ഡൽഹി-എൻ.സി.ആറിൽ അർദ്ധരാത്രിയിൽ ഇടിമിന്നലോടെ കനത്ത മഴ; താപനില കുത്തനെ കുറഞ്ഞു, ദേശീയ തലസ്ഥാന മേഖലയിൽ വരും ദിവസങ്ങളിലും തണുത്ത അന്തരീക്ഷം തുടരുമെന്ന് പ്രവചനം

ഡല്‍ഹി: ഡല്‍ഹിയിലും സമീപ പ്രദേശങ്ങളിലും രാത്രിയിലുണ്ടായ ഇടിമിന്നലോടു കൂടിയ ശക്തമായ മഴയും തണുത്ത കാറ്റും താപനില കുറച്ചു.

കഴിഞ്ഞ കുറച്ചു ദിവസങ്ങളായി തുടര്‍ന്ന താരതമ്യേന ചൂടുള്ള കാലാവസ്ഥയ്ക്ക് ആശ്വാസമേകിയാണ് ദേശീയ തലസ്ഥാന മേഖലയില്‍ അന്തരീക്ഷം തണുത്തത്. ശനിയാഴ്ച വൈകിട്ടോടെ ഡല്‍ഹി, നോയിഡ, ഗാസിയാബാദ്, ഗുഡ്ഗാവ്, ഫരീദാബാദ് എന്നിവിടങ്ങളിലാണ് മഴ പെയ്തത്.

ഞായറാഴ്ച പുലര്‍ച്ചെ സഫ്ദര്‍ജംഗ് കാലാവസ്ഥാ കേന്ദ്രത്തില്‍ 18 ഡിഗ്രി സെല്‍ഷ്യസ് താപനില രേഖപ്പെടുത്തി. അന്തരീക്ഷ ഈര്‍പ്പം 98 ശതമാനമായി ഉയര്‍ന്നതോടൊപ്പം രാവിലെ 5:30 ഓടെ പ്രദേശത്ത് നേരിയ മൂടല്‍മഞ്ഞും അനുഭവപ്പെട്ടു. 

പകല്‍ സമയത്ത് പരമാവധി താപനില 31 മുതല്‍ 33 ഡിഗ്രി സെല്‍ഷ്യസ് വരെയും കുറഞ്ഞ താപനില 16 മുതല്‍ 18 ഡിഗ്രി സെല്‍ഷ്യസ് വരെയും ആയിരിക്കുമെന്ന് ഇന്ത്യന്‍ കാലാവസ്ഥാ വകുപ്പ് പ്രവചിക്കുന്നു. 

വരും മണിക്കൂറുകളില്‍ ആകാശം പൊതുവെ തെളിഞ്ഞു നില്‍ക്കുമെങ്കിലും ഉച്ചകഴിഞ്ഞ് ഉപരിതല കാറ്റ് ശക്തമാകാന്‍ സാധ്യതയുണ്ടെന്നും കാലാവസ്ഥാ നിരീക്ഷണ കേന്ദ്രം വ്യക്തമാക്കി.