‘തടങ്കലിലാക്കാനുള്ള അധികാരം ശബ്ദം നിശ്ശബ്ദമാക്കാനുള്ള അധികാരമല്ല’; അങ്കിത ഭണ്ഡാരിയുടെ മാതാപിതാക്കളെ കസ്റ്റഡിയിലെടുത്തതിനെ വിമർശിച്ച് ശശി തരൂർ | Shashi Tharoor on Ankita Bhandari parents detention
Current: മലയാളം
ന്യൂഡൽഹി: അങ്കിത ഭണ്ഡാരിയുടെ മാതാപിതാക്കളെയും ജന്തർ മന്തറിൽ പ്രതിഷേധിച്ചവരെയും കസ്റ്റഡിയിലെടുത്ത നടപടിയെ വിമർശിച്ച് കോൺഗ്രസ് എംപി ശശി തരൂർ. സർക്കാരിനോട് ഉത്തരവാദിത്തം ചോദിക്കുന്നവരെ തടങ്കലിലാക്കി നിശ്ശബ്ദരാക്കാനാണോ അധികാരികൾ ശ്രമിക്കുന്നതെന്ന് അദ്ദേഹം ചോദിച്ചു. സമാധാനപരമായി പ്രതിഷേധിക്കുന്നവരെയും മകളുടെ നീതിക്കായി പോരാടുന്ന മാതാപിതാക്കളെയും ഭീഷണിയായി കാണരുതെന്നും തരൂർ എക്സിൽ കുറിച്ചു. (Shashi Tharoor on Ankita Bhandari parents detention)
“ഒരു പ്രതിഷേധക്കാരൻ കുറ്റവാളിയല്ല. ദുഃഖിതനായ ഒരു മാതാപിതാവ് ഭീഷണിയുമല്ല. ഭരണത്തിന്റെ ചുമതലയുള്ളവർക്ക് ഈ വ്യത്യാസം വിശദീകരിച്ചുകൊടുക്കേണ്ടിവരുന്നത് ദൗർഭാഗ്യകരമാണ്,” എന്നായിരുന്നു തരൂരിന്റെ പ്രതികരണം. ഭരണഘടന ഉറപ്പുനൽകുന്ന പ്രതിഷേധാവകാശം സർക്കാരിന്റെ അനുമതിയെ ആശ്രയിച്ചുള്ളതല്ലെന്നും അധികാരത്തിലുള്ളവർക്ക് അസൗകര്യമുണ്ടാക്കുന്നു എന്ന കാരണത്താൽ മാത്രം അത് നിയന്ത്രിക്കാനാവില്ലെന്നും അദ്ദേഹം പറഞ്ഞു. “തടങ്കലിലാക്കാനുള്ള അധികാരം ശബ്ദം നിശ്ശബ്ദമാക്കാനുള്ള അധികാരമല്ല,” എന്നും തരൂർ കൂട്ടിച്ചേർത്തു.
ജന്തർ മന്തറിൽ വോട്ടർപട്ടികയുടെ പ്രത്യേക തീവ്രപരിഷ്‌കരണവുമായി ബന്ധപ്പെട്ട ക്രമക്കേടുകൾ ആരോപിച്ച് നടന്ന പ്രതിഷേധത്തിനിടെയാണ് കാക്ക്രോച്ച് ജനതാ പാർട്ടി പ്രവർത്തകരായ സൗരവ് ദാസ്, ആശുതോഷ് റങ്ക എന്നിവരെ അഞ്ചുദിവസത്തെ ജുഡീഷ്യൽ കസ്റ്റഡിയിൽ വിട്ടത്. ഒക്ടോബർ 19 വരെയാണ് കസ്റ്റഡി. മോചനത്തിന് ആവശ്യമായ ജാമ്യക്കാരെ ഹാജരാക്കാൻ കഴിയാത്തതും പൊതുസമാധാനവുമായി ബന്ധപ്പെട്ട ആശങ്കകളും കോടതി ഉത്തരവിൽ പരാമർശിച്ചിട്ടുണ്ട്. ഒക്ടോബർ 13-ന് ജെഡിയു ഓഫീസിന്റെ പരിസരത്തേക്ക് ചാടിക്കടന്ന് പ്രതിഷേധക്കാർ മുദ്രാവാക്യം വിളിക്കുകയും ബഹളമുണ്ടാക്കുകയും ചെയ്തെന്നാണ് പൊലീസിന്റെ ആരോപണം.
അതേസമയം, അങ്കിത ഭണ്ഡാരിയുടെ മാതാപിതാക്കളെ വ്യാഴാഴ്ച പുലർച്ചെ നാലുമണിയോടെ ഡൽഹിയിലെ ഇന്ത്യാ ഗേറ്റിൽ പ്രതിഷേധിക്കുന്നതിനിടെ പൊലീസ് കസ്റ്റഡിയിലെടുത്തു. മകളുടെ കൊലപാതകക്കേസിൽ നീതി ആവശ്യപ്പെടുന്നതിനൊപ്പം, സിബിഐ അന്വേഷണം പൂർത്തിയാകുന്നതുവരെ ബിജെപി നേതാവ് ദുഷ്യന്ത് കുമാർ ഗൗതമിനെ സിക്കിം ഗവർണറായി നിയമിക്കരുതെന്നും അവർ ആവശ്യപ്പെട്ടിരുന്നു. പിന്നീട് ഇവരെ തിലക് മാർഗ് പൊലീസ് സ്റ്റേഷനിൽനിന്ന് വിട്ടയച്ചു.
മാതാപിതാക്കളെ കസ്റ്റഡിയിലെടുത്തതിനെ ലോക്‌സഭയിലെ പ്രതിപക്ഷ നേതാവ് രാഹുൽ ഗാന്ധിയും കോൺഗ്രസ് അധ്യക്ഷൻ മല്ലികാർജുൻ ഖാർഗെയും വിമർശിച്ചു. സമാധാനപരമായി നീതി തേടിയ കുടുംബത്തെയാണ് പൊലീസ് കസ്റ്റഡിയിലെടുത്തതെന്ന് രാഹുൽ ആരോപിച്ചു. സംഭവത്തെ സർക്കാരിന്റെ ഭീരുത്വത്തിന്റെയും നിർവികാരതയുടെയും ഉദാഹരണമായി ഖാർഗെ വിശേഷിപ്പിച്ചു. പവൻ ഖേര, സുപ്രിയ ശ്രിനാതെ, ഖാസി നിസാമുദ്ദീൻ തുടങ്ങിയ കോൺഗ്രസ് നേതാക്കളും നടപടിക്കെതിരെ രംഗത്തെത്തി. 2022 സെപ്റ്റംബർ 18-നാണ് അങ്കിത ഭണ്ഡാരി കൊല്ലപ്പെട്ടത്. സെപ്റ്റംബർ 24-ന് ചില്ല കനാലിൽനിന്ന് മൃതദേഹം കണ്ടെത്തുകയായിരുന്നു. കേസിൽ നീതി ഉറപ്പാക്കണമെന്നാവശ്യപ്പെട്ടുള്ള പ്രതിഷേധങ്ങൾക്കിടെയാണ് ഇപ്പോഴത്തെ സംഭവവികാസങ്ങൾ.
Summary: Congress MP Shashi Tharoor criticised the detention of Ankita Bhandari’s parents during a protest at India Gate and the judicial custody of CJP activists following demonstrations at Jantar Mantar. He said the power to detain should not be used to silence peaceful protesters seeking accountability. The parents were later released, while opposition leaders Rahul Gandhi and Mallikarjun Kharge also condemned the police action.
