഈ വേറിട്ട ആദരിക്കൽ ചടങ്ങിനെ വരവേറ്റത്.
The post മൈതാനത്ത് പെട്ടി തുറന്നപ്പോൾ ഞെട്ടിപ്പോയി! ഉള്ളിൽ രോഹിത്തും വിരാടും; വഡോദരയിൽ നടന്നത് ആരും പ്രതീക്ഷിക്കാത്ത സർപ്രൈസ് appeared first on Express Kerala.
