പാത്രങ്ങൾ കൊട്ടിയും ഹോൺ മുഴക്കിയും പ്രതിഷേധം; മണിപ്പൂരിൽ ആയിരങ്ങൾ തെരുവിൽ, കണ്ണീർവാതകം പ്രയോഗിച്ച് പൊലീസ് | Manipur sound protest

തുടരുന്ന അക്രമങ്ങളിലും നീണ്ടുനിൽക്കുന്ന വംശീയ സംഘർഷത്തിലും സർക്കാർ സാധാരണനില പുനഃസ്ഥാപിക്കാത്തതിലും പ്രതിഷേധിച്ച് മണിപ്പൂരിൽ ആയിരങ്ങൾ തെരുവിലിറങ്ങി. വെള്ളിയാഴ്ച വൈകിട്ട് താഴ്‌വരയിലെ അഞ്ച് ജില്ലകളിലായി നടന്ന പ്രതിഷേധത്തിൽ പാത്രങ്ങൾ കൊട്ടിയും ഡ്രമ്മുകൾ മുഴക്കിയും വാഹനങ്ങളുടെ ഹോൺ അടിച്ചുമാണ് ജനങ്ങൾ പ്രതിഷേധം അറിയിച്ചത്. അരമണിക്കൂറോളം പ്രദേശങ്ങൾ ശബ്ദമുഖരിതമായി. (Manipur sound protest)

സംസ്ഥാന തലസ്ഥാനമായ ഇംഫാലിലെ ചരിത്രപ്രധാനമായ കാങ്‌ല കോട്ടയ്ക്ക് സമീപം പ്രതിഷേധം സംഘർഷാവസ്ഥയിലേക്ക് നീങ്ങി. കോട്ടയുടെ പടിഞ്ഞാറൻ കവാടത്തിൽനിന്ന് ഏകദേശം 300 മീറ്റർ അകലെയുള്ള രാജ്ഭവനിലേക്കുള്ള റോഡിൽ പൊലീസ് ബാരിക്കേഡുകൾ സ്ഥാപിച്ചു. പ്രതിഷേധക്കാർ മുന്നോട്ടുനീങ്ങുന്നത് തടയാൻ പൊലീസ് കണ്ണീർവാതകം പ്രയോഗിച്ചതായും റിപ്പോർട്ടുകളുണ്ട്. സംഭവത്തിൽ ആർക്കും പരിക്കേറ്റതായി റിപ്പോർട്ടില്ല. ഹവോമി ഫെഡറേഷന്റെ ആഹ്വാനപ്രകാരമാണ് വൈകിട്ട് 7.30 മുതൽ 8 മണിവരെ വിവിധ പ്രദേശങ്ങളിൽ പ്രതിഷേധം നടന്നത്. പാത്രങ്ങൾ കൊട്ടുന്നതിനൊപ്പം ഡ്രമ്മുകൾ അടിച്ചും വാഹനങ്ങളുടെ ഹോൺ, സൈറൺ എന്നിവ മുഴക്കിയും വൈദ്യുതിത്തൂണുകളിൽ ചുറ്റികകൊണ്ട് അടിച്ചും ജനങ്ങൾ പ്രതിഷേധിച്ചു.

കാങ്‌ല കോട്ടയ്ക്കുള്ളിലും ആയിരങ്ങൾ ഒത്തുകൂടി സർക്കാരിനെതിരെ മുദ്രാവാക്യം വിളിച്ചു. തുടരുന്ന കൊലപാതകങ്ങൾ അവസാനിപ്പിക്കുക, വംശീയ സംഘർഷത്തിന് പരിഹാരം കാണുക, സംസ്ഥാനത്ത് സാധാരണനില പുനഃസ്ഥാപിക്കുക തുടങ്ങിയ ആവശ്യങ്ങളാണ് പ്രതിഷേധക്കാർ ഉന്നയിച്ചത്. ദേശീയ പൗരത്വ രജിസ്റ്റർ (എൻആർസി) നടപ്പാക്കുക, അനധികൃത കുടിയേറ്റക്കാരെ തിരിച്ചറിയുക, സായുധ സംഘങ്ങളുമായുള്ള സസ്പെൻഷൻ ഓഫ് ഓപ്പറേഷൻസ് കരാർ റദ്ദാക്കുക തുടങ്ങിയ ആവശ്യങ്ങളും പ്രതിഷേധത്തിന്റെ ഭാഗമായി ഉയർന്നു. 2023 മേയിൽ ആരംഭിച്ച വംശീയ സംഘർഷം മണിപ്പൂരിൽ ഇപ്പോഴും വലിയ പ്രതിസന്ധിയായി തുടരുകയാണ്. സമാധാനം പുനഃസ്ഥാപിക്കുന്നതിൽ ഉണ്ടായ കാലതാമസത്തിനെതിരായ ജനരോഷമാണ് താഴ്‌വരയിലെ വിവിധ പ്രദേശങ്ങളിൽ ഒരേസമയം നടന്ന പ്രതിഷേധങ്ങളിൽ പ്രകടമായത്.

Summary: Thousands of people staged coordinated sound protests across Manipur’s five valley districts, demanding an end to violence and a resolution to the prolonged ethnic conflict. Police used tear gas near Kangla Fort in Imphal as demonstrators gathered close to the high-security Raj Bhavan area.