NEET PG കൗൺസലിങ്: ഒന്നാം റൗണ്ട് രജിസ്ട്രേഷൻ ഇന്ന് അവസാനിക്കും; സീറ്റ് അലോട്ട്‌മെന്റ് ഫലം ഒക്ടോബർ 24ന് | NEET PG Counselling

NEET PG 2026 പ്രവേശനത്തിനുള്ള ഒന്നാം റൗണ്ട് കൗൺസലിങ്ങിന്റെ രജിസ്ട്രേഷനും ഫീസ് അടയ്ക്കുന്നതിനുമുള്ള സമയപരിധി ഇന്ന് അവസാനിക്കും. യോഗ്യരായ ഉദ്യോഗാർഥികൾക്ക് മെഡിക്കൽ കൗൺസലിങ് കമ്മിറ്റി (MCC)യുടെ ഔദ്യോഗിക വെബ്‌സൈറ്റായ mcc.nic.in വഴി നടപടികൾ പൂർത്തിയാക്കാം (NEET PG Counselling). ഒക്ടോബർ 21ന് ഉച്ചകഴിഞ്ഞ് മൂന്ന് മണിവരെയാണ് രജിസ്ട്രേഷനും ഫീസ് അടയ്ക്കുന്നതിനുമുള്ള സമയം. കോളേജുകളും കോഴ്‌സുകളും തിരഞ്ഞെടുക്കുന്നതിനുള്ള ചോയ്‌സ് ഫില്ലിങ് ഒക്ടോബർ 22 വരെ തുടരും. മുൻഗണനകൾ ലോക്ക് ചെയ്യാനുള്ള സൗകര്യം ഒക്ടോബർ 21ന് വൈകിട്ട് നാല് മണി മുതൽ ഒക്ടോബർ 22ന് രാവിലെ 10 മണി വരെയുണ്ടാകും.

ഒന്നാം റൗണ്ടിലെ സീറ്റ് അലോട്ട്‌മെന്റ് നടപടികൾ ഒക്ടോബർ 22, 23 തീയതികളിൽ നടക്കും. അലോട്ട്‌മെന്റ് ഫലം ഒക്ടോബർ 24ന് പ്രസിദ്ധീകരിക്കും. സീറ്റ് ലഭിക്കുന്നവർക്ക് ഒക്ടോബർ 26 മുതൽ നവംബർ രണ്ട് വരെ ബന്ധപ്പെട്ട സ്ഥാപനങ്ങളിൽ റിപ്പോർട്ട് ചെയ്ത് പ്രവേശന നടപടികൾ പൂർത്തിയാക്കാം.

NEET PG 2026: പ്രധാന തീയതികൾ

രജിസ്ട്രേഷനും ഫീസ് അടയ്ക്കലും: ഒക്ടോബർ 12–21
ചോയ്‌സ് ഫില്ലിങ്: ഒക്ടോബർ 13–22
ചോയ്‌സ് ലോക്കിങ്: ഒക്ടോബർ 21 വൈകിട്ട് 4 മുതൽ ഒക്ടോബർ 22 രാവിലെ 10 വരെ
സീറ്റ് അലോട്ട്‌മെന്റ് നടപടികൾ: ഒക്ടോബർ 22–23
ഒന്നാം റൗണ്ട് ഫലം: ഒക്ടോബർ 24
റിപ്പോർട്ടിങ്ങും പ്രവേശനവും: ഒക്ടോബർ 26–നവംബർ 2
പ്രവേശനം നേടിയവരുടെ വിവരങ്ങളുടെ പരിശോധന: നവംബർ 3

ചോയ്‌സ് ഫില്ലിങ് എങ്ങനെ പൂർത്തിയാക്കാം?

ഉദ്യോഗാർഥികൾ ആദ്യം MCC ഔദ്യോഗിക വെബ്‌സൈറ്റിൽ പ്രവേശിച്ച് PG Medical Counselling വിഭാഗം തിരഞ്ഞെടുക്കണം. തുടർന്ന് ആവശ്യമായ NEET PG വിവരങ്ങൾ ഉപയോഗിച്ച് ലോഗിൻ ചെയ്ത് ഇഷ്ടപ്പെട്ട കോളേജുകളും കോഴ്‌സുകളും മുൻഗണനാക്രമത്തിൽ നൽകാം. വിവരങ്ങൾ പരിശോധിച്ച് നിശ്ചിത സമയപരിധിക്കുള്ളിൽ ചോയ്‌സുകൾ ലോക്ക് ചെയ്യണം. ഭാവിയിലെ ആവശ്യങ്ങൾക്കായി സമർപ്പിച്ച മുൻഗണനകളുടെ പകർപ്പ് ഡൗൺലോഡ് ചെയ്ത് സൂക്ഷിക്കുന്നതും ഉചിതമാണ്.
ഉദ്യോഗാർഥികളുടെ മുൻഗണനകൾ, മെറിറ്റ്, സംവരണ വ്യവസ്ഥകൾ, ലഭ്യമായ സീറ്റുകൾ എന്നിവയുടെ അടിസ്ഥാനത്തിലാണ് അലോട്ട്‌മെന്റ് നടക്കുക. അതിനാൽ കോളേജുകളും കോഴ്‌സുകളും തിരഞ്ഞെടുക്കുമ്പോൾ ശ്രദ്ധിക്കണമെന്നും സമയപരിധിക്കുള്ളിൽ എല്ലാ നടപടികളും പൂർത്തിയാക്കണമെന്നും അധികൃതർ നിർദേശിക്കുന്നു.

Summary: NEET PG Counselling 2026 Round 1 registration and fee payment close on October 21 at 3 PM. Choice filling ends on October 22, and the seat allotment result is scheduled for October 24. Candidates allotted seats must report to their institutes between October 26 and November 2.