നേപ്പാളിൽ വീണ്ടും മിന്നൽപ്രളയം: പാലങ്ങളും വീടുകളും ഒലിച്ചുപോയി, ഭീതിജനകമായ ദൃശ്യങ്ങൾ പുറത്ത്; 10 പേരെ കാണാതായി | Nepal Floods
Current: മലയാളം
കാഠ്മണ്ഡു: നേപ്പാളിലെ ഗോർഖ ജില്ലയിൽ ബുധി ഗന്ധകി നദിയിൽ ഉണ്ടായ ശക്തമായ മിന്നൽപ്രളയത്തിൽ വൻ നാശനഷ്ടം (Nepal Floods). നദീതീരത്തെ ഗ്രാമങ്ങളും പാലങ്ങളും വീടുകളും പ്രളയജലത്തിൽ ഒലിച്ചുപോകുന്നതിന്റെ ഞെട്ടിക്കുന്ന ദൃശ്യങ്ങൾ പുറത്തുവന്നു. അപകടത്തിൽപ്പെട്ട് ചുരുങ്ങിയത് 10 പേരെ കാണാതായതായി ഔദ്യോഗിക വൃത്തങ്ങൾ അറിയിച്ചു.
ഗോർഖ ജില്ലയിലെ വടക്കൻ മേഖലകളായ സല്ലേരി ബസാർ, ജഗത് ബസാർ, ദോവൻ, ഘട്ടേഖോല തുടങ്ങിയ പ്രദേശങ്ങളിലാണ് പ്രളയം വൻ നാശം വിതച്ചത്. പെയിൻയു, ബഗാർ തുടങ്ങിയ ഭാഗങ്ങളിൽ ഏകദേശം 35-ഓളം വീടുകൾ പൂർണ്ണമായും ഒലിച്ചുപോയി. മോട്ടോർ പാലങ്ങളും തൂക്കുപാലങ്ങളും ഉൾപ്പെടെ ആറോളം പാലങ്ങൾ തകരുകയോ പ്രളയത്തിൽ ഒലിച്ചുപോകുകയോ ചെയ്തിട്ടുണ്ട്. സൊതി ഖോല പാലം, ആരുഘട്ട്, ത്രിപുരസുന്ദരി, സൊതി-മാൻബു എന്നിവിടങ്ങളിലെ പ്രധാന പാലങ്ങളും തകർന്നവയിൽ ഉൾപ്പെടുന്നു.
പെട്ടെന്നുണ്ടായ ഈ വെള്ളപ്പൊക്കത്തിന്റെ കൃത്യമായ കാരണം ഇതുവരെ വ്യക്തമായിട്ടില്ല. പ്രദേശത്തെ പോഷകനദികളിലുണ്ടായ മണ്ണിടിച്ചിലോ തടസ്സങ്ങളോ ആകാം പെട്ടെന്ന് ജലനിരപ്പ് ഉയരാൻ കാരണമായതെന്നാണ് സംശയിക്കുന്നത്. പ്രളയത്തിൽ പ്രദേശത്തെ ഒരു ജലവൈദ്യുത പദ്ധതിക്കും കേടുപാടുകൾ സംഭവിച്ചിട്ടുണ്ട്.
സൈന്യത്തെയും ഹെലികോപ്റ്ററുകളെയും ഉപയോഗിച്ച് പ്രദേശത്ത് രക്ഷാപ്രവർത്തനം ശക്തമാക്കിയിട്ടുണ്ടെന്ന് പ്രധാനമന്ത്രി ബാലേന്ദ്ര ഷാ അറിയിച്ചു. നദിയിലെ ജലനിരപ്പിൽ ഇനിയും വ്യതിയാനങ്ങൾ വരാൻ സാധ്യതയുള്ളതിനാൽ ബുധി ഗന്ധകി നദിക്കരയിൽ താമസിക്കുന്ന ആളുകൾ സുരക്ഷിത സ്ഥാനങ്ങളിലേക്ക് മാറണമെന്ന് ആഭ്യന്തര മന്ത്രാലയം മുന്നറിയിപ്പ് നൽകിയിട്ടുണ്ട്.
