കേരളത്തിന്റെ പ്രകൃതിവിഭവങ്ങൾക്കും ജൈവവൈവിധ്യത്തിനും മറ്റൊരു പൊൻതൂവൽ കൂടി. ആനയും മലമുഴക്കി വേഴാമ്പലും കണിമൊന്നയുമൊക്കെ കേരളത്തിന്റെ ഔദ്യോഗിക ചിഹ്നങ്ങളായിട്ടുള്ളതുപോലെ, ഇനി കേരളത്തിന് സ്വന്തമായി ഒരു ‘സംസ്ഥാന ബാക്ടീരിയ’ കൂടി വരുന്നു. സൂക്ഷ്മാണുക്കളുടെ ലോകത്തെ നന്മകളെ ജനങ്ങളിലേക്ക് എത്തിക്കാനാണ് സർക്കാർ ഈ വേറിട്ട നീക്കം നടത്തുന്നത്. മനുഷ്യജീവിതത്തിലും കൃഷിയിലും വ്യവസായത്തിലും സൂക്ഷ്മാണുക്കൾ വഹിക്കുന്ന നിർണ്ണായക പങ്കിനെക്കുറിച്ച് പൊതുജനങ്ങളിൽ അവബോധം വളർത്തുകയാണ് ഈ തീരുമാനത്തിന് പിന്നിലെ പ്രധാന ലക്ഷ്യം. സെന്റർ ഓഫ് എക്സലൻസ് ഇൻ മൈക്രോബയോം ഡയറക്ടർ ഡോ. സാബു തോമസ് മുന്നോട്ടുവെച്ച ഈ ആശയം സർക്കാർ ഗൗരവത്തോടെ പരിഗണിക്കുകയായിരുന്നു.
തിരഞ്ഞെടുപ്പ് രീതി
ഏറ്റവും അനുയോജ്യമായ ബാക്ടീരിയയെ കണ്ടെത്താൻ സംസ്ഥാന ശാസ്ത്ര-സാങ്കേതിക പരിസ്ഥിതി കൗൺസിലിന്റെ നേതൃത്വത്തിൽ വിദഗ്ധ സമിതിയെ നിയോഗിച്ചിട്ടുണ്ട്. ശാസ്ത്രജ്ഞരും ജൈവവൈവിധ്യ ബോർഡ് പ്രതിനിധികളും അടങ്ങുന്നതാണ് ഈ സമിതി.
Also Read: സംവിധായകനും എഴുത്തുകാരനുമായ ടോണി ചിറ്റേട്ടുകളത്തിന് മുതുകുളം അവാർഡ്
മാനദണ്ഡങ്ങൾ
രോഗകാരി അല്ലാത്തവയാകണം.
കേരളത്തിൽ റിപ്പോർട്ട് ചെയ്യപ്പെട്ടതാകണം.
കൃഷി, മരുന്ന്, വ്യവസായം തുടങ്ങിയ മേഖലകളിൽ ഉപകാരപ്രദമാകണം.
സാമ്പത്തിക മൂല്യമുള്ളതാകണം.
നിലവിൽ ‘ലാക്ടോബാസില്ലസ് ഡെൽബ്രൂക്കീ സബ്സ്പ് ബൾഗാരിക്കസ്’ ആണ് ഇന്ത്യയുടെ ദേശീയ ബാക്ടീരിയയായി അറിയപ്പെടുന്നത്. സമാനമായ രീതിയിൽ കേരളത്തിന്റെ കാലാവസ്ഥയ്ക്കും സാഹചര്യങ്ങൾക്കും ഇണങ്ങുന്ന ഒരു ബാക്ടീരിയയെയാകും സംസ്ഥാന പദവിക്കായി തിരഞ്ഞെടുക്കുക. ഈ മാസം 23-ന് മുഖ്യമന്ത്രി പിണറായി വിജയൻ കേരളത്തിന്റെ സ്വന്തം ബാക്ടീരിയയെ ഔദ്യോഗികമായി പ്രഖ്യാപിക്കും.
The post ഇനി കേരളത്തിനും സ്വന്തം ബാക്ടീരിയ; മുഖ്യമന്ത്രിയുടെ ഔദ്യോഗിക പ്രഖ്യാപനം 23-ന് appeared first on Express Kerala.
