ബിവറേജസ് ഔട്ട്‌ലെറ്റിൽനിന്ന് ഒരു കേസ് മദ്യം മോഷ്ടിച്ചു; കൂട്ടാളികൾക്കൊപ്പം കുടിക്കുന്നതിനിടെ പ്രതികൾ പിടിയിൽ | Vellarada Liquor Theft
Current: മലയാളം
തിരുവനന്തപുരം: വെള്ളറടയിലെ ബിവറേജസ് ഔട്ട്‌ലെറ്റിൽനിന്ന് ഒരു കേസ് വിദേശമദ്യം മോഷ്ടിച്ച കേസിൽ രണ്ടുപേർ പൊലീസ് പിടിയിൽ (Vellarada Liquor Theft). പെരുങ്കുന്നം സ്വദേശി അജയകുമാർ (40), അമരവിള സ്വദേശി എബിൻ (31) എന്നിവരാണ് അറസ്റ്റിലായത്. രണ്ടുദിവസം മുമ്പാണ് കേസിനാസ്പദമായ സംഭവം നടന്നത്.
മദ്യം വാങ്ങി മടങ്ങിയ സംഘം വീണ്ടും ഔട്ട്‌ലെറ്റിലെത്തി
പൊലീസ് പറയുന്നതനുസരിച്ച്, പ്രതികൾ ആദ്യം വെള്ളറടയിലെ ബിവറേജസ് ഔട്ട്‌ലെറ്റിലെത്തി അരലിറ്റർ വിദേശമദ്യം വാങ്ങിയശേഷം മടങ്ങിയിരുന്നു. വാങ്ങിയ മദ്യം കഴിച്ചുതീർത്തതോടെ ഇരുവരും വീണ്ടും മദ്യം വാങ്ങാനായി ഔട്ട്‌ലെറ്റിലെത്തി.
ഈ സമയത്ത് ഔട്ട്‌ലെറ്റിലേക്ക് ലോറിയിൽ കൊണ്ടുവന്ന മദ്യപ്പെട്ടികൾ ഇറക്കുന്ന ജോലികൾ നടക്കുകയായിരുന്നു.
കയറ്റിറക്ക് തൊഴിലാളികൾ ലോറിയിൽനിന്ന് മദ്യപ്പെട്ടികൾ ഇറക്കി പുറത്തുവച്ചശേഷമാണ് ഔട്ട്‌ലെറ്റിനുള്ളിലേക്ക് മാറ്റിയിരുന്നത്. ഈ സാഹചര്യം ശ്രദ്ധയിൽപ്പെട്ട പ്രതികൾ മോഷണത്തിന് അവസരം കണ്ടെത്തുകയായിരുന്നുവെന്നാണ് പൊലീസ് പറയുന്നത്.
ജീവനക്കാരുടെ ശ്രദ്ധ തിരിഞ്ഞപ്പോൾ ഒരു കേസ് മദ്യവുമായി കടന്നു
ലോഡിറക്കുന്ന തിരക്കിനിടെ തൊഴിലാളികളുടെയും ജീവനക്കാരുടെയും ശ്രദ്ധയിൽപ്പെടാതെ ഒരു കേസ് വിദേശമദ്യം എടുത്ത് പ്രതികൾ കടന്നുകളയുകയായിരുന്നു.
മദ്യപ്പെട്ടി കാണാതായതിനെ തുടർന്ന് ഔട്ട്‌ലെറ്റ് ജീവനക്കാർ പൊലീസിൽ പരാതി നൽകി. പരാതിയുടെ അടിസ്ഥാനത്തിൽ പൊലീസ് അന്വേഷണം ആരംഭിക്കുകയും പ്രതികളെ തിരിച്ചറിയുകയുമായിരുന്നു.
മോഷ്ടിച്ച മദ്യം കുടിക്കുന്നതിനിടെ പൊലീസ് എത്തി
പ്രതികളെ കണ്ടെത്താൻ പൊലീസ് സംഘം എത്തിയപ്പോൾ മോഷ്ടിച്ച മദ്യം കൂട്ടാളികൾക്കൊപ്പം ചേർന്ന് കുടിച്ചുതീർക്കാനുള്ള ശ്രമത്തിലായിരുന്നു ഇരുവരുമെന്ന് പൊലീസ് അറിയിച്ചു. തുടർന്ന് അജയകുമാറിനെയും എബിനെയും പൊലീസ് കസ്റ്റഡിയിലെടുക്കുകയായിരുന്നു.
പ്രതികളെ കോടതിയിൽ ഹാജരാക്കി റിമാൻഡ് ചെയ്തു
സർക്കിൾ ഇൻസ്‌പെക്ടർ ശ്രീകുമാറിന്റെ നേതൃത്വത്തിലുള്ള പൊലീസ് സംഘമാണ് പ്രതികളെ പിടികൂടിയത്. എസ്ഐ മനോജ്, സിവിൽ പൊലീസ് ഉദ്യോഗസ്ഥരായ അഖിലേഷ്, ദീപു, ദുനിഷ് എന്നിവരും അന്വേഷണസംഘത്തിലുണ്ടായിരുന്നു.
അറസ്റ്റിലായ രണ്ടുപേരെയും കോടതിയിൽ ഹാജരാക്കി. തുടർന്ന് കോടതി പ്രതികളെ റിമാൻഡ് ചെയ്തു.
Story Summary: Two men were arrested for allegedly stealing a case of foreign liquor from a BEVCO outlet in Vellarada, Thiruvananthapuram. Police said the suspects took advantage of unloading activities at the outlet and fled with the liquor. They were reportedly found consuming the stolen liquor with others before being arrested and remanded by a court.
